Read Usan Qob dibentar eng 8 Bible Online

Qob dibentar eng 8 - Usan bible

Qob dibentar eng 8

¹Ne sipsip yeim buk qungau uyor sasam eng boopurama igom eng mi toau ger ue, ne qob ger Qenu ginamt end me igau, ue ar. Isi yarab qen bais dirigor nami ende umi igoi wogub gam eng, Qenu munon yurau enger 7-ende ain mer gusit igour eng 7-ende baub yar Qenu menmant end naget igurei.

³Igamari enger ger der mian yab igour nam qab qani end naget igoai. Wo tabin ger wambin qogomnob eng ubuet bigari deara utemirei baub igoai. Wambin eng guma iap qogom ten Qenu munon yurau wot qebi qamb igour eng morogot iroa oau pomaimoiner qamb. Wo der Qenu nam qab bugab igo menmant wes end mian yab big igour nomon qab qani end naget igoai.

⁴Ende igo wambin qogom eng guma Qenu munon yurau simot wot eab igour toau eng iap qogom eng nob morogot enger wogub Qenu menmant irarei.

⁵Oab ubura ne enger tabin eng ba mut nomon qab erer gumeter eng ipur qet nob mut ten usisi ba tabin end arir ten ba ag qumo bigorei. Biga ne ai qebisi qamb ende aba ai uyerei. 8:6-13 Enger 4-ende ain mer gusiamirei

⁶Biga enger 7-ende ain mer 7 baub igour eng qanam big gusimb at igurei.

⁷Ne enger ger der ain mer qamar gusima ne ya gitet mut nob qeru warub ag qumo deremirei. Darab ai tau ombur gari qereiamir eng tau ger end isub nam misugan qamb eng oab uburemirei.

⁸Ne enger ger bo wonou ain mer eng gusima mi ger ai qaur gas ende mut oab igama ten ariramari tomon yat isorei. Isub tomon ya tau ombur gari qereiamir eng tau geret isub yag wai tabin nob end igour eng wuri oa gugum umb ne boruburab uburemirei.

¹⁰Ne bo enger ger der wonou ain mer gusima ne tapai aib ger urut gas ende oab nerer Qenu ginam wogub ag dererei. Darab ya qubir tau ombur gari qereiamir eng ya tau geret isub tubub ya qubir ya tumun qamb eng iriget isorei.

¹¹Tapai eng unum, ‘uter” qamb igour. Ya qubir tau ombur gari qereiamir eng ya tau geret qubir gugum uyeriri burab uburerei. Ende aba munon irou ya eng niari wuri irigara umb uburemirei.

¹²Ne bo enger 4-eng der wonou ain mer eng gusiamorei. Ne worom, inaun, tapai qamb eng gugum tau 3-ende qereiamirei. Worom tau ger borusiamirei, ne inaun gor tau ger borusiamirei, ne tapai yurau igeragart borusiamirei. End worom asiemau qen end igeragart itum igoai. Ne inaun gor ende sig, ne tapai yurau igeragart itum igurei.

¹³Ne asi gam eng morogan piou aib ger erer qitet qib igo qabari unat ete at qamb qib igoai, “borumesis, an munon gugum ai qent igoumon eng mai obounon qi? Enger ombur gari igour eng wurinou ain mer eng gusimari munon gugum boruburubour.”