Read Urarina Timoteo Rai Leinjiin 4 Bible Online

Timoteo Rai Leinjiin 4 - Urarina bible

Timoteo Rai Leinjiin 4

¹Rijieeori banate Cana Coaunera ere jianeein ratiriin casaje que acaauru relaain, acaauru coritaa osaaonaaurune esenetaain tonoraa cuurureein tabaauru.

²Nitohaneeinte necoejenaa charaauru casaje cachaauru ere tonoraa cuurureein, niritiinte be rauhijiriin Cana Coaunera Suujue.

³Nitohaneeite ene ranaa jeriha cachane caohatiha cuurureein. Chaentechu nelanajanaa jeriha ene ne caohatiha cuurureein. Chaentechu joaenreein lenone que lenoniha cachane caohatiha cuurureein. Raotojoeein coroajeein Cana Coaunera bajaain que neleeonijiaain niha Cana Coaunera Ere coitucuhin esenetaaurera cachaaurune coina, itolere lenone coaaunaain niha Cana Coaunera natiinte, que neleeonijiaain niha cachane caohatiha cuurureein.

⁴Itolere Cana Coauneraacha coaaunanohinte caohachae. Nii jaun nainihei chaque irihacane. Nitohanihana jaunte, coroajeein Cana Coaunera bajaain joaaereein raacachene caohachae.

⁵Nitohaneein biha Cana Coaunera Erena jaunte caohachae. Chaenchu lenonichaachene ajiniha bajaacachenete caohachae. Jesocurisito letono esine

⁶Caa caitoonjoan que cana nejeraauru- Cana Coaunera cachaauru relaainete, esinaaen rauhijiriin Jesocurisito letono esineneein niha curiquiin. Charijieein teeinti, lenonihane baiha raotojoeein nelararajiae cacha. Nii rijijieeinte Cana Coaunera ere coitucuhine laraajiin niha curiquiin, nii caohati nerelana najaan coitucuhin tonoraaine.

⁷Aihana jaun, casaje tonoraelanaala Cana Coauneraacha jerenohincha ichajeeincha neeu.

⁸Najaicharoaa cana jaberocone coinate nelate cojoanoonetojoeein necoatijiaacane. Nii amuritoheriinte nelate itolere que rauhijiriin Cana Coaunera Ere tonoraacachene.

⁹Esinaaena aitoon, aihane jaun esenetaaichenete ne.

¹⁰Acaihanejein Cana Coaunera esenetaacachena jaunte cana batohin, cana necoeje chanuuruhane niha natiin, neeunaain mainajeein amihanihacache. Satiin cachate coroatajane Cana Coaunera. Jana esinaen rauhijiriin esenetaauruhanete, nii esenetaaurera coroatajaniha cureein, leeochaauru coroatajanihane amuritoheriin.

¹¹Caritiin suujuatenajaain relanajaau.

¹²Enamanaa neeina jaun, ii batohin, ii necoeje chanuuruhane niha natiin, coa tonoraa. Aihana jaun, atiin caohacha ichaain neeute, ii coaraain ichejijieein caohachaain neeuruhine Cana Coaunera esenetaaurera. Caohatiin ereerejeein, caohatiin ii ichao que ichaohin, Cana Coaunera, leeochaauru, naaonjoaainunri belaain, Cana Coaunera Ere esenetaain, ishuujua coaraain, naaonjoaain neeu atiin.

¹³Turuhanune reeintiaain, ita taojiaa cachaaurune jana Cana Coaunera Ere coaraain itolere bana ereretaau. Chaenchu Cana Coaunera coreniha cana nejeraauru suujuateein relanajaau.

¹⁴Jiaonriha ichei Cana Coauneraacha tei amihanenaa jianeeine. Acaauru letoaa Cana Coaunera Suujuene jaunte, ichouturi ichoae biji teein, ii cocoainaaunre Cana Coaunera coitucuurera ichauhenaauru, nii niicha tei amihanenaa nainaaine coina. Aihana jaun, coa jianiha.

¹⁵Atiin itolere bana ii amihaneeon chaaechajeein neeute, taeneein naurutanaurutaain cuujiha ii amihaneeonne coaracurumiin satiin cachaauru.

¹⁶Aonaau. Caohatiin ishuujua coaraain necohalajiin neein rauhijiriin cachaauru relaau laraajiin. Nitohaneein ichaainete, nichoteein jianacoo nerequiin ii ere aohanraauru aina.