Read Муқаддас Китоб Uzbek Ибтидо 6 Bible Online

Ибтидо 6 - Муқаддас Китоб Uzbek bible

Ибтидо 6

¹Ер юзида инсонлар борган сари кўпая бошлади. Қизлар ҳам туғилган эди.

²Илоҳий зотлар[29], бу қизлар[30] чиройли экан, деб ёқтирганларини ўзларига хотин қилиб олавердилар.

³Шунда Эгамиз айтди: “Мен ато этган Руҳ[31] инсонлар билан абадий қолмайди[32], чунки улар ўладиган жонлардир[33]. Келгусида улар 120 йил умр кўрсин.”

⁴Ўша кунларда, ундан кейин ҳам бу оламда улкан паҳлавонлар[34] яшади. Илоҳий зотлар билан аёл зотидан[35] туғилган бу паҳлавонлар қадимги даврнинг буюк қаҳрамонлари, машҳур жангчилари бўлган эдилар.

⁵Эгамиз кўрдики, ер юзида инсон зоти қилаётган қабиҳликлар жуда ҳам кўп экан. Уларнинг кўнглида фақат қабиҳ ният бор экан.

⁶Эгамиз ер юзида инсонларни яратганидан пушаймон бўлди, юракдан афсусланди.

⁷Эгамиз айтди: “Ўзим яратган инсон зотини ер юзидан қириб юбораман. Мен инсон билан бирга ҳайвонларни, судралиб юрувчи жониворларни, ҳашаротларни, қушларни ҳам қираман, уларни яратганимдан пушаймон бўляпман.”

⁸Фақат Нуҳ Эгамизнинг марҳаматига сазовор бўлган эди.

⁹Нуҳнинг насл — насаби тарихи қуйидагичадир: Ўша даврда ер юзидаги солиҳ, бенуқсон одам фақат Нуҳ бўлиб, Худога ҳамроҳ бўлиб яшарди.

¹⁰Нуҳнинг Сом, Хом, Ёфас деган учта ўғли бор эди.

¹¹Эндиликда ер юзи Худонинг олдида ахлоқсизликка, зўравонликка тўлиб — тошиб кетган эди.

¹²Худо кўрдики, олам бузилиб кетган, ер юзидаги жамики инсоният йўлдан озган эди.

¹³Худо Нуҳга айтди: “Мен бутун ер юзидаги инсонларни қириб ташлашга қарор қилдим. Чунки ер юзи уларнинг дастидан зўравонликка тўлиб — тошди. Энди уларни бутун ер билан бирга йўқ қилмоқчиман.

¹⁴Қаттиқ ёғочдан[36] ўзингга кема яса, кеманинг ичида хоналар ҳам ясаб, кеманинг ички ва ташқи томонини қора сақич билан суваб чиқ.

¹⁵Кеманинг узунлиги 300 тирсак, кенглиги 50 тирсак, баландлиги 30 тирсак[37] бўлсин.

¹⁶Кеманинг томини ясаганингда, том билан кеманинг девори оралиғида бир тирсак[38] очиқ жой қолдир[39]. Эшигини кеманинг ён томонидан яса. Кемани уч қаватли қилиб яса.

¹⁷Мен ер юзини тўфонга бостириб, тирик жонзотнинг ҳаммасини қириб ташлайман. Ер юзидаги жамики мавжудот нобуд бўлади.

¹⁸Сен билан эса Мен аҳд қиламан. Сен кема ичига кирасан, сен билан бирга ўғилларинг, хотининг, келинларинг ҳам киради.

¹⁹Ҳайвонларнинг ҳар бир туридан бир жуфтдан — эркаги ва урғочисидан кема ичига ўзинг билан олиб кирасан, токи тўфон пайтида улар сен билан бирга тирик қолсин.

²⁰Қушларнинг, ҳайвонларнинг, судралиб юрувчи жониворларнинг ва ҳашаротларнинг ҳар бир туридан жуфт — жуфт қилиб, ўзинг билан олиб кирасан, токи улар тирик қолсин.

²¹Ўзинг билан озиқ — овқатларнинг ҳар бир туридан ғамлаб ол. Озиқ — овқатлар оиланг билан барча жонзотларга егулик бўлади.”

²²Нуҳ ҳамма нарсани Худо амр этгандай қилди.