Read Usan Taitus 3 Bible Online

Taitus 3 - Usan bible

Taitus 3

¹Nonou munon yurau eng wurinob qamara wuri qenen gabman ne wurinou sarau munon eng wuri ii igo qob qamarari toat igorunor. Igo sarau ne qomon uber qas ebet igamari wurit rama igorunor.

²Wurinob qamara munon ger qob isi me wot qomorunor, ne me wurinob yogurunor. Qomon mein end igo munon gugum wuribanamsi igorunor.

³Qoan ininou gor misir uber ger me igub igamau. Ende at igumune Satan inbumaima in mingongir qib igunei. Mi gab oau naget ebet ne git goan end qas mismisir igoun eng mom inourima ten igunei. Munon qei wurisiningoar ne wurinomi gab oau naget ba, ende at wuri der inqarausiari in bo der wuri qarausi ende at igunei.

⁴Ego Qenu wonou qenungau wonou wes end inbanamsi igoar end munon inqubeiamor end ba dibesiarei.

⁵Wo eng ebeter eng in wonou sarau uber ger ubune im inimbag gab me abau. Ue, wonou uyes intoubar ne inqubei ne inbirogonima wau ber gas ende ubune Igomurur qau bo inseara igomot ubureminei.

⁶Munon inubersiau tari Yisas wo inqubeiamor end Qenu Igomurur qau ar isi init igiama dererei.

⁷Munon inubersiau tari wo ende inmusia gab ne Qenu in munon qoregen init qemerib qamb. End in bo munon igomot qenen bebereg igoarar qamb inmaribigor end in oabig qoat igoun eng.

⁸Qob eng apand ar.End ye qenungoum, ne birisi ende wurinob qamara igunor. Igub Qenut mom oabig qomon qoregen end mom naget igorunor. Sarau eng munon wuri nonogursia sarog big igorubour.

⁹Ego qob soagen irou qubei ne wurinou ur qoan sigiamot qamb ne qomont qiqamat agunub igour eng in gab qoasi wogun. In mom imbig igoun eng, qomon ende eng qomon uber ger imbig me toat igorunei.

¹⁰Munon sios qomon biisitet aba sios yurau purab tau-tau isunor eng ne qen garit qiyo a qen omburt irun wor. Ende ebeinen eng ne qob me igata gab eng mogirt wab wog.

¹¹Ne mom imbigan eng, munon ende gas eng wonou qomon boru eng ba magaramorei, werei uber end me igo. 3:12-15 Qob sasam

¹²Qen geret ye Artemas Tikikus nob wuriimurimine isari ibag ne qand Nikopolis end diab yege. Sani-sani qen gab Nikopolis end igorib qemerine igon end.

¹³Qomon imbigau munon ombur eng, Senas Apolos nob wuri qirunor eng ne wurimusub ibag oroar igoar.

¹⁴Ende ubune ininou munon yurau inimbig wuri init nonoguret ne munon qei mi ue gab abari wurimusiorubour. Wuri ar tagug igo eng Qenu qomon qoregen eng me imbigunorei.

¹⁵Munon gugum ye nob e igour eng nenet uber quraur. End ne ne gor munon inbanamsi Qenu qomon toat nonob igour eng in anit uber quraun eng wurinob ende qamara igunor. Qenu oau mein eng anmuaserama ten igoarar.