Read Upper Grand Valley Dani Wahyu 10 Bible Online

Wahyu 10 - Upper Grand Valley Dani bible

Wahyu 10

¹Esigit diluk arat iyigirik paga nen yabunggane, at malaikat obatneyak mende omanggi iyom oisa negen mende yugu. Nen, unggulowak oba warlombaik dagaksek. Nen, elokonggen mulinggi negen. Nen, iyok kindu amulok mot dagaligogo eti negen.

²Nen, kolal mbalek dinggilik ʼbugurlagat mende ʼbunggalek inggimo wolok mbogot oba nen wusa wagasik, iyok ebengge i laut yenggelek oba ʼbigik, nen, iyok mbaikngge, agat oba ʼbigik, ʼbisi dogolik,

³yengge kelo yengge negen endaga singa eti mende ane nggwe yiligogo eti kak ane nggokogo yisinem, wene onggo mbogot ane 7 paga nen yogoko lagaka.

⁴Mbogot ane esigit diluk yisinem, an kolal mbaligiluk kagaki mende, mbogot oba nen men yokneke, “Mbogot ane 7 paga nen yisinem kasuk kolken mende eti kolal mbalusak dek o. Kakla atno o,” yiluk yoknekemo kolkirik nen, togot digi.

⁵Esigit diluk yoknekemo togot digirik, lakigi mende, malaikat iyok pelak i laut yenggelek oba, nen, pelak agat oba, ʼbiluk, mendek werekma lakigi etnogo inggi ebengge mbogot oba mot-mot liyaʼbekesik nen,

⁶Allah nen mbogot ebe inom, oba dogoligogo mende inom, agat ebe inom, oba dogoligogo mende inom, i laut yenggelek inom, akla dogoligogo mende inom, taʼbokogonat winamet diyekesik iluk mondok dogoligogo mende endaga paga, men yiluk kumbuk mbalkonem kolki, “Allah nen kagasigin eti, etinem yigik, etinem yigik, erogat dogogun dek o.

⁷At te, it malaikat inebe 6 paga inabinggon ane arat pukegasik oba nen, omanggi abinggon ane pukagin eti, ane pukasinem, at Allah nen wene akla wene it ap at anduwanengge mende, wene akoni yogisasi laguka mende yomenogo yogisasi dogolik, Yabunggane an esigit diluk kagasigin, yiluk abok yogisasike kagat, arat kagat lasigin o,” yiluk kumbuk mbalke.

⁸Esigit diluk kumbuk mbalkesik oba nen, yabunggane, mbogot oba nen, ane yoknoko laga mende etnogo nen men yokneke, “Kolal mbalek dinggilik ʼbunggalek mende etnogo, at malaikat iyok pelak i laut yenggelek oba, nen pelak, agat oba ʼbiluk mendek werek etnogo, inggimo pago werek eli wagani lan o,” yiluk yoknekemo,

⁹woknisuwagaluk nggino oba lagonem, at nen men yokneke, “Waganiluk nen, nano o. Esigit diluk nasinem kambema nggin ambusu negen induk pano nigin mende, kakla wusakonem, induk arle weyak kagat lasigin etnaga o,” yiluk yokneke.

¹⁰Yoknekemo, kolal ʼbugurlagat mbalek eti, inggimo nen waganggirik, ebe nasinem, nambema nggin ambusu negen induk pano mende, nakla wusakonem, arle mondok weyak kagat lagonem kigi o.

¹¹Esigit diluk kigirik oba nen, yabunggane mbogot oba nen, wene men yokneke, “Kat nen wene Allah nen yabunggane kagarinabigin wene eti, akoni inunggulowak endaga dombok, inago erlo dombok, inane dombok, ineugi nggokndek inendaganggok dogalegat inebe dombok, yogisasi dogon o,” yiluk yokneke.