Read Usan Rom 15 Bible Online

Rom 15 - Usan bible

Rom 15

¹In your ger, oau apand igo munon ger quguraget igama musub gab eng ininomi dibes me qomorun.

²In gari-gari ininou munon banam wurimusiune uberet nonoguretorubour.

³Munon inubersiau tari wo munon ende wurimusub wonomi me dibesiau. End qob ete qura: ‘Munon qob isi anit qomorunor eng yarab ye yuumimba.’

⁴End qob qoan gumatriamir eng in see oboun end qamb gumatriamirei. Qob eng wanunger gab nonoguret ne wot oabig igorun qamb.

⁵In Qenut oau apand burune wonou gari innonogursi igo. End ne Qenu wonou anseara an Munon inubersiau tari Yisas eng wonou qomon eng mom wapet igoarar.

⁶Ende at ne qibanamsi igo ne qabari erogori big Qenu Munon inubersiau tari Yisas ininou Munon Barai wonou ur eng wot uber qamb igoarar. 15:7-13 Qenu qob uber munon yurau ar gor wurinou

⁷Munon inubersiau tari wo inqubei inbanamsier gas ende an wo wapet an bo aninou munon banam bo ende wuriqubei qibanamsi ne Qenu unum ba dibesiarar.

⁸Ye ete qemerine igar: Munon inubersiau tari eng wo munon ar warub Yuda wuri Qenut oabigar qamb wuriimbigor eng. Wo ende ebine Qenu qob apand eng nonoguret ne wonou qob qoan ininou tonoan wurit nausier eng irimaniom qamb.

⁹Ne gor Yisas wo ende ebine munon yurau ar gor Qenu wurimusub igo eng imbig wot oabigor qamb. End Qenu qob ete qamarei igo:Ye nenet uber qamb nonou unum munon yurau ar eng wurit dibes qemerine igari ne neunumot uru wab mismisirine yegoubour.

¹⁰Ne bo ete qamarei:An munon yurau ar, an Qenu munon yurau wuriqereiamor eng nob qiumuni wot uber qamarar.

¹¹Ne bo ger:An munon yurau ar, gugum aninou qas Munon Aib unum ba dibesiarar. Ne munon ai qent gugum aib qamb wot uber qamarar.

¹²Ne bo Aisaia qamar:Munon ger Yesi tumbigi end deriba. Wo darab munon yurau ar wuri qeisiau gas ende aba wuri geari oroar igoriba. Oroar igama wuri qenunget igorubour.

¹³An mismisir qenunget oabigau eng Qenut gari ibig igoriner. Igama wonou Igomurur qau mom qeretutnob ansiara qenungunon eng nob oau apand eng nob mom imusi-imusi ende igoriba. 15:14-21 Pol wonou sarau end mismisir namanimun gumaterei

¹⁴Io, ye misir igoum eng an qomon uber ebet igoumon eng ye mom imbigoum. End ne an mi gugum imbigoumon end munon banam qei werei uber wuriimbiguboumon.

¹⁵Ye qob qei anit gumaum eng an gab oau uburab isuboumon. Ego ye end misir me igoum, song quraum. Qenu yemusier end igub an bo musub imbigar qamb.

¹⁶Wo yeseara ye Munon inubersiau tari Yisas wonou sarau munon yemaribiga ye munon yurau ar end wurit sarau eb qamb. Ye munon Qenut mian iset bigau gas ende igo Qenu qob uber munon yurau ar eng wurinob qamb wuriqubeiom qamb. Ende ebine Igomurur qau wuriseara munon qoregen igorubour. Igamari ye woromar Qenut yar wai ger waramb Qenut mian iset bigau gas ende wurisieribam.

¹⁷Ye sarau ende ebine Munon inubersiau tari Yisas eng yenonogursia ye Qenu sarau ebein end mismisiribam.

¹⁸Ye mi geret me qemerinei. Ue, Munon inubersiau tari yemusia ye munon yurau ar eng qob wurinob qemerine Qenu qob igetemir end.

¹⁹Ye qob qamb sarau ebetem eng wo yenonogursia sarau ebetem eng ya uyerei. Ne sarau ebine wo qomon qeretutnob wes eng yet isa ebine wuri gamirei. Ne Igomurur qau gor qeretutnob yenonogursiarei. Mi eng gagar yet ebeter eng munon yurau ar eng wuri gab Qenu toat igoarar qamb. Ende yeseara ye nonoguret Munon inubersiau tari eng wonou qob uber eng ye ginam aib Yerusalem end qanambig wurinob qamam eng isi Ilirikum qangang end isomei.

²⁰Ye munon ginam Yisas unum qoan bais me igau end qob wurinob qemerib qamb sarog bigomei. Ye munon qob igumir sabum eng wurinob qamarau end ietamei.

²¹Qob ete igo end:Munon yurau qei wonou qob me wurinob qamarari igau eng gubour. Ne gor munon qob toau isa me igau eng musub igubour. 15:22-33 Pol Rom ibegeib qamb misir musub qerei igoai

²²Qanam end ne ye qenen anit yarib qamb igoum eng me yar igoum.

²³See ye sarau ig e mom ubura yar animbegeib qamb ebet igimine togun irou umb igo.

²⁴End ne see ye ai Spen end isibam, end ne ye yarab animbag qen bais qurumnami ende aninob igo oau bais pomaimot wogub isibam. Qen end isibine an ye mot bisub qataben yewoguboumon.

²⁵End see qas ye Yerusalem ite irab Qenu munon yurau wuri nonogursi wogub.

²⁶Munon yurau Masedonia Grik nob wuri mind qo qiumuni wogub Qenu munon yurau Yerusalem igour eng mi uet at igour eng wurit unumir qiumunimb qamb qob nausiamirei.

²⁷Eng wurinou misirt ende ebetemir ego wuri Yerusalem wurit mi ar baumir eng tauiomunor eng gor igo. Yuda wuri munon yurau ar eng misir uber igub bebereg igoarar qamb Qenu wonou qob wuriimbigumirei. Ne munon yurau ar eng wuri igo bo taui Yuda wurinou git goan end mi werisubour eng se igo.

²⁸Sarau eng igo end ne ye eng mom ebet ugab wogub Spen end isib qamb yarab animbegeibam.

²⁹Ye anit yarin eng Yisas ye yoopurima ten yaribam.

³⁰Io, ye anit ete misir igoum, an mom ininou Munon Barai inubersiau tari Yisas end mom wot igar. Wo gab-gab Igomurur qau init dibentar eng. An end nonoguret musub imbig qeretutnob naget ne Qenu qebi qamarari yenonogursieriner.

³¹Ende abari Yuda munon qei ye qob qemerine me igisab igour eng Qenu yesiara wuriwegibam. Ne an Qenu qebi qamarari wonou munon yurau Yerusalem ite ye wurit sarau ebein eng wuriseara qenunget igorunor.

³²Ende abari Qenu wonou yiimurima anit yarab ubereribam. Yarab aninob baist umimbam.

³³Qenu wonou ansiara oau meinburab igoarar. Apand.