Read Usan Rom 10 Bible Online

Rom 10 - Usan bible

Rom 10

¹Io, yonou munon banam, ete qemerine igar: yonou munon yurau Qenu bo wuriqubeiom qamb misir qenen igub Qenu qenen qebi qamb igoum.

²Ye qenen wuriimbig igoum end quraum. Wuri Qenu qomon qob eng qeretutnob big toat igour. Ego wuri mi qei sir me imbig ebet igour.

³Munon qomon maigas abari Qenu wurit munon qoregen wurit qemeriner eng wuri sir me imbig at igour. At ne wurinou qomon qoregen eng qas toat igour. Wuri ar Qenut mi big-big igamari wonou uyes munon qoregen wurit qemeriner eng wuri me at igour.

⁴Qomon igoar eng isi yarab Munon inubersiau tari eng dara qomon eng uburerei. End ne munon gugum munon inubersiau tari end wot oabigunor eng qas Qenu munon qoregen wurit qemeriba.

⁵Moses qomon qob gumater eng munangit wurinou qomon eng toat qoregen igoarar qamb. End ete qamarei: “Munon qomon eng gugum toat igomot igorubour.”

⁶Ne munon oau apand bura gab Qenu munon qoregen wot qemeriner end ete qamarei. “An ete misir me igar: your Qenu ginamt iriba?” Eng qamb Yisas bo ubumot ag e der igoun.

⁷Ete gor me qamarar, your ai erobon qumo isiba? Eng qamb Yisas menimune der bugab igo.

⁸Eng qamb igoun end mai qura? Ete qura: “Qenu qob eng an qani igo. Aninou qabarit ne misirt igo.” Qob eng ininou oau apand eng dibes qamb igoun eng.

⁹An qabarit, “Yisas ininou Munon Barai,” qamb gab eng Qenu Yisas menima der bugamor end gor mom oabigunon eng Qenu anqubeimba.

¹⁰In misirt Qenut mom oabig ne qabarit ininou oau apand eng dibes qomorun eng init, ‘munon qoregen’ init qamb in ba qubeimba.

¹¹Qenu mi end ete qamarei: “Munon ger wot oabig eng qen geret mi qeemben ende irimanima gib aba.”

¹²End in munon gugum qeemben gari. Yuda munon yurau ar eng nob, ger wes ue. Qenu eng Munon aib gari qas. End munon wot qemeriner eng sig-sig mom ubersieriba.

¹³End qob ete qura: “Munon gugum Munon Barai unumot qomorunor eng uber igorubour.”

¹⁴Wuri Qenut me oabig maigas at wot qomorubour? Ne gor wuri qob me igub maigas at wot oabigubour? Ne munon ger qob me wurinob qamara wurinou ar maigas at igubour?

¹⁵Qob wonou ar maigas at isa igub bo tumbig imusi qomorubour? End qob ete qura:Munon qob uber qamb qib igour eng wuri goten wes big qib igour. 10:16-21 Isrel wuri Qenu qob uber me imbigau

¹⁶Munon qei qob uber dibes qomorunor eng munon gugum qob me igatarau. Aisaia wonou ete qamarei: “Barai, your in qob igatariba?”

¹⁷In qob qamarari iruges big igoun eng ininou oau apand eng nonogursi igo. Qob uber qamb igoun eng Munon inubersiau tari mom derer end qob suab igoun.

¹⁸End ye bo qemerini: Eng mai apand wuri qob eng me igau end at igour? Ue, wuri qo igumirei. End qob ete qura:Munon yurau qob qamamir eng toau qo munon ginam-ginam isorei.

¹⁹End ye bo ete qemerini. Qob toau isa munon Isrel me igau igo at igour qiyo? Ue, wuri eng obounor end Moses qo gigit qamarei:Ye munon yurau ar eng wuri qubeimbam. Ende at wuribanamsi igimine yegab wurit misiringetorunon ego ye musub wurinob igimine gab bo qenungouboumon. Munon sig qoyam ue eng oromar igimine gab wurimerimataruboumon.

²⁰Aisaia gor me qubigau, ete at qamarei:Munon ye yegoub qamb yoat ende me at igamau eng wuri qo yegaur. Ne gor wuri ye me yiimbig munon qei wuri qebi qib igour eng yonou uyes wurit dibentaremei.

²¹Ne Isrel munon yurau end ete qamarei: Ye qenen qob igisounor qamb wurinob qamb igoum. Ego wuri der yonob agunub qob isi yet qamb igour.