Read Usan Aposel 12 Bible Online

Aposel 12 - Usan bible

Aposel 12

¹Qen end King Herot qanambig Yisas yurau igaramb qei wuriba uyort wuri bigorei.

²Ende at ne qen qamart yogorau munon ger imurima isub bui qaurit Yon umom Yems guma umorei.

³Herot Yems ende warama uma Yuda mismisirari ibag ne bo Pita ba uyort bigib qamb aba yogorau munon imurima isub ba uyort bigumirei. (Qen end Yuda mi aib qamb at nub igour eng qoan wurinou ur qoan ai Isip end igamari Qenu enger ger der wuri me igaramau, worowagerei ende qamb misir igub mani parau yis nob ue eng nub igurei.) Pita ende ba uyort big wogub ne yogorau munon 16-ende wuriqereimari 4-ende itumut qoat, ne 4-ende ai gab-gab qoat, ne bo 4-ende itum qoat, bo 4-ende urigerma qoat, ende at igamari Yuda wurinou mi aib qamb at nub igour inorou qen eng ubura Herot Pita qob qamara qereimb qamb qamara ende at igurei.

⁵Pita uyort bigumir eng ende igama ne Yisas wonou yurau eng der Qenu nonogursi igoar qamb qebi qamb igurei. 12:6-19 Pita uyor munait ar sarog igoai

⁶Barim ende der Herot Pita bis qob musub waramune uminer qamb itum end yogorau munon ombur Pita ubent tourimari ina wogub yogorau munon ombur ger ig et naga ger ig et naget ende at igamari yurau aib ag tend uyat qoat igurei.

⁷Ende qoat igamari itum end Munon Aib enger ger wobon end dara munai mor eng begent uburerei. Ne enger eng Pita meni qamar: “Qand der bugom.” Ende qamara uyort touri nausiamir eng wonou yaaser uburerei.

⁸Ende aba enger nob qamar: “Mingoan naget goten yau naget ende aba ye nob isun,” ende qamara Pita ende ebeterei.

⁹Ende ebet ne enger eng toat isorei. Pita wo inigoum qamb misir igor ego wo me inigau, apand ende ebet igoai.

¹⁰Ombur ende isi yarab yogorau munon yurau ger igour eng worowogub ne isi yarab yurau ger igour eng worowogub ne isi tend tog aib mom nausi obotemirt end isari ne tend eng wonou ar weima ne ag isumirei. Yogorau munon qataben-qataben worowogub yaremir eng wuri ombur bais me ibegeau. Ag ende der ne Yerusalem ir igour tap eng toat irab ne enger Pita end wogub qi qoorei.

¹¹Ende wogub qoa ne Pita misir igub qamar: “Wa, io, me inigau, apand Herot wonou yurau eng nob qomon eng yesiorubari gab Qenu enger imurima der yemot ba di yewagar e.”

¹²Ende qamb ne mom misir igub wogub ne tap toat is-isi diab Mak unor Maria munai mor end isorei. Is ibagar eng Yisast oabig igour yurau eng end qiumuni Qenut qebi qamb igurei.

¹³Pita ende irab tend tog mondir warama ne sarau batar igo yamangar ger unum Roda eng isub your mondir warama qamb isub mondir me weimau, ar igor ego Pita qamara mindiram goten igub mismisir wogub bo uyab-uyab isub wurinob qamar: “Wa, Pita diab ago eiro naget igo.”

¹⁵Ende qamara wuri der qamamir: “Ne qanganget qob eng at quran?” Ne wo der qamar: “Qangangetarau ue, apand di ago eiro naget igo.” Ende qamara wuri der qamamir: “Ue qi, umb wogub moui di naget igo qi?”

¹⁶Ende qamb at igamari Pita der mondir waramb ten igoai. Igama der mondir wei gab qietemirei.

¹⁷Ende der gab qobub abari ne Pita wurinob qamar: “Qi wagari, Munon Aib ye maigas ye mot der ag yewaga diaumi qi eng qemerine igar,” qamar. Qamb ne mi gugum wot ebeter eng qamb ugab wogub qamar: “Ye mi eng aninob quraum eng Yems ne ininou yurau erogori qei eng ende wurinob qamarari igunor.” Ende qamb wogub ai geret qoorei.

¹⁸Itum end enger Pita nob ende mot der qoorei igama urigerma ne yogorau munon eng der Pita gamir e me igama gab wurinou der qiet qanganget igurei.

¹⁹Ende at igamari ne Herot qob igub munon qei wuriimurima Pita gub qamb asiamir e me gab, ne munon Pita qoat igour eng wuri qebiamor eng gor ue gab ne munon qei wuriimurimine yogorau munon Pita qoat igour eng igaramar qamb wogub wo Yuda wogub Sisaria isorei. 12:20-25 Herot umorei

²⁰Qen end Herot wo munon ginam ombur Tair Saidon nob wurit misiringet igama wuri der erogori Herot oau meinsiorub qamb yaremirei. Eng Tair Saidon munon ginam ombur eng wuri Herot wonou yurau wurit mani qamb taui ba igour ende. Yarub qamb ne gigit munon aib ger unum Blastus wo munon Herot sarau betet igour eng oroar igo eng banamsiari wogub qen geret qob musiorunor eng Herot maribigorei.

²¹Qen end wo git baab wogub is wonou nam qab end bugab igo ne munon end wurit qob qamb igoai.

²²Ende qob qamb igama is gab qiet atag ab qamamir: “Wa, qira munon ue qi-i, wo Qenu gas ende qamb igo,” ende qamamirei.

²³Ende qamarari Herot uber yet quraur ende qamb me wuritaisiau. Ende aba Qenu enger ger imurima der Herot sia toar wara umorei.

²⁴Qen end Qenu qob bais me wagau, sabar-sabar qamb qiroari munon bubun-bubun bo Yisast oabig isub igurei.

²⁵Qen end Barnabas Sol nob mi ebet igour eng ugab wogub wau ger unum Yon Mak mot Yerusalem wogub bo Antiok umo isumirei.