Read ھازىرقى زامان ئۇيغۇرچە تەرجىمىسىUyghurche Muqeddes Kitab Jemiyiti- پادىشاھلار 1-قىسىم 13 Bible Online

پادىشاھلار 1-قىسىم 13 - ھازىرقى زامان ئۇيغۇرچە تەرجىمىسىUyghurche Muqeddes Kitab Jemiyiti- bible

پادىشاھلار 1-قىسىم 13

¹ياروبئام پادىشاھ قۇربانلىق سۇپىسىنىڭ يېنىدا تۇرۇپ ئىسرىق سېلىۋاتقاندا، پەرۋەردىگارنىڭ ئەمرى بىلەن ئەۋەتىلگەن بىر پەيغەمبەر يەھۇدىيەدىن بەيتەلگە يېتىپ كەلدى.

²پەيغەمبەر پەرۋەردىگارنىڭ ئەمرى بويىچە قۇربانلىق سۇپىسىغا قاراپ تۇرۇپ، ۋارقىراپ مۇنداق دېدى: _ ئەي قۇربانلىق سۇپىسى! قۇربانلىق سۇپىسى! پەرۋەردىگار مۇنداق دەيدۇ: «بىلىپ قويغىنكى، داۋۇتنىڭ پۇشتىدىن يوشىيا ئاتلىق بىر ئوغۇل تۇغۇلىدۇ. ئۇ ھازىر سېنىڭ ئۈستۈڭدە ئىسرىق سېلىۋاتقان سەجدىگاھ روھانىيلىرىنى قۇربانلىق قىلىپ، ئۇلارنىڭ ئۇستىخانلىرىنى سېنىڭ ئۈستۈڭدە كۆيدۈرىدۇ.»

³(شۇ كۈنى ئۇ پەيغەمبەر بىر بېشارەت بېرىپ، مۇنداق دېدى: «پەرۋەردىگار شۇنداق بېشارەت بېرىدۇكى، بۇ قۇربانلىق سۇپىسى يېرىلىدۇ، ئۇنىڭ ئۈستىدىكى مايلاشقان كۈللەرمۇ يەرگە چېچىلىپ كېتىدۇ.»)

⁴ياروبئام پادىشاھ پەيغەمبەرنىڭ قۇربانلىق سۇپىسىغا قاراپ تۇرۇپ، ۋارقىراپ قىلغان گېپىنى ئاڭلاپلا، قۇربانلىق سۇپىسىنىڭ يېنىدا تۇرۇپ، قولىنى شىلتىپ، «تۇتۇڭلار ئۇنى!» دەپ ۋارقىرىدى، ئۇنىڭغا قارىتىپ شىلتىغان قولى پالەچ بولۇپ قېلىپ يىغىۋالالماي قالدى.

⁵(دەرۋەقە كېيىن خۇددى پەيغەمبەر پەرۋەردىگارنىڭ ئەمرى بويىچە بېشارەت بەرگىنىدەك قۇربانلىق سۇپىسى يېرىلىپ كەتتى، ئۇنىڭ ئۈستىدىكى مايلاشقان كۈللەرمۇ چېچىلىپ كەتتى.)

⁶پادىشاھ پەيغەمبەرگە: _ مەن ئۈچۈن پەرۋەردىگارىڭ خۇداغا دۇئا قىلىپ، قولۇمنى ئەسلىگە كەلتۈرۈپ قويۇشىنى تىلىسەڭ، _ دەپ يالۋۇردى. پەيغەمبەر پەرۋەردىگارغا يالۋۇرغانىدى، پادىشاھنىڭ قولى ئاۋۋالقىدەكلا ئەسلىگە كەلدى.

⁷پادىشاھ پەيغەمبەرگە: _ مەن بىلەن بارگاھىمغا بېرىپ، ئازراق ماغدۇرۇڭغا كېلىۋال، مەن ساڭا ئىنئام بېرىمەن، _ دېدى.

⁸_ ماڭا بايلىقلىرىنىڭ يېرىمىنى بەرسىلىمۇ سىلى بىلەن بارگاھلىرىغا بارمايمەن، ئۇ يەردە غىزا يېمەيمەن ۋە ئۇسسۇلۇق ئىچمەيمەن.

⁹چۈنكى پەرۋەردىگار ماڭا: «سەن غىزا يېسەڭ ۋە ئۇسسۇلۇق ئىچسەڭ بولمايدۇ، ئەسلى كەلگەن يولۇڭ بىلەن قايتساڭمۇ بولمايدۇ» دەپ بۇيرۇغان، _ دېدى پەيغەمبەر پادىشاھقا.

¹⁰شۇنىڭ بىلەن پەيغەمبەر بەيتەلگە كەلگەن يول بىلەن ئەمەس، باشقا يول بىلەن قايتتى.

¹¹بەيتەلدە تۇرىدىغان بىر ياشانغان پەيغەمبەر بار ئىدى. ئۇنىڭ ئوغۇللىرى كېلىپ، ئاتىسىغا يەھۇدىيەدىن كەلگەن پەيغەمبەرنىڭ ئاشۇ كۈنى بەيتەلدە قىلغان ھەممە ئىشىنى سۆزلەپ بەردى. پادىشاھقا ئېيتقان گەپلىرىنىمۇ دەپ بەردى.

¹²ئاتىسى ئۇلاردىن: «ئۇ پەيغەمبەر قايسى يول بىلەن قايتتى؟» دەپ سورىۋىدى، ئوغۇللىرى يەھۇدىيەدىن كەلگەن پەيغەمبەرنىڭ ماڭغان يولىنى كۆرسىتىپ بەردى.

¹³_ ئېشەكنى توقۇڭلار! _ دېدى ئۇ ئوغۇللىرىغا. ئوغۇللىرى ئېشەكنى توقۇپ تەييارلىدى. ئۇ ئېشەكنى مىنىپ،

¹⁴ھېلىقى پەيغەمبەرنى قوغلاپ ماڭدى. ئۇ يەھۇدىيەدىن كەلگەن پەيغەمبەرنىڭ بىر پىستە دەرىخىنىڭ ئاستىدا ئولتۇرغانلىقىنى كۆردى-دە، ئۇنىڭدىن: _ ئۆزلىرى يەھۇدىيەدىن كەلگەن پەيغەمبەر بولامدىلا؟ _ دەپ سورىدى. ئۇ: _ شۇنداق! _ دەپ جاۋاب بەردى.

¹⁵_ ئەمىسە مەن بىلەن يۈرسىلە، ئۆيگە بېرىپ، غىزا يېسىلە، _ دېدى ياشانغان پەيغەمبەر.

¹⁶_ مەن ئارقامغا قايتىپ، ئۆزلىرى بىلەن بىللە ئۆيلىرىگە بارالمايمەن، مۇشۇ يەردىمۇ سىلى بىلەن بىللە غىزالىنالمايمەن، ھەم ئۇسسۇلۇق ئىچەلمەيمەن،

¹⁷چۈنكى ماڭا پەرۋەردىگار: «سېنىڭ ئۇ يەردە غىزا يېيىشىڭگە ۋە ئۇسسۇلۇق ئىچىشىڭگە، ئەسلى يولۇڭ بىلەن قايتىشىڭغا بولمايدۇ» دەپ بۇيرۇغانىدى، _ دېدى يەھۇدىيەدىن كەلگەن پەيغەمبەر.

¹⁸_ مەنمۇ ئۆزلىرىگە ئوخشاش بىر پەيغەمبەرمەن. بىر پەرىشتە پەرۋەردىگارنىڭ ئەمرىگە بىنائەن ماڭا: «سەن يەھۇدىيەدىن كەلگەن ھېلىقى پەيغەمبەرنى ئۆيۈڭگە ئېلىپ قايت، بىر نەرسە يېسۇن، سۇ ئىچسۇن» دېگەنىدى، _ دېدى ياشانغان پەيغەمبەر. لېكىن ئۇ يالغان سۆزلىگەنىدى.

¹⁹شۇنداق قىلىپ يەھۇدىيەدىن كەلگەن پەيغەمبەر ئۇنىڭ بىلەن بىللە ئۇنىڭ ئۆيىگە بېرىپ، غىزا يېدى ۋە ئۇسسۇلۇق ئىچتى.

²⁰ئۇ ئىككىسى داستىخاندا غىزالىنىۋاتقاندا، يەھۇدىيەدىن كەلگەن پەيغەمبەرنى باشلاپ كەلگەن ياشانغان پەيغەمبەرگە پەرۋەردىگاردىن ۋەھىي كەلدى.

²¹ياشانغان پەيغەمبەر ھېلىقى پەيغەمبەرگە: _ پەرۋەردىگار مۇنداق دەيدۇ: «سەن، مەن پەرۋەردىگارىڭ خۇداغا بويسۇنماي، ئەمرىمگە خىلاپلىق قىلدىڭ.

²²مەن ساڭا: ‹غىزا يېيىشكە، ئۇسسۇلۇق ئىچىشكە بولمايدۇ› دېگەن بولساممۇ، سەن بۇ جايغا قايتىپ كېلىپ، غىزا يەپ، ئۇسسۇلۇق ئىچتىڭ. شۇنىڭ ئۈچۈن سېنىڭ جەسىتىڭ ئاتا-بوۋىلىرىڭنىڭ قەبرىسىگە دەپنە قىلىنمايدۇ»، _ دەپ توۋلىدى.

²³غىزا يەپ، ئۇسسۇلۇق ئىچىپ بولغاندىن كېيىن، پەيغەمبەرنى ئۆيىگە ئېلىپ كەلگەن ياشانغان پەيغەمبەر ئۆز ئېشىكىنى توقۇپ تەييار قىلىپ بەردى.

²⁴يەھۇدىيەدىن كەلگەن پەيغەمبەر يولىغا راۋان بولدى. يولدا ئۇنىڭغا بىر شىر ئۇچرىدى. شىر ئۇنى ئۆلتۈرۈپ، جەسىتىنى يولغا تاشلاپ قويدى. ئېشەكمۇ، شىرمۇ ئۇنىڭ جەسىتىنىڭ يېنىدا ئىدى.

²⁵يولدىن ئۆتكەنلەر بۇ جەسەتنىڭ يولغا تاشلاپ قويۇلغانلىقىنى، شىرنىڭ جەسەتنىڭ يېنىدا تۇرغانلىقىنى كۆرۈپ، ياشانغان پەيغەمبەر تۇرىدىغان شەھەرگە كېلىپ، بۇ ۋەقەنى شەھەردە سۆزلەپ يۈردى.

²⁶پەيغەمبەرنى يولدىن قايتۇرۇپ، ئۆيىگە ئېلىپ كەلگەن ياشانغان پەيغەمبەر ۋەقەنى ئاڭلاپ، «بۇ پەرۋەردىگارنىڭ ئەمرىگە خىلاپلىق قىلغان ھېلىقى پەيغەمبەر ئىكەن. خۇددى پەرۋەردىگار ئۆزى ئۇنىڭغا ئېيتقىنىدەك، ئۇنى شىرغا تاشلاپ بېرىپتۇ، شىر ئۇنى تالاپ ئۆلتۈرۈپتۇ» دېدى.

²⁷شۇنىڭ بىلەن ئوغۇللىرىغا «ماڭا ئېشەكنى توقۇپ بېرىڭلار» دەپ بۇيرۇدى. ئوغۇللىرى ئېشەكنى توقۇپ بەردى.

²⁸ئۇ يولغا چىقىپ، پەيغەمبەرنىڭ جەسىتىنىڭ يولدا ياتقانلىقى، ئېشەكنىڭمۇ، شىرنىڭمۇ جەسەتنىڭ يېنىدا تۇرغانلىقى، شىرنىڭ جەسەتنى يەۋەتمىگەنلىكى ۋە ئېشەكنىمۇ تالاپ ئۆلتۈرمىگەنلىكىنى كۆردى.

²⁹ياشانغان پەيغەمبەر ھازا ئېچىپ، دەپنە قىلىش ئۈچۈن پەيغەمبەرنىڭ جەسىتىنى ئېشەككە ئارتىپ، ئۆزىنىڭ شەھىرىگە ئەكەلدى.

³⁰ئۇ ئۇنىڭ جەسىتىنى ئۆزىنىڭ قەبرىسىگە دەپنە قىلدى. ئۇ ئوغۇللىرى بىلەن «ۋاي قېرىندىشىم!» دەپ، ھازا ئاچتى.

³¹دەپنە قىلىپ بولغاندىن كېيىن، ياشانغان پەيغەمبەر ئوغۇللىرىغا: «مەن ئۆلگەندىن كېيىن سىلەر مېنى يەھۇدىيەدىن كەلگەن پەيغەمبەر دەپنە قىلىنغان بۇ قەبرىگە دەپنە قىلىپ، جەسىتىمنى ئۇنىڭ يېنىغا قويۇڭلار.

³²ئۇنىڭ پەرۋەردىگارنىڭ ئەمرى بويىچە بەيتەلدىكى قۇربانلىق سۇپىسى بىلەن سامارىيەگە قاراشلىق شەھەرلەردىكى بۇتخانىلار توغرىسىدا قىلغان گەپلىرى چوقۇم ئەمەلگە ئاشىدۇ» دېدى.

³³شۇ ۋەقەلەردىن كېيىنمۇ ياروبئام پادىشاھ يامان يولىدىن قايتماي، ئاۋام خەلقنى بۇتخانىلارنىڭ روھانىيلىقىغا تاللاپ، خالىغانلىرىنى روھانىيلىق ۋەزىپىسىگە تەيىنلىدى.

³⁴بۇ گۇناھلىق ئىش ياروبئام پادىشاھ جەمەتىنىڭ كېيىنچە يەر يۈزىدىن قىرىلىپ، پۈتۈنلەي يوقىلىپ كېتىشىگە سەۋەب بولدى.