Read Upper Grand Valley Dani Wahyu 4 Bible Online

Wahyu 4 - Upper Grand Valley Dani bible

Wahyu 4

¹Esigit diluk yoknokonem kigirik oba nen omborlik, naʼbingganggo paga omanggi yigit diluk lakigi. Mbogot oba su kolagambe kuwalek werekma, at alep pinggon ane nggok mende negen paga yoknokonem nasuk kolki mende etnogo nen yabunggane men yokneke, “Wene ya dogoluk nen yabunggane kagat lasigin mende kilenggen lakanok nen yiluk, yanggul kisik nen, dagi me o,” yiluk yokneke.

²Esigit diluk yoknoko nggorlek eranogoat, Allah Agurengge noba duk yi wagama nilenggen lakigi mende, mbogot oba at nggok dogoligogoma obalikmo werekma lakigi. Esigit diluk werekma, at ebe obalikmo eti paga korek werekma lakigi.

³At eti elokonggen nggit aʼbigil weyak onggo nggok mbaligogo mende endaga baiduri pandan inom, delima inom, eti mende negen werekma, warlombaik elokonggen nggerengga perlelek negen mende, at nggok dogoligogo mende obalikmo etnogo paga dagak-mbagakogo werekma lakigi.

⁴At nggok dogoligogo mende obalikmo ndurlem werek nggorlek, it amberek nggokndek dogoligogi mende inobalik 24 paga werekma, ap inarluwendek inebe 24 oba nenat iniyom nggut mende yugu nen, nggare-nggare emas mende mendago ap inendaganggok yugu werek kak yugu mende, inebe inobalikmo eti paga korek welagaka.

⁵Esigit diluk werekma, at nggok dogoligogo mende obalikmo eti paga nen o yabok alep-yabungga ʼbigal kigik, mbogot ane nggok sup yiluk nen ane luk-luk lagik, kagako nggorlek, at nggok dogoligogo mende obalikmo etnogo elokoma isagal yibarlek ebe 7 paga iyok ndilik welaga. Esigit diluk welaga eti ebe, Allah Agurengge inebe 7 paga etnogoat o.

⁶Nen, at nggok dogoligogo mende obalikmo etnogo elokoma, wukagi elokonggen mirli mondok i laut yenggelek negen welaga. Esigit diluk werekma, at nggok dogoligogo mende obalikmo ndurlem werekma, abel pelak-pelak, it Allah nen winamet diyasikemo iniluk dogoligogi mende amberek inebe 4 paga inelokomangge inomborlikngge inilenggen dogalegat mende welagaka.

⁷Esigit diluk welagaka eti, omanggi kelo yengge negen endaga singa eti kak, nen, omanggi sapi nggulok negen, nen, omanggi elokonggen akoni inelokonggen negen, nen, omanggi sewe nggok nggin putluk noko nggorlek lakiligogi kak, werekma lagiyigi.

⁸It eti inebe 4 mende, inebe dombok inaʼbika 6 oba werekma, inomorlo abel sikmangge inom, akmangge inom, inilenggen mondok dogalegat mende inane puk welagidek, dinggagane, kibanggone Allah pogorako mondok dogolik, Wu i wu e yau i “Ninombae Allah Endaganggok obatneyak dogolik, yau i Yi mende ndi mende kagasusak arlek, ........... yau i Paganeat nggaʼberek mondok welagike, ........... yau i Yogondak nggaʼberek mondok werek, .............. yau i Yabunggane nggaʼberek mondogat dogogin,” ....... yau i yiluk pogorako mondok welagaka.

⁹Esigit diluk yisi dogolik, kibitngge-yogongge at nggok iluk mondok dogoligogo mende etnogo ebe obalikmo werekma pogorako dogolik, “Ninombae nggok dogoligogo mende karat keyagi watkakik, pogot kakik, nggogot dagagik, kagako dogogun o,” yisinem,

¹⁰it ap inarluwendek inebe 24 paga yomenogo nen, at nggok iluk mondok dogoligogo mende eti elokoma inindibagal yunggulogo pogorako dogolik, nggare-nggare inunggulowakma yugu mende nggirik-nggorokogo, at nggok dogoligogo mende obalikmo etnogo elokoma wusaʼbisi dogolik, men yisi lagaka,

¹¹“Ninombae Allah Kendaganggok, .......... yau i Yi mende ndi mende taʼbokogonat, .......... yau i Kat kakla ambasigindik nen walkasigin, .... yau i Walkasiginmo dogoligogo eti, .............. yau i Karat nggok kobatneyak kalok, ............. yau i Pogot kakik, kalon palkik, kagako dogusak,” .... yau i yiluk Allah pogorako lagaka iyigi.