Read Usan Galesia 1 Bible Online

Galesia 1 - Usan bible

Galesia 1

¹Io, an Galesia munon ye qob ger aninob qemerine igar. Ye Pol, Yisas wonou imbigau munon. Ye munon ar ger Yisas wonou imbigau munon igoar qamb me yeqereimau, ue. Yisas Krais wonou ur Qenu menima igomot der bugamor eng wonou yeqereiamorei.

²Yurau e ye nob erogori sarau baab igoun eng in erogori qamb an Galesia gaiar qamb namanimun gumotoroun.

³End ne ininou tain Qenu wonou oau mein eng ansiara uber igoarar. Ne ininou Munon Aib Yisas Krais wo ur Qenu imurima darab wonomi wager eng. Eng in munon ai qent igoun ininou qomon boru-boru eng wogub uber igorun qamb Qenu Yisas imurima derer eng.

⁵End ne Qenu wonomi wes eng qenen igoriba. 1:6-10 Qenu qob uber gari qas igo

⁶Wa, an Qenu Yisast anubersier eng bo qand wogub qob ger toat ebet igamari igub qiet ne aninob quraum.

⁷Git qob see toat igoumon eng qob uber ue. Ego aninou munon qei der Munon Aib Qenu inubersierib maribigor qob uber eng ba soagensi qamb aninou misir eng ba songesiari at igoumon.

⁸Eng mai qiyo, in qiyo enger munon ger Qenu ginam eng wogub der in qob gigit qamamin eng wogub bo wonou misirt qob bubun imusi qemeriner eng munon eng uminer eng moui nob mom umiba.

⁹Eng qob gigit qamamin eng bo sabar quraun eng: Munon bubun ger der qob bubun ger aninob qemeriner eng munon eng uminer eng moui nob umiba.

¹⁰End ne qob see aninob quraum eng mai qiyo, ye munon qei yegaiar qamb yonou qen big igoum qiyo? A Qenu yeqenungeiner qamb ebet igoum? Munon yegaiar qamb ebet igimine qi eng ye Krais wonou sarau munon ue qi. 1:11-24 Pol maigas ebet Yisas imbigau yurau burerei?

¹¹Ye qob uber qamb igoum eng an musub igar. Munon ar ger qob eng ye nob qamb me yiimbigau, sig ue ar. Yisas Krais wonou gari yiimbigorei.

¹³Qoan ye Yuda wurinou qomon toat ebet igoum eng an mom imbig igoumon eng. Ye munon Qenut oabig igour eng igaramb wuriba sumungasi igumei.

¹⁴Yonou yurau erogori nani in bauor erobon end ye mom wuritanami wogub Yuda qomon eng toat, ne yonou tonoan wurinou qomon eng mom pongurir toat igumei.

¹⁵Git qoan nani me yebaiau igama Qenu qoan yet igub ye wonou sarau eng be qamb yemaribigorei.

¹⁶End ne Qenu wonou wau yet dibesia ne munon yurau ar eng qob wuriimbig qem qamb ende yet aba gab ye munon ger sarau yiimbigar qamb me wurinob qamarau.

¹⁷Ne gor Yerusalem munon gigit Yisas yurau buremir eng gor is me wurinob qamarau, ue. Ye ar ai Arebia ite di bo yonam ginam Damaskus umo isomei.

¹⁸Is umo igimine togun ombur gari uma ne ye Pita gib qamb Yerusalem qite iramei. Irab gab nob igimine inorou ombur umorei.

¹⁹Ye eng ir igoum eng Yisas yurau qei me ibegeau, Yisas umour Yems eng gari gamei.

²⁰Ye qob e gumaum eng apand, qetopur ue. Qenu wonou yegea-yegea gumaum.

²¹End igoi wogub qen geret bo ai Siria Silisia nob end isomei.

²²Qen end munon Yudia Yisast oabigumir eng ye menman me yegab igamau.

²³Munon qei qas yet ete qamarari igub igurei: “Munon qoan iningaramb insumungasi qib igoar eng see bo qomon eng nugutumuget wogub qob uber qamb qib igo.”

²⁴Qenu ye yesier eng ende qamarari igub wuri Qenut borusi mismisiramirei.