Read Муқаддас Китоб Uzbek Забур 113 Bible Online

Забур 113 - Муқаддас Китоб Uzbek bible

Забур 113

¹Исроил халқи Мисрдан чиқиб кетганда, Яҳудо юрти Худонинг муқаддас маскани бўлди. Ҳа, Ёқуб насли бегона юртдан кетганда, Исроил юрти Худонинг шоҳлиги бўлди.

³Денгиз Худони кўрди — ю, қочди[325], Иордан дарёси орқага қайтди[326].

⁴Тоғлар қўчқорлар каби сакради[327], Тепаликлар қўзилар каби ирғиди.

⁵Не бўлди, эй денгиз, қочиб кетдинг? Не бўлди, эй Иордан, орқага қайтдинг?

⁶Эй тоғлар, нечун сакрадингиз такалар каби? Эй тепаликлар, нечун ирғидингиз қўзилар каби?

⁷Титрагин, эй замин, Раббий олдида, Ёқубнинг Худоси ҳузурида.

⁸У қояни сув ҳовузига айлантирган, Қаттиқ қоядан булоқ чиқарган[328].

⁹Эй Эгам! Содиқ севгинг, садоқатинг ҳақи Сенга шарафлар бўлсин! Бизга эмас, Сенга шарафлар бўлсин!

¹⁰Нима учун бегона халқлар: “Қани уларнинг Худоси”, дея айтарлар?

¹¹Бизнинг Худойимиз самолардадир, У истаганини қилаверади.

¹²Халқларнинг худолари эса кумуш, олтиндан, Инсон қўлларининг маҳсулидир.

¹³Бутларнинг оғизлари бор, сўзлай олмаслар, Кўзлари бор, кўра олмаслар.

¹⁴Уларнинг қулоқлари бор, эшита олмаслар, Бурунлари бор, ҳидлай олмаслар.

¹⁵Уларнинг қўллари бор, сеза олмаслар, Оёқлари бор, юра олмаслар, Бўғизларидан овоз чиқара олмаслар.

¹⁶Бутларни барпо қилганлар, бутларга ишонганлар Худди уларга ўхшаган бўлиб қолар.

¹⁷Эй Исроил халқи! Ишонинг Эгамизга, У мадад берар, қалқон бўлар сизга!

¹⁸Эй Ҳорун хонадони![329] Ишонинг Эгамизга, У мадад берар, қалқон бўлар сизга!

¹⁹Эй Эгамиздан қўрққанлар! Ишонинг Эгамизга, У мадад берар, қалқон бўлар сизга!

²⁰Эгамиз бизни ёдда тутиб, барака беради, Исроил халқига У барака беради, Ҳорун хонадонига У барака беради.

²¹Эгамиз Ўзидан қўрққанларга барака беради, Каттаю кичикка бир хилда барака беради.

²²Эгамиз сизларни, Болаларингизни кўпайтирсин.

²³Еру осмонни яратган Эгамиз Сизларга барака берсин.

²⁴Самолар Эгамизнинг самоларидир, Ерни эса У инсонларга бергандир.

²⁵Ўлим сукунатига ботган марҳумлар Эгамизга ҳамду сано айтмаслар.

²⁶Биз эса Эгамизга ҳозир ҳам, абадулабад Олқишлар айтамиз. Эгамизга ҳамду санолар бўлсин!