Read Муқаддас Китоб Uzbek 2 Солномалар 1 Bible Online

2 Солномалар 1 - Муқаддас Китоб Uzbek bible

2 Солномалар 1

¹Довуд ўғли Сулаймон ўз ҳокимиятини мустаҳкамлаб олди. Эгаси Худо у билан бирга бўлиб, уни ниҳоятда юксалтирди.

²Сулаймон жамики Исроил халқини — мингбошиларни, юзбошиларни, ҳакамларни, Исроилнинг ҳамма йўлбошчиларини ва уруғбошиларини чақиртирди.

³Сулаймон билан бутун жамоа Гивондаги саждагоҳга[2] йўл олишди. Эгамизнинг қули Мусо саҳрода қурдирган Худонинг Учрашув чодири[3] ўша даврда Гивонда жойлашган эди.

⁴Худонинг Аҳд сандиғи эса Довуднинг ташаббуси билан Хират — Йўримдан Қуддусга олиб келинган эди[4], чунки Довуд Сандиқ учун Қуддусда бир жой тайёрлаб, чодир ўрнатиб қўйган эди.

⁵Базалил қурган бронза қурбонгоҳ эса ҳануз Гивондаги Эгамиз Муқаддас чодирининг қаршисида жойлашган эди. Базалил Урининг ўғли ва Хурнинг невараси эди. Сулаймон ва жамоа қурбонгоҳ олдида Эгамизга сажда қилдилар.

⁶Сўнг Сулаймон Эгамизнинг олдида Учрашув чодирининг қаршисидаги ўша бронза қурбонгоҳ устига чиқиб, мингта қурбонлик куйдирди.

⁷Ўша куни кечаси Худо Сулаймонга зоҳир бўлиб, унга: — Тила тилагингни! — деди.

⁸Сулаймон Худога айтди: — Сен отам Довудга улуғ севгингни кўрсатдинг. Мени унинг ўрнига шоҳ қилдинг.

⁹Эй Парвардигор Эгам! Отам Довудга берган ваъданг устидан чиқ. Ахир, Сен мени ернинг қумидай кўп бўлган бир халқ устидан шоҳ қилдинг.

¹⁰Бу халқни бошқара олишим учун менга донолик ва илму маърифат бергин. Бўлмаса Сенинг шу қадар беҳисоб халқингга ким ҳукмронлик қила олади?!

¹¹Худо Сулаймонга шундай жавоб берди: — Мен сени халқим устидан шоҳ қилдим. Сен ўзинг учун мол — мулк, бойлик, шон — шуҳрат ёки душманларингнинг жонини сўрамадинг, ҳатто ўзингга узоқ умр ҳам тиламадинг. Аксинча, Менинг халқимни бошқарай деб, донолик ва илму маърифат сўраганинг учун

¹²донолик ва илму маърифат сенга ҳадя бўлсин. Буларга қўшимча қилиб сенга бойлик, мол — мулк ва шон — шуҳрат бераман, сенгача ўтган ва сендан кейин бўладиган ҳеч қайси шоҳ сенга тенг келмайди.

¹³Шундан кейин Сулаймон Гивондаги саждагоҳда жойлашган Учрашув чодиридан Қуддусга қайтиб кетди. У Исроил устидан ҳукмронлик қила бошлади.

¹⁴Сулаймон жанг аравалари ва отларни тўплади. Унинг 1400 та жанг араваси ва 12.000 та оти[5] бор эди. Сулаймон буларнинг бир қисмини жанг аравалари сақланадиган шаҳарларга ва бир қисмини Қуддусга — ўзининг ёнига жойлаштирди.

¹⁵Унинг ҳукмронлиги даврида Қуддусда олтину кумуш кўчадаги тошдай кўп эди. Садр ёғочлари ҳам худди Яҳудо қир этакларида ўсадиган оддий шикамора — анжир дарахтидай[6] сероб эди.

¹⁶Шоҳнинг савдогарлари Мисрдан[7] ва Қуведан Сулаймон учун отлар олиб келишарди. Улар отларни Қуведан сотиб олишарди.

¹⁷Мисрдан келтирилган ҳар бир жанг араваси учун 600 кумуш танга[8], ҳар бир от учун 150 кумуш танга[9] тўлашарди. Сўнг буларни барча Хет шоҳларига ва Орам шоҳларига сотишарди.