Read Urarina Locasiicha Laenai 1 Bible Online

Locasiicha Laenai 1 - Urarina bible

Locasiicha Laenai 1

¹Arajii cachaaurute caa canacaanu jana Jesoso ichanohichuru laenacurelu.

²Nii laenaeraaurute nunuhe caje coaauneein aina amuhemujueein niicha coarai que canacaanu relaeraneein neeuruhane coina tenojoineein neeurelu.

³Nii jaunna, canuhetonai satiin coitucuurera caje bajaaun, rai nunuhe caje coaauneein colalajiin, caohachaain coitucuhanune coina. Nii jana, carai netonai jataain caohachaane jaunna carai nelatein neeine rai laenaaunra Teofilo,

⁴esinae rauhijiriin erenaa niha nii ii relaauruhalune jaa esenetaain caohachaain coitucuhin neeine coina. Nejanoarichaain cacha baotisaera Joaanne biha anjerane

⁵Jodea batane curuaanaa- rey neein niha leinjiin Jorioneein nenaa Erodesine bana jetaote, ichoaelu leinjiin Cana Coaunera aina caohachaain niha cachane coina rucuheraneein nenaa saseredote Sacariasi. Aca jetaote, acaauru inoaensi saseredotecuru Abiasa lauri caje nenaanelu. Nii jana rai sinijera Isabeli jetaote, jauriaanejeein saseredoteneein nenaa Aaroon nefoerateeuru caje nenaanelu.

⁶Acaauru jetaote, esinae rauhijiriin jiniiquiin Cana Coaunera esenetaain naitoonjoan tonoraain neeurelu. Nitohaneeunruhane jaun jetaote nii chuni- acaauru que chatohanai ujuaitena nainecurenelu.

⁷Nejetaote, canaanai sirina inaeniha nii Isabeline jaun, leinjiinejei canaanai sirilanaala jiniiquiin biinaaneeurelu.

⁸Nitohaneein jetaote, inae Cana Coaunera notaracaae saseredote neeuruhane ichanohin jujui mocooruhane coina neeuruha Sacariasi laurichurune jaa cojoinacaque tihane jaun jetaote, nitohaniha saseredote neeuruhane ichaone jaun, Sacariasi que tacaajeein dadae, rori ichoaae teein jujui mocoha Teenforo asaaene coina.

⁹

¹⁰Nitohaneein jujui mocoha enohane tonohanau jetaote, aerene neein Cana Coaunera bajae bajaecure leeochaauru saseredotecuru aina cachaauru.

¹¹Nii jana jetaote, Sacariasi rai ecocohin, nii jujui mocohane jaa rori raotono nichajai que jetao chujujuae Cana Coaunera letono anjera.

¹²Nii jaun jetaote, nii anjera coaariin, nesoonetiin cojoaelatoha Sacariasine jana jetao:

¹³“Coa nesoonetohara Sacariasi. Bajaebajaequiine aonajian Cana Coaunerara. Nii ii sinijera Isabelite leinjiin canaanai siricheeincha. Acate Joaan neein curuaateriquiincha.

¹⁴Chaentechu aina jataain raotojoein neriquiincha. Leeochaauru cachaauru netonaite nejanoa coroaecurureein,

¹⁵jataain Cana Coaunera rai nelateinneein nerichaainne jaunra. Coatiha bino, abariinti, naaonjoainuri corinaainta. Acate esinae rauhijiriin Cana Coaunera suujue que suujuecoha cureein nejanoaane ajiniha caje coaauneeincha.

¹⁶Acate, Cana Coaunera Ere tonoraaiche Isaraeli cocoaichaneeichene coina ichareeincha.

¹⁷Nii Joaante turuha uheneni Cana Curuaanaa ajiniha cureein, Cana Coaunera ere bera inoaensi Irihasi rai niicha tei suujueque suujuequiin- Cana Coauneraacha ichana nainei ichaain naaonjoaaincha. Acate aicheein calaohichuru aina jiniiquiin ita que suujua acateein neeuruha acaauru fojiaraaurune coinara. Chaen erenaa tonorana jeriheichuru netonai erenaa tonoraain naaonjoaaunruhane, raotojoeein Cana Curuaanaa ranaa nainecuruhane coinara,” naa rai nii anjerane jaun jetaote:

¹⁸“Inasiine bajiaa nitohaneein nerichaaunnine esenetareeun, inae casinejera aina jiniiquiin jataain biinaanihacaanu natiinta,” naa Sacariasine jana jetaote:

¹⁹“Canune, Cana Coaunera letono Cabirieli neeun. Acate caletoae, ichei caa erenaa raotono bihanune coina.

²⁰Nete caa ichei aitocoaaunne esenetaeneeine jaun, ena caje coaauneei caa ichei caitoonjoan cojoinaca que tihanereein tiaain erenaachara neein neriquiincha,” nae jetao Sacariasi rai nii anjera.

²¹Nii tonohanau jetaote, aerene neein Sacariasi cohacuruha cachaaurune jana, jataain carajaane jaun jetao, “Chana jataain ichae carajaain Teenforo asaae caje mituenihane coina,” naain jetao ita caje bajaaure nii aerene neein coharaauru.

²²Nii jana jetaote, tabiicha acaauru rene eresilanaala Teenforo caje mituha uhe nii Sacariasi, acaauru rai biji nejesinaacha que bihajeein. Nii jaun jetaote: “Jerihanete chaelai coaaratiha Cana Coaunerane jaa coaracaiha Teenforo asaaera,” naaunre jetao ita rai. Nii caje nunuheteein jetaote, erenaa nainelanaala nelu Sacariasi.

²³Inae nitohaneein teenmforo asaae niicha ichanenu nainaain jetaote, jelaiha nenajaun cauha cue Sacariasi.

²⁴Nii baiha neeonriin, inae ausirineein jetaote, rai loreri caje amuelanaala ecuhacha ne saoqui ateein rai sinijera Isabeli:

²⁵“Cana Coaunerate, caa catohaneein caete, nabana caque nererojoecaain jaolecooruha cachaaurune coataa,” naain suujua ereein. Nejanoarichaain Jesosone biha leinjiin anjerane

²⁶Inae saota ateniha canaanai siriha Isabeline jana jetaote, Calileea batane que nenaa Nasareteu jetao, leinjiin letono anjera Cabirieli letoae Cana Coaunera.

²⁷Chariji bana quicha aina ichoaelanaala nenaa leinjiin ranuna Mariha rene turuha cuhane coina. Nii ranuna jetaote, cana inoaensihuru curuaanaa Rabiri nefoerateneein nenaa Jose que nelanajaane rai ne.

²⁸Nitohaneein cuhin jetaote, nii niha Marihane jaaun rene turuhin enohin jetao: “Ii renena bedaeniha uunra, Cana Coauneraacha rausiajei. Jataainte ii rausiaje Cana Coaunerara” naa rai nii anjerane jaun jetaote,

²⁹coaariin nesoonetiin: “Chanuna caritiin ere canu rai,” naa suujua cuhane Marihane jana jetao,

³⁰“Coa nesoonetohara Mariha. Cana Coaunerate ii janiji, ii rai caohacha ichaane coina.

³¹Inae leinjiin canaanai siririquiincha. Inae nejanoaane jana Jesoso neein curuaateeunicha.

³²Acate itolere cacha amurijiriin itolere que nelateinneein, acaihaniji Cana Coaunera Calaohineein nenaaneein coitucuha cuurureein cachaaurura. Nii jana Cana Curuaanaa Cana Coaunerate, nii rai foeratera inoaensihuru curuaanaa neein nenaa Rabiri rijijieein reyneein tereein, inara Curuaanaaneein nihane,

³³rai nere tonoraaiche inara Isaraeli cocoaichaneeichene, chabana satonoelanaala inara Curuaanaaneein nihane coinara,” naa nii anjerane jana jetao:

³⁴“Inasiine bajiaa nitohaneein leinjiin canaanai siricheeun nii chuni cacha aina ichaohanune coaalanaalata,” naa Marihane jana jetao:

³⁵“Cana Coaunera Suujuete aiha suruaane rijijieein ichoae fauha ureein, leinjiin canaanai siriine coinara. Nii jaunte nii canaanai iicha sirii, Cana Coaunera Calaohinereeincha.

³⁶Ii araai Isabeli netonai techu, inae leinjiin canaanai siricheeincha. Inae biinaa nihane sainejeeinte inae canaanai siricha. ‘Canaanai sirina inaenihane jaun jete canaanai sirine,’ naauruhane jaate, inae saota atene rai canaanaicha.

³⁷Coatiha Cana Coaunera rai caaintaai chata,” naa Mariha raine jana jetaote:

³⁸“Aihachuhisicha. Niicha belai nichaaunne rai aitohine rijijieein, niicha ichana jerei ichamiin Cana Coaunerara,” naa Marihane jana jetao, inae jelai caje amue nii anjera. Isabeli rene turuha cuha Marihane

³⁹Nii bana jetaote, erojoeein cuhin Jodea bichatane que nenaa neseu cuhin Isabeli rene turuha cue jetao Mariha.

⁴⁰Nitohaneein cuhin jetaote, inae ecu turuhin Sacariasi loreri asae enohin, Isabeli rai iriha Marihane aonaain jetao, Isabeli suri cuhane neein nerurujuae nii rai canaanai. Nii jaun jetaote, Cana Coaunera Suujue que suujuequiin jetao,

⁴¹

⁴²jataain tonijiaain: “Cana Coaunerate, itolere enecuru rai caohacha ichaane amurijiriin ichei caohacha ichae. Nii rijijieeintechu nii ii calaohi rai netonai caohacha ichae.

⁴³Nii jaun chaneeinna jana nereeun canu, Cana Curuaanaa nebaneeine saijieein carene turuha uhine coina.

⁴⁴Nii carene turuhin ereeine aonaainte, rachoojoenaa caaun canu suri cuhane neein nerurujuae carai canaanai.

⁴⁵Nii jaunte raotojoeein neei, ii rausiaaeca nii ichei aitoha Cana Curuaanaane esenetaain tonoraaine jaun,” naa Mariha rai Isabeline jana jetaote:

⁴⁶“Aihanuchujian.

⁴⁷Canu suujuate,itolere niicha ichana naineei ichaain,canu ichoterateein nihaCana CuruaanaaCana Coaunerane jauncoroaje,

⁴⁸rai chaneein nenihanune saijieeincanu janijiin canu rausiaaecaCana Coaunerane jaun.Nii jaunteena caje coaauneeinCana Coauneraacha rausiajeineeincacurujuatiha cuurureeinitolere janonaa bana cachaauru,

⁴⁹nitohaneeinjataain canu belaihaitolere que nelateeinitolere ichana naineraCana Coaunerane jaun.Leinjiin acaachateAcaneein ne.

⁵⁰Nii Cana Coaunerate,cairichaaojoaai itolere banaque suujua acateeinichaonacaauru coarae.

⁵¹Nitohaneein itolere niichaichana nainei ichaainte,nii chaque nelatelanaala neeuruhanii itolere que nelaaetohanocoetonacaaurune coinaicharaneein ne.

⁵²Chaentechu, curuanaacurureychuru nihanatiin,

⁵³inae cha nelanaalaneeuruhane coina ichae.Chaentechu,nii leeochaauru raichaque nelatelanaalacairicheinejeein nenacaaururausiaeraneein ne, itolere que.Jana nii coriqui nebaneein nenacaaurute,nii cha colane bijiicha baaejeeinniha cuurureein.

⁵⁴Aihane jaunterai cacha Isaraelitanichaachenecairichaaojoaain canacoaraane jaun,cana coroatajanereein,

⁵⁵inae nitohaneein ichaane coina,cana inoaensi Abaraaun,nii rai inamacooru,naaonjoainuri rai aitohaluCana Coaunerane jaun,” naain jetao Cana Coaunera coroaje Mariha.

⁵⁶Nitohaneein turuha cunajau nichata ateein Isabeli aina nihane baiha jetaote, jelaiha nenajaun cauha cuelu Mariha. Inae nejanoaa cacha coujunacateein baotisaera Joaanne

⁵⁷Inae nejanoaane que tiha nii Isabeli rai canaanaine jaun jetaote, quicha cojoaajineein janoae rai neba Isabeli.

⁵⁸Nii jana jetaote, rene turuhacoaain jetao coroaeca cuure rai naraaichuru aina rai laurijiracuru, rai caohacha ichaa Cana Coaunerane coitucuuruha raotojoeeine jaun.

⁵⁹Inae fosa janoniha nii canaanai nejanoane jana jetaote, amaain rai jaberoco cari saerateein jetao, rai inaca Sacariasi curuaa que jetao curuaatenaa jerecure.

⁶⁰Ne jetaote jerelanaala: “Aihei, jiaohine. Joaan neein curuaacanete caohachae,” naa rai nebane jaun jetao:

⁶¹“Chanuna. Inasiina niha niritocojoaain curuajaain charaaine coaalanaala niritocohare rai curuaa,” naain jetao jerecurene.

⁶²Niritiin jetaote, nii canaanai inaca coujueluhin: “Tohanriani rai curuaata,” naain jetao bajaaure coitucuuruhane coina.

⁶³Nii jaun jetaote, acaauru caje que teein laenaane jaanu bajae jetao biji nejesinaacha que. Nitohaneein bajaain jetaote, “Joaan neein curuaacanete ne,” naain jetao laenae rai inaca, jaiti mituheniha rai nerene jaun. Nii jaun jetaote, satiin cojoelatoore cachaauru.

⁶⁴Nii rijieeoritiin inae nacoauneein mituha nerene jaun jetaote, rachoojoeiin Cana Coaunera coroaje Sacariasi.

⁶⁵Nii jana jetaote, nitohanihane jaun cojoelatoore rai laurijiracuru coarajeuurera. Nii jaun jetaote, itolereneein Jodea bichatane batane sacuritaain coitucuhin ita rai beebejerejetocurelu.

⁶⁶Nii aonaain cojoelatiin jetaote: “Chatohanai neeinna nereein nii canaanai,” naaure jetao, esinae rauhijiriin niicha jerenohineein nenaa nihane coaaratiha acaauru que Cana Coaunerane coaracuruhane jaun. Rachoojoiha Sacariasine

⁶⁷Nii jana, nii canaanai inaca Sacariasi suujueniha neein que beratiha Cana Coaunera Suujuene jaun jetaote:

⁶⁸“Jataainte caohacha ichaeCana Curuaanaa Isaraeli Coaunerara,raotojoeein neeuruharai cachaaurune coina,ichoteratiha uhana jaunra.

⁶⁹Nii jaunte,cana inoaensihuru curuaanaaRabiri nefoerateneein,jataain itolere amurijiriinnelateein laraajiin nenaa letoae,jianacoon cana mitaeraanu quera.

⁷⁰Inae catohaneeinichaane coinate,rai nere bera inoaensihuruque beratelura.

⁷¹Itolerecana que nererojoecaain,cana aina nejerateein nenacaaru,naaonjoaihunri cajecana mitaane coinaaitohalune jaunte,

⁷²nii baitena nainene,cairichaaojoaaincana inoaensihuru coaraainaitohalune jaun,Cana Coaunerara.

⁷³Nitohaneeinesinae rauhijiriin ichaane coina,cana foeratera inoaensi Abaraaun rai:

⁷⁴‘Jianacoon,cana aina nejeratenacaauru cajejete cana mitaane,cha que casilanaala nere tonoraainleinjiin raaicha nelateein,

⁷⁵esinae rauhijiriincaohacha nejesina ichaain,baaso coacuelanaalainoaenlu netojoeein,itolere janonaa bananerichaacheeinje,’naain belu Cana Coaunera,cana foeratera inoaensi Abaraaun rai.

⁷⁶Jana ii, cacalabineeinete,acaihanijin Cana Coauneraneein nenaa ere beraneein,Cana Curuaanaa ajiinchateraneein niha curiquiin,jeriha Cana Coaunerane rijijieein,turunaa nainihane jaanubeebejeeine coina,

⁷⁷acaauru osa cajeacaauru ichoteraterichaainCana Coauneranecoitucuuruha cachaaurune coinara.

⁷⁸Jataain cairichaaojoaaincana coaraane jaunte,dede caje cana raiena nenaa Cojoanonaa teeinne Cana Coaunera,

⁷⁹nocohena tabai caje nichoteein,nii rai Cojoanonaa queneconaain cuhin,cana rai niicha tenojoinraotojoeein rachoojoeeinichaonaanaja queturuhacachene coinara,” naain jetao nii canaanai inaca Sacariasi suujueniha neein que beratiha Cana Coaunera Suujue.

⁸⁰Nii jana jetaote, esinae rauhijiriin Cana Coaunera Suujue que suujuequiin jetao, fohejeein cuujue nii canaanai. Nitohaneein fohejeein ichauhenaneein jetaote, cacha areroo amuhemujueein nelu, rai lauri Isaraelitacuru que necoitucueratihane reein tiaaojoaain.