Read Usan Hibru 1 Bible Online

Hibru 1 - Usan bible

Hibru 1

¹Qoan ir Qenu ininou tonoan wurinob qamb ne Igomurur Qau munon qei oau wurimenima qen irou miteri werei wes-wes qamb gumat igurei.

²Isi yarab see eng Qenu wonou wau eng wonou qabarit end di ininob qamb igo. Wonou wau eng mi gugum qubeiom qamb wonou wot iyet wagerei igo. Mi gugum wonou uben end Qenu mi barsiarei.

³Qenu wonou begen aib eng wonou wau end wot isub init begent dererei. End wonou wau eng Qenu wonou iitari. End wonou qob eng qeretutnob igo end mi gugum qob end nonogursi igo. Wo sarau aib ebet qomon boru gugum biruet arir ugar end see Qenu sig aib wonou uberegent wes end bugab igo. 1:4-14 Qenu wonou wau enger yurau wuritanami igo

⁴Yisas wo eng aba sig uber gab ne Ur der enger wurinou munon aib maribagatarerei. End ne wo enger wurinou munon aib gigit igama wuri ii igour.

⁵Wo eng ebeiner end ne Qenu qoan ete qamarei:Ne yonou wau. See ye neba dibesiaum. End ne:Ye nonou Tain, ne ne yonou wau. Qenu qob ger ende gas enger wurit me qamb igamau.

⁶Qenu wonou wau qamar mot ag e darab qamar:Qenu wonou enger eng wuri gor wau eng unum bererimbour.

⁷Ne Qenu enger wurit igub qamar:Qenu wonou enger eng aba moon gas ende igour. Igo wonou sarau munon eng abari mut qarub gas ende di igour.

⁸Ne wonou wau end qamar:Io Qenu, ne munon baraitari qenen igoriban. Nonou munon yurau qomon qoregen end oroar wuriimbig igoan.

⁹Qomon qoregen ne mom qenunget ne qomon boru siningot igoan. End ne nonou Qenu qoregen welya nenet igimetet end ne neba dibesi ne Baraitari nemaribigorei. Nonou munon yurau qei ne sarog big igoan gas ende me ubunorei.

¹⁰Ende qamb bo qamar:Ne Munon Aib, qoan qanambig ai tat nob nonou ubent qoregen barsianei.

¹¹Mi gugum mom uburiba. Ne ai tat nob gor mi goan nai gas ende oboubour.

¹²Ne gor, ne wuri musub boat bigiban, munon ger mi goan boat musub big igo gas ende ebeiban. Ende at bo wuri uput qamb bigiban, munon ger mi goan uput big igo gas ende. Ego ne ger me uburab ne gor me igesereminenei, qenen ende igoriban. Ne uburau qen ger bais me igo.

¹³Qoan Qenu ete qamarei:Ne yonou uberegent end bogama ne nonou munon qarau eng wuriimurimine wurinugutumugar igoriban. Qoan Qenu der enger ger qob ende at wot qamarei qiyo? Sig ue ar.

¹⁴Enger wuri igomurur, end Qenu wot sarau baab igour. Igamari Qenu wonou munon yurau wuriqubeimb qamb maribigor eng wuri nonogursi igour.