Read Usan Yon 1 Bible Online

Yon 1 - Usan bible

Yon 1

¹Qoan ir qob igoai. Qob eng Qenu nob igoai. Qob eng wo gor Qenu gas ende.

²Qoan ir Qenu mi ger me barsiau qen end qob eng Qenu nob igoai.

³Qobt Qenu mi gugum barsiarei. Mi gugum ai qorut me derau.

⁴Igom igamau eng wot igoai. Igom eng begent munon wurit isorei.

⁵Begen eng itum omboarir igo, ne itum wo begen eng me muasereminerei.

⁶Qenu qob biga munon ger gim isub bo qen eng yariner end munon yamangar wurinob qem qamb imuriamor eng unum Yon. Ende imurimine isub munon wuri nob qamara igub begen end oabigar qamb.

⁷

⁸Yon, wo begen eng ue. Wo ar begen eng deriner end qob suab wuri imbig qib igoai.

⁹Begen eng apand begent munon gugum wurit arir igo, eng ag e dara.

¹⁰Qob eng ag e der igoai. Igama Qenu ai wot barsier eng munon gugum wuri wo qoyam ue.

¹¹Wo wonou ginam qenen isuor eng wonou yurau magqurt gab wugumirei.

¹²Ende abari munon qei wot oabig ba moriamir eng Qenu wonou wagrari buror qamb wurimaribigorei.

¹³Wuri Qenu yonou wau wurit qurar eng ur unor tumbigi end ue, ne wurinou qenungau end gor ue. Qenu wonou gari wurinonogursi igo end wonou wau tetemi.

¹⁴Qob eng munangit warub inamar igoai. In wonou oau mein eng wonou wes ar eng wot igama gaminei. Wonomi wes ar eng Tain wonou wau gari qas imurima derer end oau mein ne qomon apand eng wot yab di igoai.

¹⁵Ne Yon wot qamb qamar: “Ye munon end wot qamb ete qamam eng: ‘wo qanamt yariner eng ye sarau oboum eng yetanamimba eng wo ye ue igimine wo igoar eng.’ “

¹⁶In wonomi uber eng init yab di qoa ne wo in gugum inubersi igo. Eng Qenu qoan qomon init bigor eng Moses imbiga gumaterei. A oau qiutab ne qomon apand eng munon inubersiau tari Yisas eng ba darab inimbigorei.

¹⁷

¹⁸Munon ger Qenu bais me geau. Wonou wau gari qas, wo qenen ur nob igo end wo ag e darab in Qenu inimbigorei. 1:19-28 Yon munon wurimaragansi igoar eng qob dibes qamarei

¹⁹Qanam end Yon munon wurimaragansi ya obotar ende at qib igama ne Yuda munon baraitari ginam aib Yerusalem igour eng wuri der Qenut mian iset big igour munon qei ne Libai yurau qei (Libai wurinou sarau eng munon inorou munai aib eng qoat igour eng wurit sarau baab igour) wuriimurimari Yont yar qamamir: “Ne your?”

²⁰Ende qamarari Yon me wabimau, dibes wuri nob qamar: “Ye munon an ubersiau tari eng ue.”

²¹Ende qamara wuri qebi qamamir: “End ne ne your? Ne mai Elaiya qiyo?” Qamarari wo qamar: “Ye eng ue.” Qamara wuri qamamir: “Ende gab eng ne mai munon Qenu qob gigit qamarau munon eng ne?” End qamarari wo qamar: “Eng gor ue,” qamar.

²²Qamara wuri qamamir: “Ende gab eng dibes ininob qem. Qamara in musub mom niimbig wogub irab munon inimuriamir eng wuri nob qumurune igubour.”

²³Ende qamarari Yon qamar:Ye munon ger seger ait igo ab igoar eng ye. Munon Baraitari der isiba, ai tap ingong-ingong eng ne ai qauren-qauren eng wot musitat. Qoan Qenu wonou qob gigit qamarau munon Aisaia qamb gumater gas ende.

²⁴Ende qamara wogub ne munon qei Parisi yurau wuriimurimari yaremir eng bo der Yon nob qamamir: “Ende gab eng ne, mai munon inubersiau tari eng qiyo, a Elaiya qiyo, a Qenu qob gigit qamarau munon eng qiyo, ne eng ue gab eng ne meimet qamb munon ya obotar wurimaragansi qib igoan?”

²⁵

²⁶Ende qamarari Yon taui qamar: “Ye ar ya asint wurimaragansi qib igoum; a munon ger dererei aninob igama an wo me imbigoumon eng.

²⁷Wo ye qanam yar igo, eng ye wonou goten yau eng maigas me nerimitinei, ye qob qinan,” ende qamarei.

²⁸Mi eng ebetemir eng ya Yordan wes end munai ginam Betani end. Ginam end Yon munon yat wurimaragansi igoai. 1:29-34 Yisas Qenu wonou sipsip wan yeim gas ende

²⁹Barim ende der Yisas Yont isub igama gab qamar: “Gaiar, Qenu wonou sipsip wan yeim yar igo ite. Wo munon gugum ai qent e qomon borut igour eng wab ariramatariba.

³⁰Munon end ye wot qamb igoum eng. Ete qamam eng: munon ger ye qanamt yariner eng wo yetanamimba. Ye ue igimine wo qoan ir igoai.

³¹Ye wo sir ue, ego ye munon ende yat wurimaragansi ne munon eng Isrel munon wuriimbigine gaiar qamb.”

³²Ende qamb qamar: “Ye Qenu wonou Igomurur qau gam eng morogan gas ende Qenu ginam end igo der wo tarit end igoai.

³³Qen end gor ye wo me imbigau. Ende ebet igimine Qenu munon yat wurimaragansi qamb yiimuriamor eng yiimbig qamar: ‘Munon ger yat maragansi igama Igomurur qau der wot igama gab eng qem, qo, munon e munon ya Igomurur qau ten wuri maragansieriba.’ “

³⁴Qamb qamar: “End ne ye qo gab wogub wot Qenu wonou wau ten ende aninob qamam eng,” ende qamarei. 1:35-42 Yisas imbigau yurau qamar wurimaribigorei

³⁵Ne barim ende der Yon wonou imbigau munon ombur wuri nob end igoai.

³⁶Ende igamari Yisas wurit isub igoai. Isub igama gab qamar: “Gaiar, Qenu wonou sipsip wan yeim yar igo qita.”

³⁷Ende qamara munon ombur eng igub Yon wogub Yisas nob isumirei.

³⁸Ende toat isub igamari igeser ibag wuri qebi qamar: “An meimi gub qamb asi qib igoumon?” Ende qamara ombur qamamir: “Barai, ne eret igoan?”

³⁹Qamarari wo qamar: “Yarab gaiar.” Ende qamara wo nob isub munai igoar eng gab nob end igurei. Qen end worom nerimb pisier end.

⁴⁰Munon ombur eng Yon qamara igub Yisas nob isumir eng ger unum Andru wo Saimon Pita wonou umour.

⁴¹Qen end qas Andru umom Saimon gab nob qamar: “In munon inubersiau tari eng gunei.”

⁴²Ende qamb Saimon mot Yisast isorei. Isa Yisas Saimon gab qamar: “Ne Saimon, Yon wonou wau. Ne unum bo Sipas ende bigoum.” (Unum Sipas eng Yuda wurinou qob, Grik qobt Pita, unum ombur qanam eng nomon). 1:43-51 Yisas Pilip Nataniel nob wurimaribigorei

⁴³Ne bo barim ende der Yisas ai Galili isib at igo munon ger unum Pilip gab nob qamar: “Yara ye nob qib igorun.”

⁴⁴Pilip wonou ginam qenen eng Betsaida. Andru Pita nob wurinou ginam erogori.

⁴⁵Pilip bo isub Nataniel gab qamar: “In munon qoan deriba qamarari Moses qoan qomon qob qamb gumater eng. Ne gor Qenu qob gigit qamarau munon wot qamb gumatemir eng gaun. Wo Nasaret munon Yosep eng wonou wau.”

⁴⁶Ende qamara Nataniel qamar: “Mai, meimi uber ger Nasaret end dieriba?” Ende qamara Pilip qamar: “Ende yar ge?” qamar.

⁴⁷Nataniel Yisast yara gab wot qamar: “Gaiar, munon e Isrel munon apand, qob qetopur qamarau eng wot me igo.”

⁴⁸Ende qamara Nataniel qebi qamar: “Ne maigas yiimbigan?” Ende qamara Yisas taui qamar: “Pilip net me arau igama nam qanamt end bugab igama negumei.”

⁴⁹Ne Nataniel taui qamar: “Ne apand Qenu wau, ne gor ne Isrel wurinou baraitari gari.”

⁵⁰Ende qamara Yisas qamar: “Eng ar ye nam qaragas erobon end naget igama negumei qemerine yet oabig quran. End ne qen geret mi sig aib ne se e gan eng wotanami giban.”

⁵¹Ende nob qamb wogub gugum wuri nob qamar: “Segagam aninob quraum, qen geret Qenu ginam end asi gunon eng miroau gas ende aba Qenu enger eng Munangit wau end darab ir darab ir ende at igamari ibogouboumon,” ende qamarei.