Read Urarina Ebereeocuru Rai 1 Bible Online

Ebereeocuru Rai 1 - Urarina bible

Ebereeocuru Rai 1

¹Inoaelu jetaote nere bera inoaesihuru- profetacuru aina cuaain araaisaain cana inoaensihuru rai ere Cana Coaunera, ecoetacaaeneein mituhelanaala, taba que acaauru sinihu, taba que letonocuru anjeraauru letoae, acaauru rai ecocohin beeuruhane coina, naaonjoaain.

²Nete laen inae enene Calaohi que nere berate Cana Coaunera, Cana Coaunera nihane coitucuhacache itolereneeinne coina. Nii rai Calaohi aina cuaainte, itolere cana rai chauratane, dede, itolere cautenu rijihuru, itolere cana janonaa, naaonjoainuri coaaunaain niichuru Curuaanaa neein telu Cana Coaunera.

³Nihei chunei cacha niqui Cana Coaunera coaraai. Nete caje uhin canaacaanu rene ecooca rai Calaohine jaun, canaacaanu rohan turuaain coaracaanune jaun, “Naaonjoaan Cana Coaunera,” naain coitucuhacaanu, jeelai Cana Coaunera tocohaneein necaohachaain nichao que ichaohana jaun. Acate Cana Coaunera Calaohineein itolere sirichaneein coaaraneein ne. Acate Cana Coaunera Calaohineein caa chauratane que ohelu, jianacoon osa caje cana mitaeranu que. Nitohaneeinte inae osa caje cana mitaeranu que ohane baiha, rai Inaca Cana Coaunera raotono nichajai que rori- trono ichoae nelauriaa cuelu. Anjeraauru amurijiriinte cocoainanojoineein ne Cana Coaunera Calaohi.

⁴Jataain rai letonocuru anjeraauru cocoainaane amurijiriinte, rai Calaohi cocoainaelu Cana Coaunera, acaauru amurijiriin nihane coina.

⁵Nitohanihane jaun, nihei chuni letono anjera rai:“Iite cacalabineeincanuhacha jereineeincanuhacha teineeinnenaaneeicha,” naain irihei Cana Coaunera. Niheichu chuni letono anjera que:“Leinjiin acaachacanu calaohineein nihane janana,Canu, leinjiininaca neein nereeunicha,” naain irihei Cana Coaunera.

⁶Caa chauratane que nenacaauru cachaauru que, leinjiin acaacha rai calaohineein nihane coitucueratihane coinate laen:“Quere tonoraaincanu coroaaequichene rijijieein,jerichanejeein nere tonoraaincoroaaecuche satiin,” nae, rai letonocuru anjeraauru rai, Cana Coaunera.

⁷Nii rai letonocuru anjeraauru quete laen:“Canu letonocuru- anjeraaurute laen aiha cujuanane rijijieein, usi rijijieeinnaaonjoaain canuhacha jerei icharaneein neeurureein,” nae Cana Coaunera.

⁸Jana rai Calaohi quete laen:“Chabana sarinaainitolere Curuaanaa neein-itolere Coaunera neein neeine.Chaen techuchabana satonoenereeincaohacha ichaain neeine.

⁹Nii rijijieein techucaohacha nejesina icharacuruaanaa neein neeina jaun,esinae rauhijiriinbaaso ichaain nenacaauru aina nejerateein,caohacha icharaauru belairiquiin.Nii coinaneCanu, Itolere Coaunera neeinii Coauneranichaaunneii teein neeun,ii, jataainleeochaauru amuritoheriinraotojoeein rachoojoeeinneeine coina,” nae Cana Coaunera.

¹⁰Chaen techu:“Ii canuhacha teiCuruaanaa neeinete,jauriaanejeeinnunuhe caje coaauneein nihacana rai chauratanene coinaaitiin dede coaaunaailu.

¹¹Satiin iicha coaaunanojoite sareein.Jana iite laen chabana nitajenereeini.

¹²Inae ecu tihane banate,siriteein saa cajionene jaohin,enachasine que coreein jianaa rijijieein,janonaa coreriquiin.Nete laen,ii chabana satonoelanaalaichaoriquiin,” naelu rai Calaohi rai Cana Coaunera.

¹³Nii jaun coatiha chuni, rai letono anjera rai:“Chajaautecaraaotono nichajai que nelaauriaena,ii tijia asaaeiniha nejeratenacaauruamuritiin tee te coaraaicha,” naailu Cana Coaunera. Chabana nii Calaohi que aitohane rijijieein letono anjeraauru que irihei.

¹⁴Nechu raujiaain ichoteratenojoineein nerichaacheeinne rai, cha beraneeichate suujueneein Cana Coaunera tenojoineein neeure rai anjeraauru.