Read Муқаддас Китоб Uzbek Чиқиш 39 Bible Online

Чиқиш 39 - Муқаддас Китоб Uzbek bible

Чиқиш 39

¹Улар кўк, сафсар ва қирмизи иплардан Муқаддас хонада хизмат қилганда кийиш учун руҳонийларга либосларни ажойиб қилиб тикдилар. Ҳорунга муқаддас руҳонийлик либослари тикишди. Ҳаммасини Эгамиз Мусога амр этгандай қилдилар.

²Улар эфодни[273] майин зиғир матосидан тикиб, устига кўк, сафсар, қирмизи ва зар иплардан нақш солдилар.

³Олтинни юпқа қилиб ёйиб, ингичка — ингичка қилиб кесиб, зар ип қилишди. Улар ўз маҳоратларини ишга солиб кўк, сафсар, қирмизи иплардан нақш солинган майин зиғир матосини бу зар ип билан безатдилар.

⁴Эфоднинг олд ва орқа қисмларини бир — бирига боғлаш учун иккита елка боғичини қилиб, уларни олд ва орқа қисмларининг устки четига тикдилар.

⁵Камар ясаб, уни эфодга боғладилар. Камарни ҳам майин зиғир матосидан қилдилар. Унга кўк, сафсар, қирмизи ва зар иплардан маҳорат билан нақш солдилар. Ҳаммасини Эгамиз Мусога амр этгандай қилдилар.

⁶Кейин муҳр ўйгандай қилиб, Исроил ўғилларининг исмини иккита ақиқ тошга ўйиб ёздилар. Ёзилган тошларни олтиндан қилинган нақшли уялар ичига қўйиб,

⁷Исроилнинг ўн икки қабиласини эслатиб туриш учун эфоднинг елка боғичларига ўрнаштирдилар. Ҳаммасини Эгамиз Мусога амр этгандай қилдилар.

⁸Улар кўкракпечни[274] ясадилар. Кўкракпечни, эфод сингари, майин зиғир матосидан қилиб, кўк, сафсар, қирмизи ва зар иплардан унга маҳорат билан нақш солдилар.

⁹Кўкракпечни тўртбурчак халта шаклида, икки букланган, бўйи бир қарич, энига ҳам бир қарич қилиб ясадилар.

¹⁰Кўкракпечга тўрт қатор тошни[275] тўғри қилиб тердилар: қизил ёқут, хризолит ва зумрад тошларни биринчи қаторга тердилар.

¹¹Иккинчи қаторга фируза, зангори ёқут ва олмосни тердилар.

¹²Учинчи қаторга ложувард, агат ва аметист тошларни тердилар.

¹³Тўртинчи қаторга топаз, ақиқ ва яшма тошларни тердилар. Ҳамма тошларни олтиндан қилинган нақшли уяларга ўрнаштирдилар.

¹⁴Бу ўн икки тош Исроилнинг ўн икки қабиласини эслатиб турарди. Муҳр ўйгандай қилиб, Исроилнинг ўн икки ўғлидан ҳар бирининг исмини бу тошларнинг ҳар бирига ўйиб ёздилар.

¹⁵Улар кўкракпечни эфодга боғлаш учун тоза олтиндан ипга ўхшатиб эшилган иккита занжир ясадилар.

¹⁶Яна нақшли иккита олтин уя ва иккита олтин ҳалқа ясаб, иккала ҳалқани кўкракпечнинг устки бурчакларига маҳкамладилар.

¹⁷Иккала олтин занжирнинг бир учини кўкракпечдаги ҳалқаларга боғлаб,

¹⁸иккинчи учини нақшли олтин уяларга маҳкамладилар. Уяларни эфоднинг олд томонидаги елка боғичларига ўрнаштирдилар.

¹⁹Яна олтиндан тўртта ҳалқа ясадилар. Иккитасини кўкракпечнинг остки бурчакларига — эфодга яқин бўлган ички қирғоғига маҳкамладилар. Иккитасини эфоднинг олд томонига, иккала елка боғичининг пастига — нақшли камардан юқорига маҳкамладилар.

²⁰

²¹Кўкракпеч эфоднинг нақшли камаридан юқорида бўлсин, эфоддан осилиб турмаслиги учун кўкракпечни ҳалқалари ёрдамида эфоднинг ҳалқаларига кўк боғич билан маҳкамладилар. Ҳаммасини Эгамиз Мусога амр этгандай қилдилар.

²²Эфоднинг ридосини[276] кўк иплардан тўқилган матодан тикдилар.

²³Ридонинг ўртасидан бош сиғадиган тешик қилдилар. Ридо йиртилиб кетмаслиги учун тешикнинг четини тўқидилар.

²⁴Ридо этагининг учига айланаси бўйлаб анор[277] шаклини ва қўнғироқчаларни бирин — кетин қилиб биттама — битта осиб чиқдилар. Анор шакли йигирилган кўк, сафсар ва қирмизи иплардан қилинган эди. Қўнғироқчалар тоза олтиндан қилинган бўлиб, анор шакли ораларига осилган эди. Ҳорун олий руҳоний бўлиб хизмат қилганда, у шу ридони кийиши керак эди. Ҳаммасини Эгамиз Мусога амр этгандай қилдилар.

²⁵

²⁶

²⁷Ҳорун билан унинг ўғилларига майин зиғир матосидан кўйлакларни,

²⁸саллани, пешанабоғларни ва иштонларни қилдилар.

²⁹Белбоғини майин зиғир матосидан тўқиб, устига кўк, сафсар ва қирмизи иплардан маҳорат билан нақш солдилар. Ҳаммасини Эгамиз Мусога амр этгандай қилдилар.

³⁰Тоза олтиндан лавҳани — муқаддаслик рамзини ясадилар. Лавҳанинг юзасига муҳр ўйгандай, “Эгамизга бағишланган” деб ўйиб ёздилар.

³¹Лавҳани саллага маҳкамлаш учун кўк боғични лавҳага боғлаб қўйдилар. Ҳаммасини Эгамиз Мусога амр этгандай қилдилар.

³²Шундай қилиб, Учрашув чодири — Муқаддас чодир ясалишига оид ҳамма ишлар ниҳоясига етди. Исроил халқи ҳаммасини Эгамиз Мусога амр этгандай қилдилар.

³³Кейин Мусонинг олдига қуйидагилардан иборат Муқаддас чодирни олиб келдилар: Чодирнинг ички қаватини ва унинг ҳамма қисмларини — илгакларини, ромларини, тамбаларини, устунлари ва тагликларини,

³⁴қизилга бўялган қўчқор терисидан ёпинчиқни, юмшоқ теридан[278] ёпинчиқ ва Энг муқаддас хонани тўсиб турадиган ички пардани,

³⁵Аҳд сандиғини[279], унинг ходалари ва қопқоғини,

³⁶хонтахтани, унинг ҳамма буюмларини ва унга қўйиладиган муқаддас нонларни[280],

³⁷тоза олтиндан қилинган чироқпоя, унга ўрнатилган мойчироқларни, унинг ҳамма буюмларини ва мойчироқлар учун зайтун мойини,

³⁸олтин тутатқи қурбонгоҳини, муқаддас қиладиган мой[281] ва хушбўй тутатқини, Чодирга кираверишдаги пардани,

³⁹бронза қурбонгоҳни, унинг бронза панжарасини, ходалари ва ҳамма буюмларини, қўлювгични ва унинг таглигини,

⁴⁰ҳовлини тўсиб турадиган пардаларни, пардаларни ушлаб турадиган устунларни, устунларнинг тагликларини ва ҳовлига кираверишдаги пардани, Чодир ва ҳовли учун арқонларни, қозиқларни, Муқаддас чодир — Учрашув чодирида фойдаланадиган ҳамма ашёларни,

⁴¹Руҳоний Ҳорун ва унинг ўғиллари Муқаддас хонада хизмат қилганда киядиган, ажойиб қилиб тикилган муқаддас либосларни.

⁴²Хуллас, Исроил халқи ҳаммасини Эгамиз Мусога амр этгандай қилдилар.

⁴³Мусо қилинган ҳамма ишларни кўздан кечирди, Исроил халқи бу ишларни Эгамизнинг амри бўйича қилганларини кўриб, Мусо уларни дуо қилди.