Read Usan Yems 5 Bible Online

Yems 5 - Usan bible

Yems 5

¹Ne see an munon mind irou eng ye qob e qemeribam eng igar: see in igom igoun eng qen sindomund ego an aninomit igub mind irou ba qiumuni big ne qen geret misinam yoosi igorun qamb ebet igoumon. An ag e igoumon end mind uber-uber ba end mismisir at qib igoumon. Ne an mi musub nub qarib igoumon. Ende ebet ne munon qei mindigar qob ue eng ar wuriduimari umumir eng wuri bo taui qamb me aningaramour. An munon sarau batar igour eng taui qamb wurimurimar wogub nomon qur tau qas wurisab igoumon. An ende abari munon aninou man suab mani gonatar igour eng wuri der Qenut simot eari Munon Aib qeretutnob eng qo igorei. End ne qomon boru anmuaserembar eng piara. Ende aba gab an qiet aimot eari wegiba. An mind qamb mi goan qamb eng biet ne mi warau nub ugarei. Aninou mi qenengi nob eng uyan norei. End ne aninou qomon boru eng dibenara diban guboumon. Ende ebet ne aninou gitgoan eng mut oau gas ende ebeiba. 5:7-11 Nonoguret igo munon Barai qoat igumune deriner

⁷Io, munon banam, an quguraget gab eng an end uburab me isar. Mom nonoguret igo ne Munon Aib qoat igamari deriner. Munon ger mi ubub wogub qoat igama mani qen yara gab nonoguret igo ne ber opur nub igo.

⁸Eng gas ende an gor ende nonoguret igoarar. Munon Aib bo deribar eng qen pi burab igo.

⁹Aninou bo der qi qamat qamb mindigar qob qi qitamb ende me abar. Ende oboumon eng munon aninou qomon qereiminer eng taui anquguragsieriba. Munon eng Yisas anit dibenerib pisi igo.

¹⁰Qoan Qenu qob gigit qamarau munon eng Munon Aib unumot qamb qiroari munon qarau wuri sumungasiari wuri end wurit uburab me isau. Wuri mom nonoguret igour eng an imbigar. Wuri eng animbigau gas ende ebetemir eng. An eng gab toat an gor ende abar.

¹¹Ete qamb igoun eng: “Munon quguraget gab eng end wot uburab me isa gab eng wuri mismisir igorunor.” Munon ger unum Yop qoan ebeter eng qob suari igub igoumon eng. Wo borusi quguragetar eng end wot uburab me isau. Qugurau eng mom wotanamima ne Munon Aib musia mismisirer eng mom imbig igoumon eng. Munon Aib wo sig-sig mom inqenungar inmusub igo. 5:12-18 Munon qoregen Qenu qebi apand qemeriner eng qeretutnob igo

¹²Io, an mi qei abar qamb aninob qemeribam eng ete: An mi ar qiyo mi gag ger ebet igamari animbag qamarari gab eng der qob nonogursi ai unumir qiyo, a Qenu ginam unum ir qiyo a mi qei-qei unumir, ‘sig apand’ ende me qamarar. ‘Ue’ qamb gab eng, ue gari qamarar. A ‘apand’ qamb, apand gari qamarar. Qob qetopur gab ar gag sig apand’ qomorunon eng Qenu anquguragsieriba.

¹³Aninou munon end ger qomon soagen ebet quguraget gab eng Qenu simot eeiner. Ne ger sig-sig mom mismisir gab eng Qenut igub uru weriner.

¹⁴Ne an ger toar wara gab eng sios munon barai tari end wurit qamara yarab ne Yisas unumir wer ya wot qositet ne Qenu nob qamarari uberburiba.

¹⁵Wuri Qenut oabig ne qomorunor eng Munon Aib toar eng musieriba. Qomon boru qei ten igoriner eng gor wot birueiba.

¹⁶End ne aninou qomon boru eng aninou munon banam end wurit dibes qamarar. Ende abari an Qenu qebi qamarari wurimusub ne an gor anmusieriba. Munon qoregen wo munon uber end Qenut qemeriner eng qeretutnob igo end munon wurimusieriba.

¹⁷Elaiya wo in gas ende gari, ego wo ya me der qamb Qenu qebi qamara qob toat ya togun ombur gari ne bo inaun 6-ende ya me darau.

¹⁸Ende igama ne bo ya weima der qamb bo nob qamara ya weima dara mi gugum bo uber diamirei. 5:19-20 In munon qomon boru aba gab musiorun

¹⁹Io, an yurau end ger Qenu qob apand eng mogirt wab wogub qib igama ne bo ger der nonogursi qubei nob igo gab eng,

²⁰munon eng ete misir iginer: Munon ger munon qomon boru at qib igama ba morima ne munon qomon boru at qiriner eng mom qomon boru mogirt wab wogub Qenut iginer eng, munon ba moriminer eng wo munon qomon boru at qiriner eng wonou igomurur ba musia bo me uminerei. Qomon eng gas ende in gugum oboun eng Qenu ininou qomon boru irou init wab arir ugeiba.