Read Usan Aposel 20 Bible Online

Aposel 20 - Usan bible

Aposel 20

¹Ende qoari wogub ne qen end bais uber erogori igoi wogub Pol munon Yisast oabig igour yurau eng wuriba qiumuni qobut wurinonogursiarei. Ende at wogub uber igoarar qamb wogub wo ai Masedonia end isorei.

²Isub-isub Masedonia ginam qei isub qob wurinob qamb isi-i ai Grik end isorei.

³End isi igama inaun ombur gari ende uma wogub bo girinet tabin ba ai Siria end isib misir igorei. Ende ebeter ego Yuda munon qei qob igub yuraut opuri igour qamarari igub bo igeser Masedonia wes eng irab bo tumbigi ai Siria isib qamb irarei.

⁴Iriba ne munon qei nob iramir eng unum eng ete Sopater ur eng Pirus, wonou ginam qenen eng Beria. Ne Aristarkus Sekundus nob wurinou ginam aib eng Tesalonaika. Ne ger Gaius wonou ginam Derbe. Ne munon ombur gari Timoti, Tikikus ne Tropimus wuri ai Esia. Munon yurau eng Pol nob iramirei.

⁵Pol qamar: “Munon yurau eng gigit isub Troas end inoar igamari in ombur Pilipai end igumu ne qen aib Qenu enger ininou tonoan wuri me igaramau qamb mi at nub igour eng niari ibag igumu ne qen 5-ende ubura in ombur tabin ba isi Troas end igamari ibag erogori end igumu ne inorou gari umorei. 20:7-15 Pol qen sasam Troas ibag ne Miletus isorei

⁷Ne Sande qen end ai gab-gab in gugum ginam qenen eng wurinob erogori bugab mani qibi boat numinei. Nub igo Pol barim worowogub qoaun ende qamb qob wurinob qamb igama igoi itum wobon isorei.

⁸Eng munai tumbigi erer qitend qiumuni yorumut gumet uri ende at igunei.

⁹Pol qob ende qamb isub igama igoi itum qir isa wogub wau qen ger unum Yutikus. Wo monir end bugab qugi igoi wogub uburab yarsi ago qumo dererei. Dara is bemeni gamir e umorei.

¹⁰Ende gab qamarari Pol qand isub baab gab qamar: “An misir me igar, bo igomot der bugemba.”

¹¹Ende wurinob qamb wogub bo erer qite irab mani parau nub wogub bo qob imusi qamb isub igama igoi uriger worom weib dera, wau moi umor eng bo igomot der bogoma mismisir nob mor isari, Pol ginam Asos end isorei.

¹³Isib qamb Pol in gigit isub ginam Asos end yoat igoarar qamb inimurima in tabin ba isune wo ag gotent dererei. Darab isi end inimbigea wo nob bo tabin ba isi ai qaur Mitilini end isuminei.

¹⁵End ineminei igo urigerma bo isi ai qaur ginam Kios, end ineminei igo urigerma bo tumbigi isi ai qaur Samos end isub bo deget Miletus end isuminei. 20:16-38 Pol qob sasam Epesus munon baraitari wurinob qamarei

¹⁶Pol end tabin ba bo Epesus end isib ater ego ai Esia end qas qib igimine qen uburiner qamb ne gor Igomurur qau wurit isuor qen ‘Pentikos’ qamb igour eng gor piara gab qand Yerusalem qite irib qamb.

¹⁷Ende at ne wo Miletus end igo munon Yisast oabig igour Epesus igour eng yar yegaiar qamb qob bigorei.

¹⁸Qob biga yarari ne wurinob qamar:Se qamart ye Esia umo anit yar aninob igo qomon ebine yiimbigomanei.

¹⁹Sarau bam eng ger mein ger me beau. Yuda der ye sarau ebine yequguragsi qas. Ende ebetemir ego ye yonomit misir me igau. Yisas Munon Aib sarau betine obour eng ende qamb igumei.

²⁰End ne qenen aninou munai gari-gari end ye qob animbig ne qiumunimari qob aninob qamb ne ye qob ger me wabi igamau.

²¹Yuda yurau eng ne munon ar garisi ye qob ete an irun wab qamb igumei: “Aninou qomon boru-boru eng mogirt wab wogub Qenu wot igub ininou Munon Aib Yisas toat igoarar,” ende qamb igumei.

²²End ne see Qenu wonou Igomurur qau eng ye ginam aib Yerusalem qite ir qamb ye sesima isibam. Eng maigas yesiorunor qiyo eng ye sir ue.

²³Eng ye ginam gugum qib igimine Igomurur qau ye irun wab ete qamb igoai: ‘Ne git irinen eng nebaab nanamb nequguragsi ne uyort nebigubour end me yariom,’ ende yenob qamara ne yonou git goan end misir me igoum.

²⁴Yisas wonou ye sarau yet maribigor eng mom at ugeini qamb yonou sarau eng Qenu munon gugum wurit igub igo end ende ebine Yisast oabig igoarar qamb

²⁵End ne erogori igamau qomon eng Qenu wonou qoat igo eng ye animbig qib igoum eng. Ne se ye bo menman me yegunanei.

²⁶End ne Qenu ansi igo eng qenen aninob qamb igoum eng. Eng ye ber begetet me aninob qamb igamau. Munon ger wonou qob eng me igini qamb ebet eng, wonou qas.

²⁸Ye bo me yegab eng aninou mom nonoguretaman eng. Qei der qei nonogursi ende at igoarar. Ende abari qebenau qau ansiara uber qi qoat-qoat igoruboumon.

²⁹Git ye anwogub quine munon qei iau qaar wai sipsip got nub igo gas ende at diorubour. End ne an mom nonoguret igoarar.

³⁰Ne qei aninou erogori end der qetopur qamarari an qei wurit igub orotoar igoruboumon eng gor imbig igoarar.

³¹Eng ye anmurimar me quraum. Togun ombur gari ende ye aninob igo anitoubar qenen itum woromt annonogursi igumei.

³²End ne see Qenu anit wogoum eng wonou gari anoar animbag igoriba. Igama an wot nonoguret qomon uber qas abar. Ebet wonou munon yurau eng qoat-qoat igoarar.

³³Qoan ye aninob igoum eng aninou nomon qur qiyo mingoan ger yeisar qamb qibirat me aninob qamb igamau, ue.

³⁴Ye yonou sarau baab mi ba ne yonou munon yurau qei mi wurisab ebine yegab igoumon eng.

³⁵Ye eng ebet qirine yegab igoumon gas ende an ger ende ebet munon banam qei mi ue ar igour eng mi werisar. Qomon eng qoan Yisas ebet ininob qamar eng ete: “Munon ger ne mi ue eng gab mi ger neteiner eng uber. A ne munon ger mi ue gab utab eng sig-sig mismisir, ende qamarei,” qamar.

³⁶Pol qob degen aib eng mom ende wurinob qamb ugab wogub (Yuda wurinou qomon eng) gamaur wat bugab Yisast qamarei.

³⁷Ende ebet wogub isiba qoan bo menman me yegunanei qamar end borusi mom toubet eab-eab ubent baab mot bis tabint wagari isorei.