Read Usan Luk 4 Bible Online

Luk 4 - Usan bible

Luk 4

¹Yon Yisas ende ya obota wogub Igomurur qau wot isub nonogursia bo ya Yordan eng wogub yonam iroa Igomurur qau mot seger ai end isorei.

²Seger ai end is igo qen 40-ende mi me niau, wo ende igama Satan wot diab ur qob wog qamb warigesi nob qamb igoai. Ende ibitiri igama igoi mom borusi minema gab ne Satan Yisas nob qamar: “Ne apand Qenu wau ten igo gab eng nomon e nob qamara mani parau waria nub igoar.”

⁴Ende qamara Yisas nob qamar: “Qob ger ete gumatemirei igo, munon mani qas nub igom me igour.”

⁵Ende qamara Satan bo mot ai qaurent irab mi uber-uber gugum imbig qamar:

⁶“Mi maieng-maieng e gagar gan eng yonou, net wogeteibam, eng ne io qamara gab. A munon ger baib yenob qemeriner eng ye ar wot wegibam.

⁷End ne, ne baib qamb eng yet gamaur wat bugab yet simot ea gab eng mi e gagar gugum nonou mom net wegibam.”

⁸Ende qamara Yisas bo nob qamar: “Qob ger ete gumatemirei igo, Munon aib Qenut qas wot igub sarau baab igoarar.”

⁹Ende qamara Satan bo mot Yerusalem Qenu wonou munai Tempel eng qirer sig erer qau qitend bir nagsi ne qamar:Io, Qenu qob gumatemirei igo quran end see ne et naget igo oruber isa qob igo end Qenu enger imurima der ne beari-beari mesenau isub dibogoten me ombopurminenei.

¹²Ende qamara Yisas nob qamar: “Qob ete qura, “Qenu ininou Munon aib me warigesiorun,” ende qamarei.

¹³Satan mi gugum Yisas warigesi nob qamara qob ombarir igama wogub qen geret bo warigesierib qamb wogub qoorei. 4:14,15 Yisas wonou sarau Galili end qanam bigorei

¹⁴Ende aba wogub Igomurur qau Yisas nonogursia ten bo yonam Galili end isorei. Isa qob toau ginam gugum isa igumirei.

¹⁵Wo end is qib Qenu qobt igau munai end isub qob imbig wurinob qamara munon yamangar wot mismisiramirei. 4:16-30 Nasaret munon Yisas wot misiringetamirei

¹⁶Qen geret inorou qen “Sabat” qamb igour eng gab wonou ginam qenen Nasaret end irab inorou munai mor end isub qob ger wanungeremb qamara ne qoan Qenu qob gigit Aisaiat di qamara gumater eng utari boair ne qob ger ete gab wanungeramorei:

¹⁸Munon Aib Igomurur qau yoopuri ten igo. Ye wonou qob uber eng munon boru qangang eng wurinob qem qamb yemaribigorei. Ne munon uyort igorunor eng wuriubersi qamb yiimurima deremei. Darab munon mag tuum eng asi mi gab ende abar qamb wuriubersieribam. Ne munon qei wau gogor gas ende sarau abari wurisumungasi igour eng wuriubersierine uber igorunor qamb deremei. Darab ne Munon aib munon wurit igub wuriubersieriba qen eng wuriimbigibam.

²⁰Yisas buk eng ende wanunger wogub munon buk qoat igo eng utab wogub bogoma munon mor igour eng wo gari mag nasi gab igurei.

²¹Ende abari wo qanambig wurinob qamar: “Qob e qoan gumatemir eng mi git eng see aninou magqurt ye wanungermine gaumon eng.”

²²Qob gugum ende qamara igub qamamir: “Wo maigas ende quraa? Wo Yosep wonou wau qenen gab igoun.”

²³Ende qamb abari wo qamar: “An yet apand ete yet qomoruboumon, ne toar munon wurimusub igoan end see nonomi musi. Qoan Kaperneam ire igo aba qob toau igumin gas ende bo nonou ginam qenent et bo ende aba gun.”

²⁴Ende qamb bo qamar: “Ye ete qemerine igar, qob gigit qamarau munon wonou ginam qenen end qob wurinob qamara iruges big qob me igetet igour.

²⁵Ye qob eng quraum eng iruges big igub igamari. Qoan Elaiya igoa qen end Isrel yamangar qindou irou igurei. Qen end togun ombur gari ne bo inaun 6-ende ya me darau. Ende igama qunumber qen aib ai eng gugum yarerei.

²⁶Yara Qenu Elaiya imurima Isrel yamangar munon nob end me isau. Wo imurima ai Saidon end isub is ginam Sarepat end yamangar qindou ger nob igama mani utab igoai.

²⁷Eng gas ende bo qob gigit qamarau munon Elisa eng bo gun. Wo gor, is Isrel munon tumau gab igour eng wurinob igoar eng munon irou wuri musia me uber burau. Siria munon Naman eng gari qas-qas musia uberetarei.”

²⁸Yisas ende wurinob qamara igub munon gugum inorou munai mor igour eng borusi misiringetamirei.

²⁹Ende at munai ginam aib eng ai qaurent igoar end Yisas mot ginam aib eng wogub qonut ete yar baab yaru ariramb qamb mot isari wo wobont uburerei. 4:31-37 Aibigau boru ger munon ger wot igama Yisas musiarei

³¹Yisas ende iua di Galili ginam aib Kaperneam end isorei. Isub Sabat qent munon qob wurinob qamb igoai.

³²Qob qamara igumir eng qiribiten, ende igub borusi qietemirei.

³³Inorou munai mor end munon ger ai bigau waramorei igama Yisas is qob qamara igub atag ar:

³⁴“O, Nasaret munon Yisas, ne mai insierib yaranei? In bumaimb yaranei qii? Ye imbigoum ne eng Qenu wonou munon qau.”

³⁵Ende qamb ara Yisas aibigau taisi qamar: “Qi wogub munon eng wogub ag der iua.” Ende qamara ai bigau munon eng wogub qoaib qamb munon eng ba ai qenen qumo arirama munon qei magqurt mumun inab igama qoorei. Qoa wogub munon eng der nageterei.

³⁶Munon qei mi bubun ende gab qiet wurinou qob-qob qamamir: “Qob eng maigas qeretut nob ende igama ai bigau munon eng wot isuor eng nob qamara di qoa, a?”

³⁷Ende qamb Yisas mi eng ebeter end qob bigari ginam qani-qani eng igumirei. 4:38-41 Yisas munon irou wurimusiarei

³⁸Yisas inorou munai eng wogub ag der Saimon munai end irarei. Saimon wonou ayi eng toar aib wara igama wot arari irarei.

³⁹Irab yamangar eng inab igama saberi qani et naget mi sier eng nob qamara qoorei. Qoa yamangar eng mom uberet ne mani yamatar igoai.

⁴⁰Ende ebet igama ai gab-gab munon irou wurinou munon banam qei toar igara igour eng wuriba diarari Yisas wurimusub igoai.

⁴¹Ende aba ai bigau qamb toar qei wurit isub igoar eng der isub ete qamb amirei: “Ne Qenu wau ten.” Ende qamb arari Yisas der wuritaisi igoai. Eng wuri munon inubersierib derer eng imbig ab igurei. 4:42-44 Yisas inorou munai qamaaman end qib qob wurinob qamb igoai

⁴²Ai uter tubub diara Yisas ginam eng wogub ai munon uet end isorei. Isa munon yamangar me inwogub iua qamb gub qamb asi qib igurei.

⁴³Qib geari wurinob qamar: “Qenu ye yiimurima derem eng wonou bibis bigor eng ginam qei eng gor. End ye qob uber eng wuri gor wurinob qemeribam.”

⁴⁴Ende qamb Yuda wurinou ginam-ginam inorou munai mor end isub qob wurinob qamb igoai.