Read Муқаддас Китоб Uzbek Ибтидо 46 Bible Online

Ибтидо 46 - Муқаддас Китоб Uzbek bible

Ибтидо 46

¹Шундай қилиб, Ёқуб[321] бутун мол — мулкини олиб, йўлга чиқди. У Бершебага[322] етиб келиб, отаси Исҳоқнинг Худосига қурбонликлар қилди.

²Тунда Худодан Ёқубга ваҳий келди: — Ёқуб! Ёқуб! — Лаббай! — деди у.

³— Мен Худоман, отангнинг Худосиман, — деди Худо. — Қўрқмасдан Мисрга боравер, Мен у ерда сендан буюк халқ яратаман.

⁴Мен сен билан бирга Мисрга бораман. Сен Юсуфнинг қўлида жон берасан. Вақти келиб, Сенинг наслингни Ўзим Мисрдан олиб чиқаман.

⁵Сўнгра Ёқуб Бершебадан кетди. Ўғиллар отасини, болаларини, хотинларини фиръавн юборган араваларга ўтқаздилар.

⁶Улар Канъонда орттирган чорвасини, ҳамма мол — мулкини олиб, Мисрга кетдилар. Ёқуб ва унинг ҳамма оила аъзолари

⁷— ўғиллари, қизлари ва набиралари кетдилар.

⁸Мисрга кетган Исроил халқи, яъни Ёқуб наслининг исмлари қуйидагичадир: Ёқубнинг тўнғич ўғли Рубен ва

⁹унинг ўғиллари — Ханўх, Паллув, Хазрон ва Карми.

¹⁰Шимўн ва унинг ўғиллари — Ямувол, Ёмин, Охад, Ёхин, Зўхар ва Шовул. (Шовулнинг онаси Канъонлик эди.)

¹¹Леви ва унинг ўғиллари — Гершон, Қоҳот, Марори.

¹²Яҳудо ва унинг ўғиллари — Ғур, Ўнан, Шело, Параз ва Зерах. (Лекин Ғур ва Ўнан Канъон юртида вафот этган эдилар[323].) Параз ва унинг ўғиллари — Хазрон ва Хомул.

¹³Иссахор ва унинг ўғиллари — Тўло, Пувах, Ёшув[324] ва Шимрон.

¹⁴Забулун ва унинг ўғиллари — Саред, Элўн ва Яхлиёл.

¹⁵Леахнинг бу ўғиллари ва қизи Дина Паддон — Орамда[325] туғилган эдилар. Ёқубнинг Леахдан тарқалган насли жами бўлиб ўттиз уч киши эди.

¹⁶Гад ва унинг ўғиллари — Зафўн[326], Хаги, Шуно, Эзбўн, Эри, Арўд[327] ва Эрали.

¹⁷Ошер ва унинг ўғиллари — Йимнах, Йишво, Йишви ва Бариё. Буларнинг Серах деган сингиллари ҳам бор эди. Бариёнинг ўғиллари — Хабер ва Малхиёл.

¹⁸Зилпо Ёқубга туғиб берган насл ана шулардир. Улар ҳаммаси бўлиб ўн олти киши эди. Лобон Зилпони қизи Леахга чўри қилиб берган эди.

¹⁹Ёқубнинг хотини Роҳила туққан ўғиллар — Юсуф билан Бенямин.

²⁰Юсуф Миср юртида икки ўғил — Манаше ва Эфрайимни кўрди. Юсуфнинг хотини Осанат Он шаҳрининг[328] руҳонийси Пўтиферонинг қизи эди.

²¹Бенямин ўғиллари — Белах, Бохир, Ошбол, Гера, Нўъмон, Эхи, Рўш, Мупим, Хупим ва Ард.

²²Ёқубнинг Роҳиладан тарқалган насли ана шулардир. Улар ҳаммаси бўлиб ўн тўрт киши эди.

²³Дан ва унинг ўғли — Хушим.

²⁴Нафтали ва унинг ўғиллари — Яхзиёл, Гўно, Изар ва Шиллем.

²⁵Ёқубнинг Билхахдан тарқалган насли ана шулардир. Билхахни Лобон қизи Роҳилага чўри қилиб берган эди. Ҳаммаси бўлиб етти киши эди.

²⁶Ёқуб билан бирга Мисрга келган унинг насли ҳаммаси бўлиб олтмиш олти киши[329] эди. Келинлари бу ҳисобга кирмасди.

²⁷Юсуф Мисрда икки ўғил кўрган эди. Шундай қилиб, Ёқуб хонадонидан Мисрга келганлар ҳаммаси бўлиб етмиш киши[330] эди.

²⁸Ёқуб Яҳудони Юсуфнинг олдига: “Бизни Гўшен ерларида[331] кутиб ол” деган хабар билан ўзларидан олдин жўнатди. Улар Гўшенга етиб келганларида,

²⁹Юсуф аравасини қўшиб, отасини кутиб олиш учун Гўшенга борди. Юсуф отасини кўриши биланоқ, уни қучоқлаб, бўйнига осилиб, узоқ йиғлади.

³⁰Ёқуб Юсуфга: — Тирик эканингни кўзларим билан кўрдим, энди ўлсам ҳам армоним йўқ, — деди.

³¹Юсуф ака — укаларига, отаси хонадонининг қолган аҳлига деди: — Мен бориб, фиръавнга: “Канъон юртидан ака — укаларим, отамнинг қолган оила аъзолари менинг олдимга келишди”, деб хабар берайин.

³²Мен фиръавнга яна: “Улар чўпон, чорвадорлик билан шуғулланишади, мол — қўйларини, бор мулкини олиб келишибди”, деб айтайин.

³³Фиръавн сизларни чақириб: “Касб — корингиз нима?” деб сўраб қолса,

³⁴унга: “Биз, қулларингиз, ёшлигимиздан ҳозиргача чўпонлик билан машғулмиз, ота — боболаримиз ҳам чўпон бўлиб ўтишган”, деб айтинглар. Токи Гўшен ерларига ўрнашиб олишларингизга у ижозат берсин. Чунки Мисрликлар чўпонлардан ҳазар қилишади.