Read Муқаддас Китоб Uzbek Забур 104 Bible Online

Забур 104 - Муқаддас Китоб Uzbek bible

Забур 104

¹Эгамизга шукур айтинг, Унга сажда қилинг, Бошқа халқлар орасида Унинг ишларини билдиринг.

²Тараннум қилиб Уни, ҳамду сано ила қўшиқ айтинг, Унинг жамики ажойиб ишларини сўзлаб беринг.

³Эгамизнинг муқаддас номи ила фахрланинг, Эгамизга юз бурганларнинг қалби шодликка тўлсин.

⁴Қудратли Эгамизга юз буринг! Унинг ҳузурида бўлишга интилинг.

⁵Эй сизлар, Эгамизнинг қули Иброҳим насли, Эй Ёқуб ўғиллари — Эгамизнинг танлаганлари, Эгамиз қилган ажойиботларини эсда тутинг, Унинг мўъжизаларини, чиқарган ҳукмларини унутманг.

⁷У Эгамиз Худодир, У бутун ер юзини адолатли ҳукм қилади.

⁸Ўз аҳдини У то абад ёддан чиқармас, Минглаб наслларга берган ваъдасини унутмас.

⁹Риоя қилар У Иброҳим билан қилган аҳдига, Исҳоққа қасам ичиб берган ваъдасига.

¹⁰Ёқуб учун бу аҳдни бир қонун қилди, Ҳа, Исроил учун абадий бир аҳд қилди.

¹¹Айтдики[283]: “Канъон юртини сенга бераман, Уни ўзингга абадий мулк қилиб оласан.”

¹²Ўша вақтда уларнинг сони кам эди, Ҳа, жуда камчилик эдилар. Улар бу юртга келгинди эди.

¹³Кезарди бир халқ орасидан бошқасига, Бир шоҳликдан бошқа юртга.

¹⁴Эгамиз ҳеч кимга уларни эзишларига йўл қўймади, Уларни деб шоҳларга танбеҳ берди.

¹⁵Айтдики: “Мен танлаганларга тегманглар, Пайғамбарларимга[284] зарар келтирманглар.”

¹⁶Канъон юрти устига Эгамиз очарчилик юборди, Битта қолдирмай егуликларга қирғин келтирди.

¹⁷Улардан олдин одам юборди, Ҳа, Юсуф[285] қул каби сотилди.

¹⁸Унинг оёқларига занжир урилди, Бўйнидан темир ҳалқа ўтказилди.

¹⁹Юсуфнинг сўзлари бажо бўладиган вақт келгунча, Эгамизнинг каломи Юсуфни синади.

²⁰Миср шоҳи одам юбориб, Юсуфни қутқарди, Элларнинг ҳукмдори уни озод қилди.

²¹Юсуфни шоҳ саройининг бошқарувчиси қилиб тайин этди, Жамики мулкининг ҳокими қилди.

²²Хоҳласа саройдаги аъёнларимни занжирбанд қилсин[286], Маслаҳатчиларимга донолик ила ўгит берсин деб, шундай қилди.

²³Сўнгра Исроил Мисрга келди, Ҳа, Ёқуб насли Хом юртида[287] мусофир бўлди.

²⁴Унинг халқини Эгамиз баракали қилди, Душманларига қараганда, кўпайтирди.

²⁵Эгамиз Миср халқининг юракларини ўзгартирди, Улар Эгамиз халқидан нафратланди, Эгамизнинг қулларига қарши улар фитна уюштирди.

²⁶Сўнгра Эгамиз қули Мусони юборди, Танлаб олган Ҳорунни бирга жўнатди.

²⁷Мисрликлар орасида, ўша Хом юртида Иккаласи Эгамизнинг мўъжизаларини, ажойиботларини кўрсатди[288].

²⁸Эгамиз зулмат юборди, Мисрни зулматга буркади, Ахир, Мисрликлар Эгамизнинг амрларига итоатсизлик қилди[289].

²⁹Мисрнинг сувларини Эгамиз қонга айлантирди, Жамики балиқларини нобуд қилиб ташлади.

³⁰Миср юрти тўлиб кетди қурбақаларга, Етиб борди ҳатто ҳукмдорларнинг уйига.

³¹Эгамиз амр берганда, сўналар галаси келди, Миср бўйлаб бургалар қайнаб кетди.

³²Ёмғир ўрнига уларга Эгамиз дўл ёғдирди, Бутун Миср бўйлаб чақмоқ чақтирди.

³³Узумзору анжирзорларини қуритди, Мисрдаги дарахтларни қўпориб ташлади.

³⁴Эгамиз амр берганда, чигирткалар[290] келди, Сон — саноқсиз майда чигирткалар чиқиб келди.

³⁵Улар Мисрдаги бутун ўт — ўланни еб юборди, Миср ўлкасидаги ҳосилни еб битирди.

³⁶Мисрдаги жамики тўнғич ўғилларни Эгамиз нобуд қилди, Ҳа, уларнинг фахри, қут — барака тимсолини йўқ қилди.

³⁷Сўнг Эгамиз Ўз халқини Олтину кумушга бойитиб[291] олиб чиқди. Исроил қабилаларининг орасида қоқилиб қолгани бўлмади.

³⁸Мисрликлар Исроилдан қўрқиб, ваҳимага тушганди, Улар кетгач, Миср халқи севинди.

³⁹Халқи устида ёпинчиқ бўлсин деб, Эгамиз булутни ёйди, Кечаси ёруғлик бўлсин деб, аланга берди[292].

⁴⁰Исроил гўшт сўраганда Эгамиз беданалар берди, Осмондан нон ёғдириб, уларни тўйғазди[293].

⁴¹Эгамиз қояни очди, сув отилиб чиқди[294], Саҳро бўйлаб дарёдай сув оқди.

⁴²Эгамиз Ўзининг муқаддас ваъдасини, Ўз қули Иброҳимга берган ваъдасини ёдда тутди.

⁴³Шу боис халқини олиб чиқди севинч ила, Ўз танлаганларини шодлик ҳайқириқлари ила.

⁴⁴Бегона халқларнинг юртларини уларга берди, Ўша халқларнинг бойлигини Исроил мулк қилиб олди.

⁴⁵“Исроил халқи Менинг фармонимга риоя қилсин, Менинг қонунларимга итоат этсин”, дея Эгамиз мана шуларнинг ҳаммасини қилди. Эгамизга ҳамду санолар бўлсин!