Read Usan Mak 4 Bible Online

Mak 4 - Usan bible

Mak 4

¹Yisas qob eng mom ende qamb ugab ne bo ya tai Galili end is qanam big munon qob wurinob qamb igama munon yurau sig irou yar wo mom opurmari ne wo bo tabint is mugenderi ende igoai. Igama ne munon yurau eng ya gabut end igamari wo qob mit big wurinob qamb igoai. Ende wurinob qamb isi yarab ne qob ger wurinob qamar:

³“Munon ger wit qur bis wonou man end bunumban ariramb qamb isorei.

⁴Bis arirama ne wit qur qei munon tap qenen qib igourt end is diban igamari ne morogan der nubriamirei.

⁵Ne qei ai nomon qer diban end is igo qaur diamir eng ai gor gurum ue end diab qaratariamirei.

⁶Qaratari igamari worom asi ibegea durun um me isau end gegeretriamirei.

⁷Ne qei is misugan asin qurnob igo morogot diamir eng misugan wuriiribiga musub me isari git abau.

⁸Ne qur qei arirama is ai uberet dereriamor eng mom musub diab ne git baab ne aritamirei. Aritamir eng git qei 30-ende ne qei 60 qei bo 100-ende.”

⁹Ende qamb wogub ne qamar: “An iruges nob qob quraum eng mom musub igar,” ende qamarei. 4:10-12 Yisas misir maigas igub mit big qamarei

¹⁰Ende qamara wogub ne munon yurau aib qoari ne munon 12-eng nob munon ar qei nob igo ne Yisas mit big qamar eng bo dibesi qamara igun qamb qebiamirei.

¹¹Ende qebi qamarari Yisas taui qamar: “Qenu qoan wonou bibis biginer end qob qi igoar eng qo animbiga gaumon eng. A munon yurau ar song-song wuri mit big qob qas qemerine igubour.

¹²Eng mit big qemerin eng munon Aisaia qoan Qenu qob qamara gumater eng gas ende gari:wuri git igub asiomunor eng mi git ger me gunorei. Ne gor qob igunor eng qanam sir me imbigunorei. Ende ebet wuri Qenu bibis bigib qamar end me wot oabigari Qenu wonou wurisiara qomon boru ten igour.” 4:13-20 Yisas wit qur end dibes qamarei

¹³Qamb qamar: “An mit big quraum eng me imbigoumon ne? Ende at ye mit big irou qamb igoum eng maigas imbiguboumon?

¹⁴Munon wit qur ariramor eng Qenu wonou qob eng.

¹⁵Wit qur qei is ai tap qenent igo eng munon qob igari ne bo Satan wurit isub qob eng ba ousia ne siningot wogub igour eng.

¹⁶Ne wit qur qei ai nomon qer diban end isub qaur di igo eng, munon qob igub qand ba misirt big mismisir igour.

¹⁷Qaur ende di durun der ai baab isiner eng ue end gegereteriba. Ende gas ende munon qob igub misirt igub igoriner eng bo munon qei Qenu qob me wuritrab igoriner eng yar qob qei nob qamarari igub wo bo qand qob siningot wegiba.

¹⁸Ne munon qei misir, wit qur is misugan asin qur nob igo morogot qaur di igo gas ende eng munon qob igub misirt igoriner eng, mai, wonou see igoriner end sig misir igub a mi qebebi baib qamb igub ebet igo eng wit qaur dia ne mi irbiga git ubersi me arit igo gas ende.

²⁰A munon Qenu qob igub misirt big taut igour eng wit qur qei is ai uberet der qaur di git baret ne arit igo gas ende. Git eng qei 30 ne qei 60 ne bo qei 100-ende.” 4:21-25 Urut begen me wabi igoun

²¹Yisas qob eng mom imusi qamb isub igo ne qamar: “Munon qei ai itum gab abari munon ger urut uruguni begesitarib qamb mai uruguni ba di wabi igoriba qiyo? Ue, ende me ebinerei, wo munon gugum begen gab diarar qamb ai deberit naget bemenimba.”

²²Ende qamb ne qamar: “Munon qomon uber qiyo boru ebetri igour eng gagar see waber igour eng qen geret mi eng gagar dibenterimbour. Ne qob gor waber igour eng see me imbigoumon eng gor dibentra guboumon.”

²³Ende qamb ne qamar: “An iruges nob qob quraum eng mom musub igar,” ende qamarei.

²⁴Ne bo wurinob qamar: “Qob aninob qemerine igoumon eng mom igub igoarar. An qob igub qei siningot wogunon eng Qenu animbag ne taui ende ansieriba. An qob musub igub taut igorunon eng gor taui ne bo ui ar tauimba.

²⁵Munon ger Qenu qob igub taut qoyamet igo eng wonou misir bubun imusia mi qenen imbig igoriba, a munon qob eng siningot wogub me qoyameterin qamb gab ieriner eng misir qoan eng Qenu wonou aba mom nasi wegiba,” ende qamarei. 4:26-29 Mit big qob, mi qur qaur di igo

²⁶Yisas mit big qamar eng mom imusi qamb igoai. Ne bo ger qamar: “Qenu wonou bibis eng ete gas: Munon ger mi qur ger bis wonou man end bunumban ariramorei.

²⁷Arir wogub wo di inab ne woromt ar qib ende at igoai. Ende at qib igama igoi nam qur wonou qaur di aib burab isari ende at igoar eng qanam eng sir ue.

²⁹Ai man goan uber end ariramor end uber di isari ne git qarib yar ebeter eng igoi mom arira gab ne isub baurei,” ende qamarei. 4:30-32 Mit big qob, Nam mastet qur

³⁰Yisas bo wuri qebi qamar: “Qenu wonou bibis biginer eng in meimit big qomorune is qeemben buriba?”

³¹Ende qamb ne wo nam qur ger ‘mastet’ qamb igour ende big qamar: “Nam qur eng sig qamaaman, nam qur gugum ibag igoun eng wuritanamima, wo sig qamagast. Nam qur eng munon ger ba goaneterei.

³²Goaneterei igama qaur diab ir aib burer eng nam gugum wuritanamima. Qoag war eng uben aib-aib, ende aba ne morogoan wuri eng gab qenen yar end bugab ne mon ubet ne inau neri igour,” ende qamarei. 4:33,34 Yisas mit big qas qamarei

³³Yisas mit big qamar eng wonou misirt ger me qamarau. Munon misir igoar eng taut ne mit big end qas wurinob qamb qib igoai, dibes ger me wurinob qamarau. Wonou munon yurau wuriimbig qib igoar eng mit big qamb eng qanam qi wuriimbig wurinob qib igoai. 4:35-41 Yisas sani-sani omboopuramorei

³⁵Eng ende dibes wurinob qamb wogub worom nerima ne bo wurinob qamar: “Wagari ya tai e purab ig iro isun,” ende wurinob qamb wogub munon yurau qei eng end wuriwogub tabin ger Yisas is igoar end wonou wuriimbig qib igoar eng wurinob isumirei. Isari ne tabin qei gor wurinob isub igurei.

³⁷Ende isub igamari ne moon sig aib diab ya orogot mor arir ne tabin ba biigisimb qamb ebeterei.

³⁸Qen end Yisas wo tabin sui umot naat inerei igama ne wonou yurau eng is meni qamamir: “Ei, moon aib di tabin biigisimb ebet igo e, meimet qamb mom naat inan? Init misir me igan?”

³⁹Ende qamarari Yisas der bugab moon aib eng omboopur qamar: “Qi wog”, ende qamara ne moon wogub ya orogot mor arir igoar eng gor wagerei.

⁴⁰Ende at wogub munon eng wurinob qamar: “An meimet qamb yarimoumon? An ye mom yiimbigoumon quraum eng bo sabar yari igoumon?”

⁴¹Ende wurinob qamara ne wuri der moon aib di ya bures arir ende at igoar eng taisi qamara waga gab borusi qesi igara wurinou qob-qob qamamir: “Munon eng maigas igo sani-sani di ya bures arir igemerei eng taisia waga a?” ende qamamirei.