Read Usan Rom 16 Bible Online

Rom 16 - Usan bible

Rom 16

¹Ye ete misir igoum, ininou yamangar banam Pibi eng musiarar. Wo Senkria munon wurit sarau ebet igo.

²An Munon Aibt misir igub Pibi ba morimari aninou yurau end igoriner. In Qenu wonou yurau eng in sarau eng oboun. Wo mi ger ugab aba eng an mi gab utar. Yamangar eng wo munon irou wuri musub igo. Ne ye gor yemusub igo end aninob quraum.

³Ye qob eng aninob quraum eng Prisila wonou umami Akwila wuri ombur ende wurinob qamarari igunor. Wuri ombur in erogori Munon inubersiau tari Yisas eng wonou sarau ebet qib igoun end.

⁴Erogori sarau at qibi ombur umub pisiaur end. End ne ye gari wurit igub me quraum. Munon yurau ar eng Yisas yurau buremir eng gor ombur wurit igub igour.

⁵Munon yurau ar eng wuri gor yar munon yamangar eng wurinou munait qiumuni igour eng gor wurit quraum eng ende qamarari igunor. Ne gor Epainetus wo yonou ima ten gas ende Esia munon igamari wo gigit Yisast oabigorei.

⁶Ne Maria wot gor igub quraum. Wo sarau aib anit ebet igo end.

⁷Ne munon ombur eng, Andronikus Yunias nob.Wuri ombur in Yuda yurau erogori. End erogori uyort igunei. Ombur wuri Yisas wonou yurau unum end garisi igo. End ombur wuri gigit Munon inubersiau tari end unum iramirei.

⁸Ne gor Yisas wonou qomon end in Ampliatus nob qibanamsiaminei, end gor wot igub quraum.

⁹Ne Urbanus wo in ombur Munon inubersiau tari eng wonou sarau eng ebet qib igo ne qibanamsiamin end gor wot igub igoum. Ne Stakis yonou munon banam eng qenunget igoum end wot igub quraum.

¹⁰Ne Apeles wo gor Yisas unum toat igo end gor quraum. Ne Aristobulus wonou yurau gor wurit igub quraum.

¹¹Ne yonou munon Yuda tau eng Herodion gor wot igub quraum. Ne Narsisus wonou munon yurau Yisast oabig igour end gor wurit igoum.

¹²Ne yamangar ombur eng, Tripina Triposa nob ombur wuri munon aib sarau qeretutnob ebet igour end gor wurit igoum. Ne yonou yamangar banam uber Persis wo gor Munon Aib sarau qeretutnob ebet igoar eng gor wot igoum.

¹³Ne Rupus wo Munon Aib wonou maribiga qob toat igo. Ne wonou unor eng gor yonou nani gas ende gari, end wurit igoum.

¹⁴Ne Asinkritus Plegon nob ne Hermes, Patrobas, ne Hermas. Ende wurit igub ne wurinou yurau Yisast oabig igour eng gugum wurit igoum.

¹⁵Ne Pilologus wonou irub Yudia nob ne Nereus wonou umemi eng nob. Ne Olimpas ne wonou munon yurau Qenu imbig igour eng gor wurit quraum.

¹⁶In gugum Qenu yurau qamb eng aninou munon banamsi ne qi qotub igoarar. Yisas wonou munon yurau eng gugum anit igub qob ende quraur. 16:17-20 Munon qei sios yurau bubur qerei igour

¹⁷Io, an yonou munon banam. End ye qob qei aninob qemerine igub qoyamet imbig igoarar qamb. Munon qei qob eng igub abari munon qei der qob eng siningot munon yurau bubur qerei igour. Ende abari wuri qob igub igour eng siningot wogub igour. End ne an ende ansiarari ibag wuri mogirt wab wagar.

¹⁸Munon yurau eng wuri ininou Munon Barai Yisast igub me obour. Wuri wurinou misir soagen eng toat at igour. Ende at ne munon qei qomon boru me oboun qamb gitab igour eng wurit isub wurimurimar qamb ende ebet igour.

¹⁹An Qenu qob uber eng toat igoumon eng munon gugum qob toau qo igub ue. End ye gor anit mismisiraum. End ne an qomon uber end mom igorub qamb mom misir igar, a qomon boru eng wagar.

²⁰Ende abari Qenu wo anitoubar igo end Satan anit nugutumugeib pisi igo. Ininou Munon Aib Yisas wonou oau mein eng anamar igoriner. 16:21-24 Munon qei Rom wurit uber qamb qob imuriamirei

²¹Timoti in ombur sarau baab qib igoun eng anit igub uber qamb qob bigar eng. Ne gor Lusius ne Yeson ne Sosipater wuri gor yonou yurau eng anit igub uber igoarar qamb quraur.

²²Ye unum Tertius, Ye Pol wonou qob eng ba Munon Aib Yisas gab-gab an uber igoarar qamb anit namanimun e gumatoroum.

²³Gaius wo ye nob igimine yemusub ne munon yurau Yisast igub igour eng wurimusub igo eng anit igub uber igoarar qamb qura. Ne gor Erastus wo ginam aib end igo gabman nomon qur qoat igo eng nob ininou munon banam Kwartus nob ombur gor anit igub uber qamb igour.

²⁴Ininou Munon Aib inubersiau tari Yisas wonou oau mein eng anamar igoriner. Apand. 16:25-27 Qenu qas unum ba ereri igorun

²⁵In gugum wagari Qenu wonou unum wes eng bereri igorun. Igumune Munon inubersiau tari Yisas wonou qob ye dibes aninob qamb igoum eng annonogursieriba. Qob eng qoan qi igoar eng see Qenu wonou ba dibesiar eng.

²⁶Qenu qenen bebereg igo eng ininob qamara qoan qob gigit qamarau munon gumatemir eng in munon yurau irou wurit dibes qamb igoun. Ende ubune qob qi igoar eng see munon gugum igub ue. Qenu wonou ende ebine munon yurau ar qei qob eng igub wot oabig ne qomon toat igoarar qamb.

²⁷Qenu wo gari mi gugum qoyam. End in Munon inubersiau tari Yisas wo gab-gab qenen unum bereri igorun. Apand.