Read Urarina Ebereeocuru Rai 3 Bible Online

Ebereeocuru Rai 3 - Urarina bible

Ebereeocuru Rai 3

¹Canejeraauru, aihane jaun Cana Coaunera ranojoineein, inae rai cachaneein neeichene jaun, niicha icharatenohi icharaanu que niicha tei- Jesocurisitohacha que coaaucuche. Nariha jataain coreniha chabana satonoelanaala esenetaacachene jaun.

²Jerihane rijijieein nere tonoraain niha Jesocurisitone jaunte, niicha icharatei icharaanu que cocoainaain nelu Cana Coaunera. Nii rijijieein techu, Cana Coaunera cachaneein nenacaauru aina, niicha icharatenohi icharaneein nelu Moisesa.

³Charijieein teeinti, niicha jai loreri amurijiriin jataain nelateineein ne loreri ichara, nii rijijieeinte, jataain Moisesa amurijiriin nelateineein nelu Jesocurisito.

⁴Itolere lorerite, niha icharane jaun neein naaonjoaen. Nete laen Cana Coaunera coaaunaane jaun, neein naaonjoaen itolere.

⁵Nii rijijieein techu, rai cachaneein nenacaauru rai Cana Coauneraacha icharatei icharaneein nihane jaun, raujiaain nota que coaraain, que niicha beratei beraneein nelu Moisesa.

⁶Nete laen rai Calaohi Jesocurisito, cana rai cachaneein- rai loreri rijijieein nihacachene amurijiriin, cocoainaain cana inana neein telu. Nii jaunte, rai loreri rijijieein nerichaacheein, esinae rauhijiriin jerihane rijijieein neein, chabana cohajihacachene coiinteein jianelanaala canaacha cohajei cohajihacachene. Acaauru que Cana Coauneraacha banihatihu turuurenerichaain rai cachaauru tabaaurune

⁷Nitohanihane jaun, rai Quiricha Inoaensi cuhane:“Enene cojoanonaacuhane inara rai niicha jereibiha Cana Coaunerane,

⁸jiaonrihainara suujua aohana jerelanaala,aihuruhalu nere tonoraelanaala,nechu acaauru casetecaaCana Coaunerane cojuhin coaraacacha areroo ichatane jananerijijieein nihache.

⁹Ecutejenachoonca jaanacaneeinmainajeriin acaauru notajaain,acaauru coroatajanichaaunne saijieein,acaauru casetacaanune coujuhaquere tonoraaurenelu- inara foerateracuru.

¹⁰Nii jaunna,nii inara foerateracuru aina obajeein:‘Nechu itolere banajoaenreein rai suujua cuaauruhane jaunte,acaauru quecanuhacha coitucueratenaajerei coitucunaa jerecurene.’ naain:

¹¹Aihane jaun,coatiha acaauru que banihateeincanuhacha rucujueihuturuururinaain,” naain biha Cana Coaunera Suujuene jaun ne laenanohineein.

¹²Aihane jaun canejeraauru, le cacha nequichene- inara netonai nabana cana rai Cana Coaunera beratei esenetaain neeichene jianequichene coataa, que nainaain necohalajiin ichaaoche.

¹³Nitohaneein nenaa coacuelanaala, jianeein lecacha nequichene jiniiquiin ita suujua lararajiaain neeuche: “Enene cojoanonaa,” naain aitoha Cana Coaunera Quiricha cuhanena jaan que turusihane ajiniha. Nabana inara tabaauru saruhin niha osane, rijitojoeein chatohanai ichaquichene, inara netonai canaacha esenetai esenetaelanaala naitoonjoan tonoraeneeichene coataa.

¹⁴Nitohanihane jaun, esinae rauhijiriin Jesocurisito aina nenaa jerichaachene, nii esenetaacachene bana canaacha cohajei que turuhane reeintiaain esenetaacachenete ne.

¹⁵Nii coinate:“Enene cojoanonaa cuhaneinara rai niicha jerei bihaCana Coaunerane,jiaonrihainara suujua aohana jerelanaala,aihuruhalunere tonoraelanaalanenacaaurulune rijijieein nihache.” nae Nere Inoaesi.

¹⁶“Charijihuru Cana Coaunera ere aonacuruhane saijieein nii baiha nere tonorana jerecurenelu,” naaichena. Acaaurute, satiin Egipto batane caje Moisesaacha rocoorinelu.

¹⁷Nii jeelaihuru que techu, nitohaneein nere tonoracurenihane jaun, acaauru que nejerateein acaauru coroatajanihane jianiha jenachoonca jaanacaneein Cana Coaunerane jaun, ichataneu cacha areroo satiin ohacoaaurelu.

¹⁸Chaen techu nii jelaihuru, rai nitohaneein nere tonoracurenihane jaun, esinae rauhijiriin acaauru que banihateein niicha rucujuihu enoorenerichaaine que aitelu Cana Coaunera.

¹⁹Nii jaunte, esenetacurenihane coreniha nii acaauru que banihateein niicha rucujuihu turuurenerichaaine coitucuhacache raotojoeein.