Read Муқаддас Китоб Uzbek Ибтидо 15 Bible Online

Ибтидо 15 - Муқаддас Китоб Uzbek bible

Ибтидо 15

¹Шундан кейин Эгамиз Ибромга[105] шу сўзларни ваҳийда аён қилди: — Қўрқма, Ибром, Мен сенга қалқон бўламан, сенга берадиган мукофотим буюк бўлади.

²— Эй Эгам Раббий! Сен менга нима ҳам берар эдинг?! Мен ҳамон бефарзандман, бутун мол — мулким Дамашқлик хизматкорим Элиазарга қолади.

³Сен менга фарзанд бермадинг, шунинг учун хонадонимда туғилган қулим менинг меросхўрим бўлади — да.

⁴Лекин Ибромга Эгамиз яна шу сўзларни аён қилди: — Йўқ, қулинг сенинг меросхўринг бўлмайди, ўзингнинг пушти камарингдан бўладиган ўғлинг сенинг ҳамма мол — мулкингга меросхўр бўлади.

⁵Сўнгра Эгамиз Ибромни ташқарига олиб чиқиб, унга: — Осмонга қара, агар юлдузларни санай олсанг, санаб кўр, — деди. Эгамиз яна айтди: — Сенинг наслинг ҳам ўша юлдузларга ўхшаган кўп бўлади.

⁶Ибром Эгамизга ишонди, Эгамиз уни ишончи учун солиҳ деб билди.

⁷Сўнгра Эгамиз унга деди: — Мен сенинг Эгангман, бу юртни сенга мулк қилиб бермоқчиман, шунинг учун сени Халдейдаги Ур шаҳридан[106] олиб чиққанман.

⁸— Эй Эгам Раббий! Бу юртни мерос қилиб олишимга қандай ишонч ҳосил қиламан? — деб сўради Ибром.

⁹— Менга уч ёшли ғунажин, уч ёшли эчки, уч ёшли қўчқор, каптар, мусичани олиб кел, — деди Эгамиз.

¹⁰Эгамиз нима айтган бўлса, ҳаммасини Ибром олиб келиб, сўйди. Ҳайвонларни узунасига ўртасидан бўлиб, бўлакларни бир — бирига қаратиб қўйди. Лекин қушларни иккига бўлмади.

¹¹Қузғунлар гўштларни ейиш учун қўнганда, Ибром қузғунларни ҳайдади.

¹²Қуёш ботаётганда, Ибромни қаттиқ уйқу босди. Уни қўрқув, ваҳима қамраб олди.

¹³Шунда Эгамиз Ибромга айтди: — Шуни яхши билиб қўйки, сенинг наслинг бегона юртда мусофир бўлиб яшайди. Тўрт юз йил қул бўлиб, жабр — зулм тортади.

¹⁴Лекин Мен сенинг наслингни қул қилган халқни жазолайман. Сенинг наслинг бегона юртдан катта бойлик билан чиқиб кетади.

¹⁵Сен жуда ҳам кексайиб оламдан ўтиб, дафн этиласан, ота — боболаринг ёнига хотиржам кетасан.

¹⁶Сенинг наслинг тўрт авлод ўтгандан кейин[107] бу ерга қайтиб келади, чунки Амор халқларининг қабиҳлиги ҳали ҳаддан ошмади[108].

¹⁷Қуёш ботиб, қоронғи тушгандан кейин, Ибром ичидан тутун чиқиб турган тоғорани ва ёнаётган машъалани кўрди. Ўша тоғора ва машъала бўғизланган ҳайвон бўлаклари орасидан ўтди[109].

¹⁸Шундай қилиб, ўша куни Эгамиз Ибром билан аҳд қилди ва шундай деди: — Мен сенинг наслингга Мисрдаги дарёдан[110] тортиб буюк Фурот дарёсигача бўлган жойларни

¹⁹— Хайин, Ханаз, Кадмон,

²⁰Хет, Париз, Рафа,

²¹Амор, Канъон, Гиргош, Ёбус халқларининг ерларини бераман.