Read Usan 1 Tesalonaika 5 Bible Online

1 Tesalonaika 5 - Usan bible

1 Tesalonaika 5

¹Io, an yonou wau ima gas ende, mi eng gagar meimi qent qiyo, a meimi inaun end dieriner qi eng ye imbig igo gab me animbig qemerinei. Aninou mom imbig igoumon eng. Munon Aib deriner qen eng wo munon mi urim baib qamb itum wobon qi qib igo gas ende at deriba.

³Qen end wuri ete qomorubour: “See qen uber mismisir igorun.” Ende qamarari mi wuri borusieriner eng qand wurit yariba. Yara igunor eng yamangar qugurau igo qoaib qamb mogis qert aruab igo gas ende igubour. Mi eng me wuri sorasiminerei, qeemben ende wurit yariba.

⁴Ego an yonou wau ima gas ende, qen eng yariner eng an itum end igamari gab munon mi urim baib qamb itum qi di igo gas ende me ebinerei, ue.

⁵An munon gugum begent igoumon. An gugum woromt munon, itum munon ger ue.

⁶End in munon qei inab igour gas ende me igorun. Qenen girinet tug igo asi qas igorun.

⁷Munon itum inab igour, ne gor ya uter nub eng itum nub igour.

⁸In woromt munon end asi ten igorun. Oabig qitoubau qomon eng yomi gas ende opuri igorun. A Qenu inamar iriner qamb qoat igo eng, tabi qumurimau gas ende at igorun.

⁹Qenu inmaribigor eng, Yisas Munon inubersiau tari wo bo dara Qenu init misiringet iningaramba qamb wot yarimar qamb ue. In qenen mismisir igomot igoarar qamb.

¹⁰Qoan wo umor end inmusuorei. End in igom igorun qiyo a umun eng wo deriner qen end erogori bebereg igoruboun.

¹¹End ne an gari-gari qob uber, misir uber eng aninou munon banam wurinob qamb wurinonogursiarar. See at igoumon gas ende at igoarar. 5:12-28 Pol qen sasam wuri irun wab qamarei

¹²Io, an yonou wau ima gas ende, in bo ete aninob qumurunei igar: sarau munon anit sarau baab igour eng an wuri qob qamarari igatarar. Munon Aib wonou munon baraitari eng wurimaribigor eng an anamar igo annonogursi igoarar qamb.

¹³Sarau bounor end wurit igub misir gari big wuriqenungaiar. Ende at aninou qi banamsi igoarar.

¹⁴Io, an yonou wau ima gas ende, an munon iet qib igour eng, wuri irun warari igunor, ne munon yari igour eng wurinonogursi ne munon qer gagam ue eng wurimusub ende at qomon mein end munon gugum oramar igoarar.

¹⁵Munon qei ansumungasiari ibag an me tauimar. Qen gugum qomon uber qas munon banam wurisirbig ne munon ar gugum gor ende sig.

¹⁶Qenen mismisir ne Qenut qenen qebi qamb igoarar.

¹⁸An munon inubersiau tari Yisas mom tenori igo qomon eng ende abar qamb Qenu qenunget igo. End mi gugum ba Qenut uber qamb igoarar.

¹⁹Igomurur qau oau anmeni igo eng me taisiarar.

²⁰Wo munon ger oau menima Qenu qob gigit aninob qamara gab eng me mogirt wab wagar.

²¹Ego qob gugum musub qereimar. Uber gab misirt bigar, a boru gab aisiari an wogub isiner.

²³Oau mein eng Qenut igo init der igo. End wonou anseara munon qau igoarar. Aninou misir ne oau ne git goan eng musub igama an uber igoruboumon. Igamari Munon Aib Yisas Munon inubersiau tari bo darab git goan gobir ar animbegeiba.

²⁴Qenu anmaribigor eng qoregen ar, end ende ebeiba.

²⁵Io, an yonou wau ima gas ende, init igub Qenu simot eari inmoromsieriba.

²⁶In anit igub uber quraun eng an bo imusi ininou munon banam gugum wurit uber qamarar.

²⁷Munon Aib unumut qob gagam aninob quraum, namanimun e ba aninou munon banam gugum wurit wanungermari igunor.

²⁸Munon inubersiau tari Yisas wonou oau anmenima wonou oau mein end qas igoarar.