Read Usan Luk 1 Bible Online

Luk 1 - Usan bible

Luk 1

¹Io Tiopilus in munon qei Yisas nob qib mi irou ebetri igoar end munon yamangar imbigar qamb warigesi gumatemirei. Eng munon qei magqurt mi gamir eng qibi munai ginam-ginam qob uber qabarit wurinob qamb igour eng gari.

²(null)

³End ne ye gor qob qamarari igub ne bo mi gugum musub imbigib qamb munon qei wuriqebi gamei. Qebimine Qenu mi qanam big ebeteriamor eng isi yarab see ebet igo eng yenob dibes qamarari igub qeemben gab ne mi gugum taut gumotoum eng.

⁴Ye eng nonob quraum eng qob gigit nonob qamarari igon eng apand ar. 1:5-25 Enger Yon unor bainer end Sekaraia nob qamarei

⁵Qen end munon ger unum Herot wo Yuda yurau oroar igoai. Igama munon Pris ger igoar eng unum Sekaraia. Munon pris wurit qamb igour eng Qenu munai qoat mian iset bigetet igour. Sekaraia wonou ur namungur unum eng Abiya, wonou ubeni unum Elisabet, wo gor pris wurinou yurau tumbigi end gari.

⁶Ombur qoregen ende igo Qenut qas igub wonou qomon toat ende at igurei.

⁷Qen end wuri wau ger ue, ar igoi wogub isigi buremirei.

⁸Qen geret Sekaraia wonou yurau Qenu sarau betet igamari wo gor sarau eng ebet igoai.

⁹Ende at igama wo mom pris sarau eng apand eb qamb maribigari is munai tumbigi qau end isub Qenut mi qogom uber mutet wara iroa ig qamb. Ende abari wo der Munon aib munai Tempel end isorei.

¹⁰Qen eng mi qogom uber isiau qen, end ne munon irou yar ag end igo Qenut qebi qamb igurei.

¹¹Igamari Sekaraia wo mor igo mi qogom iset igama Munon aib wonou enger ger der mi isia oab igoart ig uberegent wes end naget igoai.

¹²Igama Sekaraia wo gab qiet yariamorei.

¹³Yarima enger der Sekaraia nob qamar: “Sekaraia, ne me yariom, ne Qenut qebi qamb igoan eng igub igo. End ne nabeni Elisabet wau ger baiba, baia unum Yon ende qem.

¹⁴Ne wau eng gab borusi mom oau uberet mismisiroa munon ar gor wot mismisirubour.

¹⁵Wo Munon aib wonou munon baraitari igoar qamb maribigiba. Maribiga igo wain ya qiyo ya uter me ninerei. Unor qurag igama ne Igomurur qau wot igoriba.

¹⁶Wo Isrel munon yamangar irou oromar qamara igub wurinou qomon boru mogirt wab wogub Munon aib Qenu toat igorubour.

¹⁷Wo qoan Qenu Igomurur qau wonou qob gigit qamarau munon Elaiya wot isa nonoguret end mi sigub igoa gas ende Yon gor ende at Munon aib tap gigit imotet isiba. Wo qob qemeriner qen end Yuda munon qoan wurinou qanam erogori me qit igub igamau eng bo qanam musub imbig bo qibanamsi igorubour. A munon qei suai qob qamb igorunor eng wurinob qamara igub munon qoregen wurinou qomon taut igorubour. Ende at ne Munon aib deriner end wot igub girinet tug igorubour.”

¹⁸Ende qamara Sekaraia der enger nob qamar: “Qob eng ye maigas at imbig apand qemeribam? Ye mom isigi ne yabeni gor isigi end quraum.”

¹⁹Ende qamara enger der qamar: “Ye unum Gabriel, ye Qenu menmant end igoum end yiimurima qob uber eng nonob qemerib qamb durumei.

²⁰Ne ye qob apand mi ende net dieriba eng der nonob qemerine ne me oabigan. End ne, ne qob bo me qemerinenei, mindiram tuumot igama igoi ye qob eng gagar nonob quraum qen eng yara giban.”

²¹Munon ag igour eng Sekaraia mor isuor eng qand me dara gab, “eng meimi ebet igo” ende qamb igurei.

²²Ende qamb igamari darab qob ininob qamara igun qamb gamir eng ue. Ubent qas mi wuriimbig ende aba gab eng mom inig mi boru ger gab wogub der aba qamb wugumirei.

²³Ende at wogub Sekaraia wonou sarau tatau tempel eng igoar eng mom at ugab wogub ginamt isorei.

²⁴Is igama qen qei ubura ubeni Elisabet qugurau igo bo ag der me qib igamau. Mor sir igama inaun 5-ende umorei.

²⁵Ende aba Elisabet qamar: “Ye qenen ar igo qinining qib igimine see qas Munon Aib yet igub yesia qurag igoum end song qib igoribam,” ende qamarei. (Eng Yuda wurinou qomon eng yamangar wau me baia gab eng yamangar eng boru wot qamb igour end qamarei.) 1:26-38 Enger Maria Yisas bainer end nob qamarei

²⁶Elisabet qugurau igama inaun bo gari uma ne qoan 5-ende umor eng nob 6-ende bura ne Qenu enger Gabriel eng bo imurima ai Galili end ginam ger Nasaret end isorei.

²⁷Yamangar yorou ger munon Yosep bai qamb wot maribigumirei igoai. Yamangar eng ur qoan irgeren eng Debit wonou tumbigi, unum eng Maria.

²⁸Enger wot der qamar: “Io, ne oau uberet igoar. Munon aib net igub ne nonogursi igo.”

²⁹Ende qamara Maria enger qob eng igub oau quguraget wonou misirt, “qob eng qanam maigas ana?” ende qamb igoai.

³⁰Ende at igama enger bo nob qamar: “Maria ne misir qebebi igub oau me quguraget igoar. Qenu nenet uberet igo.

³¹End ne, ne qugurau igo wau ger baiban. Baub unum Yisas ende qem.

³²Wo gari munon gugum wot Qenu wau ten ende wot qamb igorubour. Munon Aib Qenu wonou musia wonou ur qoan Debit king igoa gas ende munon gugum oroar igoriba.

³³Igo wo Yekop wonou yurau eng oroar qomon uber wuriimbig ende at wurinou king qenen mom igoriba, me weginerei.”

³⁴Ende nob qamara Maria enger nob qamar: “Ye yorou igoum, maigas mi eng quran eng yet dieriba?”

³⁵Ne enger taui qamar: “Munon Aib Igomurur qau nesieriba. Nesiera Qenu wonou ne nonogursieriba. Nonogursia ne wau qigin nob bainen eng Qenu wonou wau ten ende wot qomorubour.

³⁶Ne eng quran eng bainemendi Elisabet ge. Wo gor sig isigi wau me bainerei ende wot qamb igurei. qamb igour eng see wo qurag igama inaun 6-ende uma.

³⁷End ne in Qenut mi soageni ger ende me ebeiner qi ende qamb bais ger me qomorunei, sig ue ar.”

³⁸Ende qamara Maria qamar: “Ye Qenu wonou sarau yamangar end ne qob quran eng Qenu ende yesieriba.” Ende qamara enger Maria wogub qoorei. 1:39-45 Maria Elisabet gib qamb isorei

³⁹Qoa wogub Maria qand girinet wogub Yudia wurinou ginam ger ai qaurent igoar end irarei.

⁴⁰Irab is Sekaraia munai mor end isub Elisabet garei.

⁴¹Gab aba qurag igoar end wau aruara igorei. Qen end Igomurur qau Elisabet wot isorei.

⁴²Ende aba Elisabet der Maria qugiab nob qamar: “Qenu ne yamangar qei wuritanami ne nonogursi ne nonou wau bainen eng gor nonogursieriba.”

⁴³Qamb qamar: “Wa, yamangar eng wau bainer eng yonou Munon Aib igoriba. End ne maigas ye yamangar ar igimine yegeib qamb yara a?

⁴⁴Ne igan, ne qob ye nob qamb igama igoum eng wau qur erobon e mismisir aruara igoum.

⁴⁵Ne Munon aib nesierib qamb qamar eng wot oabig eng uber igoriban,” Elisabet ende qamarei. 1:46-56 Maria uru warei

⁴⁶Ne Maria qamar:Ye apand Munon Aib wot oabig wot mismisiraum.

⁴⁷

⁴⁸Wo, ye ar wonou sarau yamangar ego wonou uyes yet igub wonomi wes eng yet aba end munon ginam-ginam eng igub yet qomorubour: “yamangar eng Qenu wo siera uber igoai,” ende yet qomorubour. Munon Aib wonou unum sig uber wes ar.

⁴⁹(null)

⁵⁰End munon wot igunor eng wuriubersi ne wurinou wau misinam der isunor tumbigi eng gor ende wurisieriba.

⁵¹Wo sarau borusi beiner eng munon wurinou gab gerenunor eng wuritoar arirama wes-wes qoaubour.

⁵²Wo ende ebet munon uter boru ag e igour eng wuribumaimba. Ende at munon boru munon ue gas igour eng wuriubersieriba.

⁵³Ende at ne munon qunumber qent igorunor eng mani irou werisiba. Ne munon mind irou igorunor eng wurisiara mind ue ar igorubour.

⁵⁴Wonou qob qoan qamb nausier end ininou tonoan wuriubersi igoar eng isi yarab see wonou sarau munon yurau Isrel wuriubersiar eng.

⁵⁵Eng igar, qoan Abraham ubersi igoar eng wonou wau tumbigi-tumbigi eng qenen ende, Maria qob ende qamarei.

⁵⁶Maria Elisabet nob end igama inaun omburgari uma wogub wonou ginamt isorei. 1:57-66 Elisabet Yon baurei

⁵⁷Isa wogub Elisabet wonou wau baiau qen eng gab munonbor wau baurei.

⁵⁸Baia qob toau isa banamori ne munon gugum igub Munon Aib mi wes eng aba gab wot borusi mismisiramirei.

⁵⁹Wau ende ba nob igama inorou gari uma ur goan soopurmeteib qamb aba nob yaremirei. Yarab ne wonou ur unum eng Sekaraia qenimb qamb abari unor der qamar: “Me, unum Yon qomoruboun.”

⁶⁰

⁶¹Ende qamara wurinob qamamir: “Nonou tainori, bainori unum ger ende me igour.”

⁶²Ende at-at wogub is ur quum qamb ubent qas maribig qebiamir: “Ne wau unum eng maisi bigun qamb qenungan?”

⁶³Ende abari gab imbig ne wo wepep goan ger yeisar qamb aba gab ba yar utari, “wau unum eng Yon”, ende qamb guma gab misir qebebi igub igurei.

⁶⁴Qen end Sekaraia mindiram tuumtar eng bo miroa qob musub qamb ne Qenu wot mismisir unumut igoai.

⁶⁵Ende aba qob toau banamori igub yarimari ne tumbigi is Yudia ai qaurent igour ginam eng igub ugamirei.

⁶⁶Munon qob toau isa igumir eng der: “Wa, wau eng barait munon maigas igoriba mi ende aba-a? Munon Aib iitari igoriba abar eng,” ende qamamirei. 1:67-80 Sekaraia miteri qamarei

⁶⁷Ne qen end Qenu Igomurur qau wau ur Sekaraia wot isa Qenu qob qamar:

⁶⁸“Wagari in Isrel ininou Munon aib Qenu unumut igorun. Wo inubersierib darar end.

⁶⁹Wonou sarau munon Debit tumbigi end bo munon aib qeretut nob ger maribiga inubersieriba.

⁷⁰Wo mi eng ebeiner end qoan wonou qob gigit qamarau munon wurinob qamara gumatemir eng.

⁷¹In munon qarau ininob yogub qiyo munon boru-boru ininob agunub igamari innonogursierib qob nausier eng.

⁷²Wo ininou tonoanb wuriubersierib qamar eng. Ende at wonou qi init iyet wager eng.

⁷³Wonou qoan Abrahamt qob gagam mom qamb nausier eng igama toat insierib abar eng.

⁷⁴In munon qaraut yari igumune wo ende inseara bo sarog big igoarar qamb aba.

⁷⁵In igom igoun et qen gugum qomon boru-boru eng mom wot gitab wogub qomon uber eng mom songi sarau booun qamb aba.”

⁷⁶Sekaraia ende qamb wogub wonou waut qamar: “Ne yonou wau, nenet Qenu wonou qob gigit qamarau iitari ende net qomorubour. Ne Munon Aib wo der isiner eng tap gigit imoteiban.

⁷⁷Ne gigit isub wo der isiner end wonou munon qomon boru-boru ebet igour eng mogirt wab wagar qamb wuriimbigiban.

⁷⁸Wo munon wuriubersiau tari ne wo munon mein. End wonou begen eng init imurima deriba.

⁷⁹In munon gugum umun qamb yari igoun eng itum igamau gas ende. End ne wo inimbag tap susu isunor qamb wonou begen eng init begenara tap sarog big igamau end igoruboun, ende qamarei.

⁸⁰Wau eng barai burab ne wonou misirt mi ebeiner eng qeemben gab, ne gor Qenu mom imbig taut igoai. Ende mom nonoguret wogub seger ai qengereng end is igoai. Igoi qen geret Isrel munon yamangar wurit dibentarei.