Read ھازىرقى زامان ئۇيغۇرچە تەرجىمىسىUyghurche Muqeddes Kitab Jemiyiti- پادىشاھلار 1-قىسىم 1 Bible Online

پادىشاھلار 1-قىسىم 1 - ھازىرقى زامان ئۇيغۇرچە تەرجىمىسىUyghurche Muqeddes Kitab Jemiyiti- bible

پادىشاھلار 1-قىسىم 1

¹داۋۇت پادىشاھ ياشىنىپ، قېرىپ قالغاچقا، ئۇنىڭغا بىرقانچە يوتقان يېپىپ قويسىمۇ ئىسسىمايتتى.

²شۇڭا، ئادەملىرى ئۇنىڭغا: _ پادىشاھ ئالىيلىرى، بىز سىلىگە ئىپپەتلىك قىزدىن بىرنى تېپىپ ئەكېلەيلى. ئۇ خىزمەتلىرىنى قىلىپ، ھالىلىرىدىن خەۋەر ئالسۇن. سىلىنى ئىسسىتىش ئۈچۈن ھەمراھ بولسۇن، _ دېدى.

³شۇنىڭ بىلەن ئۇلار پۈتكۈل ئىسرائىلىيە زېمىنىدىن گۈزەل قىز ئىزدەپ، شۇنېملىق ئابىشاگ ئىسىملىك بىر قىزنى تېپىپ، پادىشاھنىڭ ھۇزۇرىغا ئېلىپ كەلدى.

⁴ئۇ شۇنچىلىك گۈزەل قىز ئىدى، ئۇ پادىشاھنىڭ خىزمىتىنى قىلىپ، ھالىدىن خەۋەر ئالدى. بىراق پادىشاھ ئۇ قىز بىلەن بىللە بولمىدى.

⁵شۇ چاغلاردا، داۋۇت پادىشاھنىڭ خوتۇنى خاگگىتتىن تۇغۇلغان ئوغلى ئادونىيا «مەن پادىشاھ بولىمەن» دەپ كۆرەڭلەپ يۈردى. ئۇ ئۆزىگە بىر جەڭ ھارۋىسى بىلەن ئاتلارنى شۇنداقلا 50 چاپارمەننى ھازىرلىدى.

⁶ئاتىسى ئۇنى ئەزەلدىن «نېمە ئۈچۈن بۇنداق قىلىسەن؟» دەپ ئەيىبلىمەيتتى. ئۇ ئابسالومدىن كېيىنكىسى بولۇپ، ئۇمۇ ناھايىتى كېلىشكەن يىگىت ئىدى.

⁷ئادونىيا، زىرۇيانىڭ ئوغلى قوشۇننىڭ باش سەركەردىسى يوئاب ۋە روھانىي ئابىياتار بىلەن مەسلىھەتلىشىپ، ئۇلارنىڭ قوللىشىغا ئېرىشتى.

⁸ئەمما روھانىي زادوق، يىھويادانىڭ ئوغلى ياساۋۇللار باشلىقى بىنايا، ناتان پەيغەمبەر، شىمئى، رېئى ۋە داۋۇتنىڭ باھادىرلىرىدىن ھېچكىم ئادونىيانى قوللىمىدى.

⁹بىر كۈنى ئادونىيا ھەممە قېرىنداشلىرى، يەنى پادىشاھنىڭ باشقا ئوغۇللىرى ۋە يەھۇدىيەنىڭ پۈتۈن ئوردا ئەمەلدارلىرىنى روگېل بۇلىقى يېنىدىكى «يىلان قورام تېشى»نىڭ يېنىغا چاقىرىپ، قوي، كالا ۋە بوردالغان تورپاقلارنى سويۇپ قۇربانلىق قىلدى.

¹⁰ئەمما ئۇ ناتان پەيغەمبەر، بىنايا، ئاتىسىنىڭ باھادىرلىرى، شۇنداقلا قېرىندىشى سۇلايماننى چاقىرمىدى.

¹¹ناتان پەيغەمبەر سۇلايماننىڭ ئانىسى باتشەباغا: _ داۋۇت پادىشاھنىڭ خوتۇنى خاگگىتنىڭ ئوغلى ئادونىيا پادىشاھ بولۇۋاپتۇ. پادىشاھىمىز داۋۇتنىڭ بۇ ئىشلاردىن قىلچە خەۋىرى يوق ئىكەن، سىلى بۇنى ئاڭلىمىدىلىمۇ؟

¹²مەن سىلىگە بىر مەسلىھەت بېرەي، سىلى ئۆز جانلىرى ۋە ئوغۇللىرى سۇلايماننىڭ جېنىنى قۇتقۇزۇپ قالماقچى بولسىلىرى،

¹³دەرھال داۋۇت پادىشاھنىڭ ئالدىغا كىرسىلە، ھەمدە ئۇنىڭغا: «ئى پادىشاھ ئالىيلىرى، بۇرۇن ئۆزلىرى ئاجىزەلىرىگە ‹ئوغلۇڭ سۇلايمان ماڭا ۋارىسلىق قىلىپ، تەختىمدە ئولتۇرىدۇ› دەپ قەسەم قىلغان ئەمەسمىدىلە؟ ئەمدى ئادونىيا قانداق بولۇپ پادىشاھ بولۇپ قالدى؟» دېسىلە.

¹⁴سىلى پادىشاھ بىلەن سۆزلىشىۋاتقاندا، مەن كىرىپ سىلىنىڭ گەپلىرىنى قوللاپ-قۇۋۋەتلەيمەن، _ دېدى.

¹⁵شۇنىڭ بىلەن باتشەبا پادىشاھنىڭ ھۇجرىسىغا كىردى. (بۇ چاغدا پادىشاھ بەك قېرىپ كەتكەن بولۇپ، شۇنېملىق قىز ئابىشاگ ئۇنىڭ ھالىدىن خەۋەر ئالاتتى.)

¹⁶باتشەبا پادىشاھقا ئېگىلىپ تەزىم قىلدى. پادىشاھ ئۇنىڭدىن: _ نېمە تەلىپىڭ بار؟ _ دەپ سورىدى.

¹⁷باتشەبا: _ ئالىيلىرى، سىلى بۇرۇن پەرۋەردىگار خۇدانىڭ ئالدىدا ئاجىزەلىرىگە قەسەم قىلىپ تۇرۇپ: «ئوغلۇڭ سۇلايمان ماڭا ۋارىسلىق قىلىپ، تەختىمدە ئولتۇرىدۇ» دېگەنىدىلە.

¹⁸ئەمما ھازىر ئادونىيا پادىشاھ بولۇۋاپتۇ! ئى ئالىيلىرى، سىلى بۇنىڭدىن تېخى خەۋەرسىز.

¹⁹ئۇ نۇرغۇن كالا، بوردالغان تورپاق ۋە قويلارنى قۇربانلىق قىلىپ، سىلىنىڭ ئوغۇللىرىنىڭ ھەممىسىنى ھەمدە روھانىي ئابىياتار، باش سەركەردە يوئابلارنى چاقىرىپ، ئوغۇللىرى سۇلايماننى چاقىرماپتۇ.

²⁰ئى پادىشاھ ئالىيلىرى، ھازىر بارلىق ئىسرائىل خەلقىنىڭ كۆزى سىلىدە، ئۇلار سىلىنىڭ كىمنى ئۆز تەختلىرىدە ۋارىسلىققا ئولتۇرغۇزىدىغانلىقلىرىنى كۈتۈپ تۇرىدۇ.

²¹ئەگەر ئۇنداق قىلمىسىلا، سىلىدىن كېيىن قالساق، ئادونىيانىڭ بىزنى جىنايەتچى قاتارىدا كۆرۈشى ئېنىق، _ دېدى.

²²باتشەبا پادىشاھ بىلەن سۆزلىشىۋاتقاندا، ناتان پەيغەمبەر كەلدى.

²³پادىشاھنىڭ مۇلازىملىرى ئۇنىڭغا ناتان پەيغەمبەرنىڭ كەلگەنلىكىنى خەۋەر قىلدى. ناتان پەيغەمبەر پادىشاھنىڭ ئالدىغا كېلىپ، بېشىنى يەرگە تەگكۈزۈپ تەزىم قىلىپ،

²⁴پادىشاھقا: _ ئى پادىشاھ ئالىيلىرى، سىلى بۇرۇن راستتىنلا «ئادونىيا ماڭا ۋارىسلىق قىلىپ، تەختىمدە ئولتۇرىدۇ» دېگەنمىدىلە؟

²⁵بۈگۈن ئادونىيا نۇرغۇن كالا، بوردالغان تورپاق ۋە قويلارنى قۇربانلىق قىلىپ، سىلىنىڭ ئوغۇللىرىنىڭ ھەممىسىنى، سەركەردىلەرنى ۋە روھانىي ئابىياتارنى چاقىرىپتۇ. ئۇلار: «ياشىسۇن پادىشاھ ئادونىيا!» دەپ توۋلىشىپ، ئۇنىڭ ھۇزۇرىدا يەپ-ئىچىشىۋېتىپتۇ.

²⁶كەمىنىلىرىنى، روھانىي زادوقنى، يىھويادانىڭ ئوغلى بىنايا ۋە ئوغۇللىرى سۇلايماننى چاقىرماپتۇ.

²⁷ئى، پادىشاھ ئالىيلىرى، سىلى ئەمەلدارلىرىنىڭ ھېچقايسىسىغا كىمنىڭ تەختلىرىگە ۋارىسلىق قىلىدىغانلىقىنى جاكارلىماي تۇرۇپ، ئۇلارنىڭ شۇنداق قىلىشى سىلىنىڭ خاھىشلىرى بىلەن بولدىمۇ؟ _ دېدى.

²⁸داۋۇت پادىشاھ: _ باتشەبانى چاقىرىڭلار! _ دېدى. باتشەبا پادىشاھنىڭ ھۇزۇرىغا كىردى.

²⁹[29‏-30] پادىشاھ باتشەباغا: _ مەن ئىسرائىللار ئېتىقاد قىلىپ كەلگەن پەرۋەردىگارنىڭ ئالدىدا ساڭا قەسەم قىلىپ «سېنىڭ ئوغلۇڭ سۇلايمان ماڭا ۋارىسلىق قىلىپ، مېنىڭ تەختىمدە ئولتۇرىدۇ» دېگەنىدىم. ھازىر مېنى نۇرغۇن بالايىئاپەتلەردىن قۇتقۇزغان مەڭگۈ ھايات پەرۋەردىگار ئالدىدا شۇنداق قەسەم قىلىمەنكى، بۇ سۆزۈمنى بۈگۈن ئەمەلگە ئاشۇرىمەن، _ دېدى.

³⁰

³¹باتشەبا بېشىنى يەرگە تەگكۈزۈپ تەزىم قىلىپ: _ پادىشاھ ئالىيلىرى مەڭگۈ ياشىغايلا! _ دېدى.

³²داۋۇت پادىشاھ: _ روھانىي زادوق، ناتان پەيغەمبەر ۋە يىھويادانىڭ ئوغلى بىنايانى چاقىرىڭلار، _ دېدى. شۇنىڭ بىلەن ئۇلار پادىشاھنىڭ ئالدىغا كەلدى.

³³پادىشاھ ئۇلارغا: _ سىلەر مېنىڭ ياساۋۇللىرىمنى ئېلىپ، ئوغلۇم سۇلايماننى مېنىڭ ئۆز قېچىرىمغا مىندۈرۈپ، گىھون بۇلىقىغا ئېلىپ بېرىڭلار.

³⁴ئۇ يەردە روھانىي زادوق ۋە ناتان پەيغەمبەر ئىككىڭلار سۇلايماننىڭ بېشىغا ياغ قۇيۇپ، ئۇنى ئىسرائىلىيەنىڭ پادىشاھلىقىغا تەيىنلەپ، بۇرغا چېلىپ: «ياشىسۇن سۇلايمان پادىشاھ!» دەپ توۋلاڭلار

³⁵ۋە ئۇنىڭ كەينىدىن مېڭىڭلار. ئۇ قايتىپ كېلىپ، تەختىمدە ئولتۇرۇپ، مېنىڭ ئورنۇمدا پادىشاھ بولسۇن. مەن ئۇنى ئىسرائىلىيە ۋە يەھۇدىيەگە ھۆكۈمران قىلىپ تەيىنلىدىم، _ دېدى.

³⁶يىھويادانىڭ ئوغلى بىنايا پادىشاھنىڭ سۆزىگە جاۋاب قايتۇرۇپ: _ ئامىن! پادىشاھ ئالىيلىرىنىڭ پەرۋەردىگارى خۇدانىڭ ئەمرى شۇنداق بولغاي!

³⁷پەرۋەردىگار بۇرۇن پادىشاھ ئالىيلىرىغا يار بولغاندەك، سۇلايمانغىمۇ يار بولغاي ۋە ئۇنىڭ پادىشاھلىقىنى داۋۇت پادىشاھنىڭكىدىنمۇ قۇدرەتلىك قىلغاي، _ دېدى.

³⁸شۇنىڭ بىلەن روھانىي زادوق، ناتان پەيغەمبەر ۋە يىھويادانىڭ ئوغلى بىنايا، شۇنداقلا كىرېتلەر بىلەن پىلېتلەردىن تەركىب تاپقان ياساۋۇللار سۇلايماننى داۋۇت پادىشاھنىڭ قېچىرىغا مىندۈرۈپ، ئۇنى گىھون بۇلىقىغا ئېلىپ باردى.

³⁹روھانىي زادوق مۇقەددەس چېدىردىن ئېلىپ كەلگەن مۈڭگۈزدىكى ياغنى ئېلىپ، شۇ يەردە سۇلايماننىڭ بېشىغا قۇيدى. ئۇلار بۇرغا چېلىشىغا بارلىق كىشىلەر «ياشىسۇن سۇلايمان پادىشاھ!» دەپ توۋلاشتى.

⁴⁰ئۇلار سۇنايلارنى چېلىشقان ھالدا سۇلايمانغا ئەگىشىپ ماڭدى. ئۇلارنىڭ شاد-خۇراملىق بىلەن تەنتەنە قىلىشلىرىدىن يەر-جاھان لەرزىگە كەلدى.

⁴¹ئادونىيا مېھمانلىرى بىلەن زىياپەتنى تۈگىتىپ تۇرۇشىغا بۇ شاۋقۇن-سۈرەننى ئاڭلىدى. يوئاب بۇرغا ئاۋازىنى ئاڭلاپ: _ شەھەردىن كېلىۋاتقان بۇ نېمە ئاۋاز؟ _ دېدى.

⁴²شۇ پەيتتە، روھانىي ئابىياتارنىڭ ئوغلى يوناتان كەلدى. ئادونىيا: _ كەل، سەن بىر ياخشى ئادەمسەن، بىزگە چوقۇم ياخشى خەۋەر ئېلىپ كەلدىڭ، _ دېدى.

⁴³يوناتان ئادونىياغا: _ ياق، پادىشاھىمىز داۋۇت ئالىيلىرى سۇلايماننى پادىشاھ قىلىپ تەيىنلىدى.

⁴⁴پادىشاھ داۋۇت سۇلايماننى روھانىي زادوق، ناتان پەيغەمبەر، يىھويادانىڭ ئوغلى بىنايا، شۇنداقلا كىرېتلەر ۋە پىلېتلەردىن تەركىب تاپقان ياساۋۇللار بىلەن بىللە يولغا سالدى. ئۇلار سۇلايماننى داۋۇت پادىشاھنىڭ قېچىرىغا مىندۈردى.

⁴⁵روھانىي زادوق بىلەن ناتان پەيغەمبەر سۇلايماننى گىھون بۇلىقىنىڭ يېنىدا پادىشاھلىققا تەيىنلىدى. ئۇلار شاد-خۇراملىق بىلەن تەنتەنە قىلىشىپ ماڭغاچقا، شەھەر ئىچى شاۋقۇن-سۈرەنگە تولدى. بۇ دەل سىلى ئاڭلىغان شاۋقۇن-سۈرەندۇر.

⁴⁶سۇلايمان پادىشاھلىق تەختىدە ئولتۇردى.

⁴⁷ئۇنىڭ ئۈستىگە پادىشاھنىڭ ئەمەلدارلىرى كېلىپ، پادىشاھىمىز داۋۇتنى تەبرىكلەپ: «سىلى ئېتىقاد قىلىپ كەلگەن خۇدا سۇلايماننىڭ شان-شۆھرىتىنى سىلىنىڭكىدىنمۇ زىيادە قىلسۇن، ئۇنىڭ پادىشاھلىقىنى سىلىنىڭكىدىنمۇ قۇدرەتلىك قىلسۇن» دېيىشتى. پادىشاھ كارىۋىتىدا يېتىپ تۇرۇپ، پەرۋەردىگارغا سەجدە قىلىپ،

⁴⁸مۇنداق دېدى: «پەرۋەردىگار _ ئىسرائىللار ئېتىقاد قىلىپ كەلگەن خۇداغا ھەمدۇسانالار بولغاي، ئۇ بۈگۈن ئەۋلادىمدىن بىرسىنى تەختىمگە ۋارىسلىق قىلدۇرۇپ، ئۇنى ئۆز كۆزۈم بىلەن كۆرۈشكە نېسىپ قىلدى»، _ دېدى.

⁴⁹ئادونىيانىڭ مېھمانلىرى بۇنىڭدىن قورقۇشۇپ، ئورۇنلىرىدىن تۇرۇشتى-دە، پاتىپاراق بولۇشۇپ، ئۆز يوللىرىغا راۋان بولۇشتى.

⁵⁰ئادونىيا سۇلايماندىن قورقۇپ، يۈگۈرۈپ بېرىپ، مۇقەددەس چېدىرىنىڭ ئالدىدىكى قۇربانلىق سۇپىسىنىڭ ئېگىز چىقىرىلغان بۇرجىكىنى چىڭ تۇتۇۋالدى. [1]

⁵¹بىر كىشى سۇلايمانغا: _ ئادونىيا سىلىدىن قورقۇپ، قۇربانلىق سۇپىسىنىڭ بۇرجىكىنى چىڭ تۇتۇۋېلىپ، «سۇلايمان پادىشاھ مەن قۇلىنى قىلىچلاپ ئۆلتۈرمەسلىككە قەسەم قىلسۇن» دەپ ئۆتۈنۈۋاتىدۇ، _ دېدى.

⁵²سۇلايمان: _ ئەگەر ئۇ ساداقەتمەن بولسا، ئۇنىڭ بىر تال مويىغىمۇ زىيان-زەخمەت يەتمەيدۇ. لېكىن ئۇ بىرەر يامان غەرەزدە بولىدىكەن، چوقۇم ئۆلتۈرۈلىدۇ، _ دېدى.

⁵³شۇنىڭ بىلەن سۇلايمان پادىشاھ ئادەم ئەۋەتىپ، ئۇنى قۇربانلىق سۇپىسىدىن ئېلىپ كەلدى. ئۇ كېلىپ سۇلايمان پادىشاھقا تەزىم قىلدى. سۇلايمان ئۇنىڭغا: _ ئۆيۈڭگە قايتقىن، _ دېدى.