Read Urarina Roma Nenacaauru Rai 11 Bible Online

Roma Nenacaauru Rai 11 - Urarina bible

Roma Nenacaauru Rai 11

¹Nii quene canu aitoon. Rai cachaneein nenacaauru que jaolecohane jaunnacha aitoha Cana Coaunera. Coatiha aihei. Canuhetonaine Isaraelita neeun, Abaraaun ichoala Beenjamiin lauri caje nefoeratenaa nichaaunne jaun.

²Inoaenlu caje coaauneeinte rai cachaneein neeuruha Isaraelitacurune coina ranajaain nelu Cana Coaunera. Nii jaun coatiha ena acaauru que jaolecohin nihei. Tana rai Quiricha inoaensi cuhane Isaraelitacuru que:

³“Cana Coaunera, ichei profetacuru sohin jaohinte ichei rorihuru- altar ranuusiin itajeeure. Leinjiin canuhachane jaiti ichaaojoeeun. Canune maajeeinte inae sohin jaonaa jerecure,” naain Cana Coaunera bajaa Irihasine laenanohineein nihane coitucuhichene.

⁴Nete niritohane jana: “Inae acaauru chosi Baal coroajelanaala, caainsi oaraancaneein nenacaauru cachaauru jelai tihanu canu cachanu que,” naain tonorae Cana Coaunera.

⁵Nii rijijieein techu, ena coroatajajeeincha neeure Isaraelitacuru nichaanune cautecuru, cairichaaojoaauruhane jaun acaauru belaiha janijiin ranajaa Cana Coaunerane jaun.

⁶Nitohaneein acaauru belaiha acaauru raa Cana Coaunerane jaun, coatiha rai caohacha ichacuruhane coreniha ranajaain nihei Cana Coaunera. Caohacha ichacuruhane coreniha ranojoinecuruhane, coatiha chanerihei cana belaitohane jaan cana rai Cana Coauneraacha tei.

⁷Nii jaunte nirijieein rai suujua letonohacha ichajeein nichotenaa coaaucuruhane jaun, nichoteeurenereein Isaraelitacuru. Nete laen janijiin Cana Coaunera ranojoineein nenacaauru nichoteeurureein. Jana leeochaaurute suujua letonohacha ichajeein neeuruhane jaun nichotenaa nainecurene.

⁸Cana Coaunera Quiricha cuhane:“Cana Coaunerateniicha ichai coitucunaanainecurenihane coina ichae.Nii jaunte enanetojoeeincha coitucunaa nainelanaala neeure,nechu cha coarana nainecurenihane jaan queacaauru nota teein,cha aonana nainecurenihane jaan queacaauru irichotihane jaun,” naain laenanohineein nihane rijijieeinte aihure.

⁹Rabiri netonai techu:“Ita taojiaain lenone jaain,lenonecuruhane jaan baaso ichaainosa que nesarucuruhane jaaneein neeinetecaseteco coaracurumiin.

¹⁰Acaauru nota nihanatiin conoeneeinete,cha coarana nainelanaalabaaso ichaain neeuruhane,chabana satonohelanaalacaseteco coaracurumiin,” naain aitelu. Nichoteeuruha Jorionihechurune jaan

¹¹Canune aitoon. Nitohaneein baaso ichaain inae casetecanohineein neeuruhane jaunacha, inae caohachanainejeein jaoleneein neeuruha Jorioocuru. Aihei, coatiha caohacha nainejeein jaoleneein neeuruhi. Nenacaaen tejian erenaa tonoraaureniha Jorioocurune aina cuaain, inae ichoteretenojoineein neeurureein Jorioniheichuru netonai. Nitohaneein inae ichoteratenojoineein neeuruhane coaracuruhane banate, acaauru que necoelaihurureein Isaraelita nichaaunne laurichuru.

¹²Aihane jaun baaso ichaain caseteco coaracuruha Jorioocurune, Cana Coaunera coitucuelanaala nenacaauru Jorioniheichuru rai caohacha ichaa aihuruhane jaan cajete, jataain nii amurijiriin caohacha icharichaain, inae nacoaunneein Jorioocuru raane bana Cana Coaunerane coitucuhacache.

¹³Nena laen canu, inara Jorionelanaala neiniquichene rai erenaa jereeun coitucuhichene coina. Nii coinate inara Jorionelanaala neiniquichene rene caletoaain nelu Cana Coaunera. Nii jaunna jataain inara aina neein, jataain corajeein canu amihaneeon ichana jereeun,

¹⁴inara que necoelaain, canu foeratera caje nenacaauru tabaauru netonai nichotenaa nainecuruhane coina.

¹⁵Nii ranojoinelanaala neeuruha Jorioocurune coreenraniha, inae Cana Coaunera que nejeratenaa rijijieein neeuru caje, ranojoieein Cana Coaunera aina raotojoeein neeuruha Jorioniheichurune jaunte, nii amurijiriin ranojoineein nenaa nainecure Jorioocuru. Nii jaunte ohin nitaje rai neeuru caje inae nacoauneein ichaohin sanaacharanejeein nenaa que ichaaore.

¹⁶Coaracuche nachuhinti, coliha caje ichoaichaniha ichanohi faan, jelai teein Cana Coaunera que banijiaain nihane jaun, satiin nii coliha netonai que banijiaineein nihane. Nii rijijieein techu leinjiin enuha cojoaisi Cana Coaunera que banijiaain nihane, rai nunecuru netonai que banijiaineein ne.

¹⁷Charijieein teeinti toroonjoan nujuan sauriin cuhane limoon uune temuhacane, rai nujuan que nujuaain nenaa rijijieein inacae nii limoon. Nii rijijieein techu, inara Jorioniheichuru nequichene nii limoon uune rijijieein neeichene jana, Joriocuru nii inara nujuan toroonjoan nujuan rijijieein neeure. Nitohaneeinte nii toroonjoan uune sauhin jaohin, inara Jorioniheichuru nequichene nii limoon uune rijijieein nii toroonjoan nujuan necuruha nii Joriocurune jaun, acaauru que temuratenojoineein neeiche.

¹⁸Aihane jaun jiaonriha uune sauhin jaonojoineein nenaa coreenraneein neeine jaun, nii uune esineneein neinichaanune amurijiriin nenaa coauhin nihache. Jiaonriha rai nujuan esine neein neinichaanune cuhane teein temunojoineein neeichene baitiquichene.

¹⁹Nete, “Aiha niqui. Nete nii jauriaanejeein uune neein nenacaauru sauhi jaohin, canu temuurelu coreenraniha,” nariquiin.

²⁰Nete esenetaenihacaanune jaun, sauhin jaonojoin rijijieein nihacaanune jana, inara esenetaaichene jaun canacaanu coreenraniha ranojoineein neeiche. Aihane jaun jiaonriha niique necohasitaain neeichene. Necohasitanaa coacuelanaala casiin neeichenete caohachae.

²¹Nii, rai nune esineneein nihacaanune saijieein jaonojoineein nihacaanulune jaun techu nii amurijiriin inara que suujua acatena nainenereein baaso ichaquichene Cana Coaunera.

²²Aonacuche. Jataainte caohachaneje Cana Coaunera. Nete laen suujua letonohacha ichaa cachane abaantaene. Nitohaneein naitoonjoa esenetaauruhi casetecaa natiinte inara raain nelu. Nete laen inara belaiha inara raain nihalune rijijieein ichaohichene caohachae, inara netonai sauhin jaonojoineein neeichene coataa.

²³Jorionichaanune netonaite, esenetaenihacaanune jianeein inae nacoauneein esenetaacaanune, jelaiha nune que tenojoinerichaanuhi, niicha ichana nainei ichaain, jelaiha canacaanu temurichaain Cana Coaunerane jaun.

²⁴Coaracuche nachuhinti inara Jorionelanaala neiniquichene, limoon uune rijijieein neeichene saijieein temunojoineein neeiche, nii toroonjoan uune esine neein neinichaanune coreenraniha tenojoineein ne. Nii jaun techu Jorionichaanune inara amurijiriin nacoauneein jelaiha nii rai nujua esine que teein temunojoineein nenaa nainerichaanuhi. Satononiha ichoteratenojoineein neeururichaain Isaraelitacurune

²⁵Canejeraauru, Cana Coauneracha ichaneni asinojoineein nenaa coitucuhichenena jereeun, nabana cha coitucuera niha nocoetiin neeichene coataa. Isaraelitacurute baaso ichacuruhane jaun, Cana Coaunera que nejeratenaaneein jaoleneein neeurelu, satiin Isaraelitanelanaala nenacaauru netonai ranojoineein neeuruhane que tiaaojoaain.

²⁶Inae satiin ranojoineein neeuruha Isaraelitanelanaala nenacaaurune janate, satiin ichoteratenojoiniha cuurureein Isaraelitacuru. Cana Coaunera Quiricha cuhane:“Sioon jelai cajete ureeinjianacoon cacha mitaeranu.Baaso ichajeein niha Jacobone cajete,nii baaso rocoreein caje.

²⁷Nitohaneeinneacaauru aina caitoonjoancanuhacha ichaneni ichareeuni,inae acaauru osa caje jianacoon tenajaanune bana,” naain nii coina ne laenanohineein.

²⁸Nete beratenojoi niha ichoteratenojoineein neeururichaain cachaaurune aina cuaain, Cana Coaunera que nejeratenaa neein neeure Jorioocuru, inara ichoaichaniha coitucunaa nainequichene teranu que. Nete enanetojoeein cairichaaojoaain acaauru coarae Cana Coaunera, acaauru foerateracuru janijiin raalune jaun.

²⁹Coatiha cana rai niicha teeni ruluhin nihei Cana Coaunera. Niheichu janijiin niicha raauri que jaoleconaa nainihei.

³⁰Jauriaalute inara netonai Cana Coaunera ere esenetaain tonoraelanaala neeichelu. Nete nere tonorana jerecureniha Jorioocurune jaun, inae enene cairichaaojoaain inara coarae Cana Coaunera.

³¹Nii jauriaalu nere esenetaain tonoraelanaala neeichelune rijijieeinte, enene nere esenetaain tonoraelanaala neeure Jorioocuru, nechu cairichaaojoaain inara coaraain nihalune rijijieein, ena cairichaaojoaain acaauru netonai coaraa Cana Coaunerane coina.

³²Cana Coaunerate nitohaneein ita rijijieein nere tonoraeniha cachane coina ichae, ita rijijieein jiniiquiin cairichaaojoaain cacha coaraain nihane coina.

³³Jataainte banejelanaala caohacha icharaneein, itolere ichara neein, cha coitucueraneein ne Cana Coaunera. Coatiha nihei chuni, niicha coacui aina niicha ichaneni coitucuhin beranu.

³⁴Nii jaun, “Cha Cana Coaunera suujua coitucue. Cha sujuatenaa nainere.

³⁵Cha rai cha teein nelu rai cainaain nihane coina,”

³⁶Itolerete Cana Coaunera caje unaa neein ne, niicha coaaunanojoineein nihane jaun. Nii jaunte satiin itolere raineein neeure.Itolere bana coroaenohineein neeine Cana Coaunera. Nitohanemiin.