Read Муқаддас Китоб Uzbek Ибтидо 28 Bible Online

Ибтидо 28 - Муқаддас Китоб Uzbek bible

Ибтидо 28

¹Шундай қилиб, Исҳоқ Ёқубни чақиртириб, уни дуо қилди ва шундай маслаҳат берди: — Канъонлик қизларга уйланма.

²Ҳозироқ Паддон — Орамга[201] — бобонг Батувалнинг хонадонига жўна. У ерда тоғанг Лобоннинг қизларидан бирортасига уйлан.

³Қодир Худо барака бериб, сени кўпайтирсин. Сенинг наслингдан кўп халқлар келиб чиқсин.

⁴Худо Иброҳимга ваъда қилган баракасини сенга ва сенинг наслингга ато қилсин. Биз ҳозир мусофир бўлиб яшаётган, Худо Иброҳимга берган шу юрт сенинг мулкинг бўлсин.

⁵Шундай қилиб, Исҳоқ Ёқубни жўнатди. Ёқуб Паддон — Орамга — Орамлик[202] Батувалнинг ўғли, тоғаси Лобонникига кетди.

⁶Эсов эшитдики, отаси Ёқубни дуо қилиб, уни Паддон — Орамга жўнатибди. Ёқуб ота — онасининг гапларига итоат этиб, Паддон — Орамга кетибди. Отаси Ёқубга: “Ўша ердан уйлангин”, дебди, “Канъонлик қизларга уйланма”, деб огоҳлантирибди.

⁸Канъонлик хотинлари отасига ёқмаслигини Эсов тушуниб етди.

⁹Эсов амакиси Исмоилнинг хонадонига борди ва хотинлари устига, Иброҳим ўғли Исмоилнинг қизларидан бирига уйланди. Янги хотинининг исми Махалат эди. Махалатнинг Наваёт[203] деган акаси ҳам бор эди.

¹⁰Ёқуб Бершеба шаҳридан чиқиб, Хорон[204] томонга қараб кетди.

¹¹У бир жойга етиб келганда, кун ботган эди. Шунинг учун ўша ерда тунашга тўхтади. У бир тош топди — да, тошни бошининг остига қўйиб ухлагани ётди.

¹²Бир пайт у тушида бир зинапояни[205] кўрди. Зинапоянинг пасти ерга, тепаси эса осмонга тегиб турганмиш. Худонинг фаришталари зинапоядан чиқиб, тушаётган эмишлар.

¹³Зинапоянинг ёнида[206] Эгамиз турган эмиш. Эгамиз Ёқубга шундай дебди: — Мен бобонг Иброҳимнинг, отанг Исҳоқнинг Худоси — Эгангман. Ҳозир сен ётган ер ўзингники бўлади. Бу ерни сенга ва сенинг наслингга бераман.

¹⁴Сенинг наслинг ернинг қуми сингари сон — саноқсиз бўлади. Улар ғарбу шарққа, шимолу жанубга қараб ер юзига ёйилиб кетадилар. Ер юзидаги ҳамма халқлар сен ва сенинг наслинг орқали барака топади.

¹⁵Шуни билгинки, Мен сен билан биргаман, қаерга бормагин, Мен сени сақлайман. Шу юртга сени яна қайтариб олиб келаман. Мен сени ҳеч қачон тарк этмайман, берган ваъдаларимни охиригача бажараман.

¹⁶Ёқуб уйғониб кетди ва: “Ҳақиқатан ҳам Эгамиз шу ерда экан, мен эса буни билмабман”, деди.

¹⁷У қўрқиб кетди: “Бу жой Худонинг уйи экан, самога очиладиган дарвозанинг ўзи! Нақадар қўрқинчли — я бу жой!” деди.

¹⁸Ёқуб саҳарда турди. Бошининг остига қўйган тошни олиб, ёдгорлик қилиб ўрнатди. Кейин ёдгорлик тошининг устидан Худога атаб зайтун мойи қуйди.

¹⁹Илгари бу жойнинг номи Луз эди. Ёқуб эса бу жойга Байтил[207] деб ном берди.

²⁰Сўнг Ёқуб қуйидагича қасам ичди: “Агар Худо мен билан бирга бўлса, борадиган шу йўлимда мени асраса, менга ризқ — рўзимни ва кийим берса,

²¹отамнинг хонадонига эсон — омон қайтариб олиб келса, Эгам менинг Худойим бўлади.

²²Мен ёдгорлик қилиб ўрнатган шу тош Худога сажда қиладиган жой бўлади. Худо менга берган ҳамма нарсанинг ўндан бирини ушр қилиб албатта бераман.”