Read Urarina Ichanohichuru 2 Bible Online

Ichanohichuru 2 - Urarina bible

Ichanohichuru 2

¹Jorioocuru beseta Feentecosetesi janonaa bana nihane jaun jetaote, satiin le laurijieein ita taojiaain neeure, Cana Coaunera bajaauruhane coina Jesocurisito esenetaeraauru.

²Nii jana jetaote, cuu le lorerijieein satiin codohacooruhana jana, luhecotariin tonijiaain cujuana rijitiin fauha uhe Cana Coaunera Suujue dede caje.

³Nitohaneein tonijiaain fauhin jetaote, nii satiin- ecu nenacaauru suujueniha neeoritiin, acaauru bichohe naainetiin, usi lanaro tocohaneein lanalanaaonanae.

⁴Nii aina jetaote, nejelau nejelaauru, lauri laurichuru caje uhin cuu turunacaauru cachaauru rai, acaauru ere cuhane ereeure satiin Jesocurisito esenetaeraauru, erelanaaca Cana Coaunera Suujuene rijijieein.

⁵Nii bana jetaote, cuu nii Jerosaleeun turuhin neeure lauri lauri atane sacutaainchuru caje unacaauru- Cana Coaunera aitoonjoa rijijieein ichaonacaauru Jorioocuru, ecu Feentecosetesi beseta bitoaauruhane coina.

⁶Nitohaneein inae acaauru ichoaae fauha Cana Coaunera Suujuene jana jetaote, tonijiaain ereeuruha Jesoso esenetaeraaurune jana jetaote, satiin codoonetoore nii lauri lauri caje unacaauru cachaauru, acaauru ereeuru cuhane aitocuruhane aonaain. Nitohaneein jetaote, suujuanu inaaoritelanaala

⁷cojoaelatonajaain: “Calileea cocoaichacuru nihanatiin,

⁸inasiina cana ere cuhane aitocure aonacaachene coina.

⁹Caute nihacache itolere sacutaain caje uhinichaachene, Partia batane caje unacaauru, Media batane caje unacaauru, Elam batane caje unacaauru, Jodea batane caje unacaauru, Capadosia batane caje unacaauru, Poonto batane caje unacaauru, chaen Asia batane caje- unacaauru,

¹⁰Firijia batane caje unacaauru, Paanfilia batane caje unacaauru, chaen Egipto batane caje unacaauru, tajiha Sirene bujua nenaa Libia batane caje unacaauru. Chaen techu, cau neeure cana aina Romanocuru netonai.

¹¹Acaauru tabaaurute Jorionecure. Jana leeochaaurute, Jorionecurenihane saijieein Joriooneein nerotocure. Chaen techu cau neeure cana aina Cureta batane caje unacaauru, chaen Arabia batane caje unacaauru, naaonjoaainunri. Nitohaneein araai laurii caje uhacachene saijieeinte, satiin lauri lauri caje uhin nichaachene ereeuru cuhane Cana Coaunera coroaecuruhane jana aonajihancache,” naain jetao satiin cojoelatoore.

¹²Nitohaneein cojoelatiin jetaote: “Chatohanihana,” naain ita caje bajaae bajaaecure satiin.

¹³Jana acaauru tabaauru jetaote: “Chaquena ereeure caa ajenacaauru,” naain acaauru batocure. Cachaauru raite ere Fedoro.

¹⁴Nii jaun jetaote, lechoonca leinjiin aina ecu nenacaauru afosotooru aina nichaauraain jetao tonijiaain: “Aonacuche satiin Jorioocuru. Satiin cau Jerosaleeun neiniquichene raina aitoreeunni coitucuhichene coina.

¹⁵Coatiha aitocohichene jana, aansijiinijin ajeeuruhi caa cachaauruta. Inasiina jaiti janoneniha natiin ajeeurureta. Ena nuna macojiu teejiha enoto natiin, cha caaunna ajeeurure.

¹⁶Nete catohanihane coina, inoaenlu inae aitiin besihalu Cana Coaunera Ere bera inoaensi Joherine rijijieein:

¹⁷‘Inara rai quiicha tei janonaabesautelalaje raina,satiin chauratane que nenacaauru choaecanu suujue letoareeunnicha.Nii banate,quiicha chana jerei coaraainbeebejiha cuurureein canu coreniha,inara nefoerateeurura.Enamanaacuru niha natiinte,acaauru que quiicha coaarateicoaracurureeincha.Binaacuru nihanatiinte,quiicha coaarateicoaraa cuurureein acaauru sinihura.

¹⁸Nitohaneein inae cutihane banane,saain canu cachaauru,enecuru, quichaauru,naaonjoainuri choaecanu suujue letoareeunnicanu ere beebejeeuruhane coinara.

¹⁹Chaenna, naain dedeeujataain cojoaelanaacojoaicoaratiha cureeunnicha.Jerichanejeeinachu,chauratane que coaratiha cureeunnicha.Nii banate ecooca cureeinichana, usi tabai,suruaa neeonjoaain,naaonjoainuri chauratane sacutaaincha.

²⁰Nii banate conoenereein enotora.Jana atenete,ichana tocohanai jana niha cureeincha.Nitohanihate cureeininae ichuun nejeeonrihaturu rai niha inara Curuaanaane janara.Nii cojoanonaa banate,coasinacaain elunareeincha.Nerinaain nii caje nichotei cachata.

²¹Nete, cairichaaojoaain coaraaCana Curuaanaane coinabajae bajajeein ichaonacaauru,satiin nii caje nichotiha cuurureeincha.’ naain nere bera inoaensi Joheri que beratihalu Cana Coaunerane rijijieeinte, inae caa aihane jana coaraquichera.

²²Aihana jaun, caohachaain rautaain aitocoaaunne aonacuchena, caa que erete aonaquichera Isaraeli cocoaichacuru. Satiin coarajeeichene notaracaete, itolere ichaain inara notaarate Nasarete cocoaicha- Jesoso que Cana Coaunera rai letononeein nihane coitucuhichene coina niquicha.

²³Nete, inae inoaenlu nitohaneein teeichene coina, niicha jerei rijijieein ichaa Cana Coaunerane jaun, inara rai tiha nii terane jana, amaain teeiche nechu aansai cachaauru raine jaun, coroso que teein sohin jaaorelu.

²⁴Nete onaa caje ichatelu Cana Coaunera, onaa caje colucohin, amuritonaa nainesiniha onaane jaun.

²⁵Inoaenlu jaiti caa chauratane que turueniha Jesocurisitone janate, aitorichaain Jesosone rijitojoeein:‘Itolere janonaa banate,cacorataanereein Cana Curuaanaara.Aihana jaun,nerinaain chatohaneein canu terata.

²⁶Nii jaaunte,raotojoeein rachoojoeein ne canu suujuara.Chaen nechu,chaque casilanaala raotojoeein ichaaon,

²⁷curu cuhane nitajiha canu jaberecone nainatejelanaala,niheichusetuha canu jaberecone nainatejenereeinine jaunra.

²⁸Iite canu que,onaa caje ichananaja coaarateeicha.Nii jaunna,raotojoeein rachoojoeein nereeunni,’ narichaain Jesoso, Cana Coaunera raine rijitojoeeinte belu curuaanaa inoaensi Rabiri que beratiha Cana Coaunerana jaun.

²⁹Jesocurisito coreniha canejeraauru, jerecuchene esinae rauhijiriin inara rai aitete aonaquiche. Nii coitucuhichene rijijieeinte, ohalu cana foeratera Rabirine jana, conautecuruhane jaun cau ne rai natanebana.

³⁰Nete, esinae rauhijiriin rai nere bera inoaensi niha Rabirina jaun, rai nichoala- cana curuaanaa- Rey neein tihane coina, rai besihalu Cana Coaunerane jaun, coaara rijijieein coitucuelu- curuaanaa inoaensi Rabiri: ‘Ii ichoala ichoalacuru calaohite, Jorioocuru curuaanaa Rey niha cureeincha.’ naain que coitucueratiha Cana Coaunerane jaun.

³¹Nii jaunte, inoaenlu jaiti turueniha Cana Coaunera letono- Mesihasine jana, nota que coaara rijitojoeein: ‘Naaonjoaainte, turuha ureeincha. Nihei nitajerinaain rai jaberecota. Niheichu ecu seturinaainta. Oo cajete ichanareein Mesihasicha,’ naain caohacha nainejeein jitariin coitucuhana jaun, Jesoso coaara rijitojoeein belu curuaanaa inoaensi Rabiri.

³²Nii jaunna esinae rauhijiriin bihalune rijijieein, canaacaanu netonai, canaacaanu nota que ichanaa Jesosone coaracaanu, ichatiha Cana Coaunerana jaun.

³³Nitohaneein ichateeinte, enacoauneein dedeeu rae Cana Coaunera, rai raotono nichajai que, aina jiniiquiin nihane coina. Chaaen techu, nitohaneein dedeeu raain, nii rai niicha tenaa jerei rai Suujue te. Niite, caa inara notaracae canaacaanu nainetiin chaluhane jaun, satiin coaraain aonaquiche. Aihana jaun, inae laen coitucuhiche raaotojoeein.

³⁴Coatiha Cana Coaunera ere bera- curuaanaa inoaensi Rabiri, dedeeu iniha cuhilu. Cana Coaunera Calaohi Jesosote iniha cuelu. Nii jaunte,‘ “Iite satiin Curuaanaa neeicha.Cau caraaotono nichajai que carohan nelaurihaau,ii que nejeratenacaauru amuritohine coinaichacaaunne reentiaaincha,”naa Cana Curuaanaa rai Cana Coaunerara,’ naain Jesoso belu Rabiri, beratiha que Cana Coaunerane jaun.

³⁵(null)

³⁶Aihana jaun, satiin Jorioneeichene raina caa beeun raotojoeein coitucuhichene coina. Nii coroso que teein inaraacha focoi- inaraacha atinai Jesosote, satiin Curuaanaa Mesihasineein te Cana Coaunera,” naa Fedorona jaun jetaote,

³⁷que suujua rerohecaain, jataaen inaderaain: “Jesocurisito coreniha canejeraauru, cha charihacaanuta,” naain bajaauruhane jana jetaote:

³⁸“Cana Coaunera notaracae baaso ichaain, osa que nesaruhin naosateein, naaonjoaain neeichene jiaaneein, Cana Curuaanaa Jesocurisito coreniha nebaotisaerateeuche satiinte, inara osa caje inara mitaain, inara rai- rai Suujue teeine Cana Coaunerara.

³⁹Catohaneein tihane coinate, inoaenlu beratelu Cana Coaunera. Niite nenacaae inara caohachanu neein ne, satiin inara calaohichuru aina, satiin coriaae nenacaauru raine maajeein. Satiin niicha cotihacuri raite, rai Suujue tiha cureein Cana Curuaanaa- Cana Coaunerara,”

⁴⁰naain acaauru suujuatiha, nii cachaauru- baasoneein ichaonacaauru caje mituuruhane coina, Fedorone jaun jetaote,

⁴¹nii niicha beebejei esenetaain tonoraeraauru jetaote, baotisaain cojounacatenojoineein, Jesoso esenetaeraneein neeure, nii bananeein nichata oaraancai cachaauru.

⁴²Nii jaun jetaote, satiin rauhijiriin ichaaore, relanajaauruha nii afosotoorune rijijieein, ita suujua rijitojoeein jiniiquiin ita coroatajaneein, ita taojiaain ita aina Cana Coaunera bajaain, ita aina jiniiquiin lenoneein naaonjoaaunre. Raotojoeeinte ichaaore Jesocurisito esenetaeraauru.

⁴³Nii jaun jetaote, satiin cojoaelatoore, itolere ichaain- cachaauru notaaratiha afosotooru que Cana Coaunerana jaun.

⁴⁴Satiin nii esenetaeraauru jetaote, ita suujua rijitojoeein neein, ita rai chaaelai sirichuruhane ita sihure ita acatiha tacaain.

⁴⁵Chaelai acaauruhacha sirii que necoreteeuruhane nenainetiinete, ita aina nii core- coriqui teein ita rai leruhin raaure, raotojoeein latecuruhane rijiinanaain.

⁴⁶Cojoanoonetojoeein jetaote ita taojiaaure, ita taojiaauruhana jaan coloheri- Teenforo asae. Rai lorerichuru asaae nihanatiin jetaote, ita taojiaain, ita rai lenone chaluhin lenonecure jiniiquiin, raotojoeein rachoojoeein

⁴⁷Cana Coaunera coroajeein. Chaen jetao techu, caohachaain neeuruhane coaracure satiin ecu nenacaauru cachaauru. Cojoanoonetojoeeinte, niicha ichoteratecuri tiha acaauru aina, Cana Coaunerane jaun nejeeotejeein sacuure.