Read Муқаддас Китоб Uzbek Забур 118 Bible Online

Забур 118 - Муқаддас Китоб Uzbek bible

Забур 118

¹[335] Бахтлидир йўллари пок бўлганлар, Эй Эгам, Сенинг қонунинг бўйича юрадиганлар.

²Бахтлидир Сенинг шартларингга риоя қиладиганлар, Бутун қалби билан Сенга интиладиганлар.

³Улар асло ноҳақ иш қилмайдилар, Сенинг йўлларингдан юрадилар.

⁴Ўзинг бизга амр бериб, Буйруқларимга диққат ила итоат этинг, дегансан.

⁵Қанийди фармонларингни адо этишда барқарор бўлсам!

⁶Мен шарманда бўлиб қолмай, дея Ҳамма амрларингга диққат қиламан.

⁷Сенинг одил қоидаларингни ўрганганимда, Тоза қалб ила ҳамду сано айтаман Сенга.

⁸Сенинг қонунларингни бажараман, Мени ҳеч қачон тарк этмагин.

⁹Йигит қандай қилиб йўлларини пок сақлайди? Каломинг бўйича яшаб, шунга эришади.

¹⁰Бутун қалбим билан Сенга интиламан, Амрларингдан оғишимга йўл қўймагин.

¹¹Сўзларингни юрагимда асрайман, Токи Сенга қарши гуноҳ қилмайин.

¹²Эй Эгам, Сенга олқишлар бўлсин, Фармонларингни ўргатгин менга.

¹³Оғзингдан чиққан барча қоидаларни Ўз оғзим билан эълон қиламан.

¹⁴Шартларингга эргашиб, лаззат топаман, Гўё катта бойлик топиб хурсанд бўламан.

¹⁵Буйруқларинг ҳақида чуқур фикр юритаман, Сенинг йўлларингга диққат қиламан.

¹⁶Фармонларингдан лаззат оламан, Каломингни мен унутмасман.

¹⁷Мен, Ўз қулингга яхшилик қилгин, Токи яшаб, каломингга итоат этайин.

¹⁸Кўзларимни оч, токи кўрайин Қонунингдаги ажойиботларни.

¹⁹Ер юзида мусофирдай яшайман, Амрларингни мендан яширма.

²⁰Жоним куймоқда ҳасрат билан, Қоидаларингни ўрганишни доим истайман.

²¹Лаънатланган такаббурларга, Амрларингдан оғиб кетганларга Сен танбеҳ берасан.

²²Ҳақорат, хўрликни мендан узоқлаштир, Ахир, шартларингни доим бажарганман.

²³Ҳатто шаҳзодалар тўпланиб, менга бўҳтон қилсалар ҳам Мен фармонларинг ҳақида чуқур фикр юритаман.

²⁴Сенинг шартларинг менга лаззат бағишлайди, Шартларинг мен учун маслаҳатчидирлар.

²⁵Жоним чиқай деб турибди, Ваъдангга кўра, ҳаётимни сақлагин.

²⁶Ҳаётим ҳақида Сенга айтиб бердим, Сен жавоб бердинг. Энди фармонларингни менга ўргатгин.

²⁷Менга буйруқларингни тушунтир, Токи мўъжизаларинг ҳақида чуқур фикр юритай.

²⁸Жоним адо бўлди ғам — ғуссадан, Қувват бергин менга ваъдангга биноан.

²⁹Сохта йўллардан мени сақлагин, Илтифот ила қонунингни менга ўргатгин.

³⁰Мен садоқат йўлини танлаганман, Қоидаларингни юрагимга жо қилганман.

³¹Эй Эгам, шартларингни маҳкам ушлаганман, Энди шарманда бўлишимга йўл қўймагин.

³²Жоним билан амрларингни бажараман, Зотан, менга кўп заковат ато қиласан.

³³Эй Эгам, менга фармонларингни ўргат, Токи мен уларни охиригача бажарайин.

³⁴Заковат бер менга, токи қонунингга риоя қилай, Чин қалбимдан қонунингни бажарай.

³⁵Амрларинг сўқмоғидан мени етаклагин, Мен ундан лаззат топаман.

³⁶Юрагимни ноҳақ фойда томон эмас, Ўз шартларинг томон бургин.

³⁷Кўзларимни бефойда нарсалардан қайтаргин, Ваъдангга биноан ҳаётимни сақлагин[336].

³⁸Мен, Ўз қулингга берган ваъдангда тургин, Бу ваъданг Сендан қўрқадиганлар учундир.

³⁹Шармандаликдан қўрқаман, мендан узоқ қил, Зотан, қоидаларинг эзгудир.

⁴⁰Буйруқларингга нақадар талпинаман, Адолатинг билан ҳаётимни сақлагин.

⁴¹Содиқ севгингни, эй Эгам, менга кўрсат, Ваъдангга кўра, менга нажот бер.

⁴²Шунда мени ҳақорат қилганларга жавоб бераман, Сенинг каломингга умид қиламан.

⁴³Оғзимдан ҳақиқат каломини тамом тортиб олма, Сенинг қоидаларингга умид боғлаганман.

⁴⁴Қонунингга доимо риоя қиламан, Абадулабад уни бажараман.

⁴⁵Мен озод бўлиб юравераман, Буйруқларингни излаб топганман.

⁴⁶Шоҳлар олдида шартларингдан сўйлайман, Шарманда бўлмасман.

⁴⁷Амрларингдан лаззат топаман, Мен амрларингни севаман.

⁴⁸Амрларингга иззату севги кўрсатаман, Фармонларинг ҳақида чуқур фикр юритаман.

⁴⁹Эсла мен, қулингга берган ваъдангни, Сен ваъда бериб, умидвор қилгансан мени.

⁵⁰Кулфатда қолганимда шу менга тасалли беради, Сенинг ваъданг менинг ҳаётимни сақлайди.

⁵¹Такаббур мени тамом масхара қилади, Шунда ҳам қонунингдан юз ўгирмасман.

⁵²Азалий қоидаларингни, эй Эгам, эслайман, Бу қоидаларингдан мен тасалли топаман.

⁵³Фосиқ қонунингдан юз ўгирган, Шу боис мен қаттиқ ғазабланаман.

⁵⁴Қаерда бошпана қилган бўлмайин, Фармонларингни қўшиқ қилиб куйлайман.

⁵⁵Эй Эгам, тунда ҳам Сени эслайман, Сенинг қонунларингга риоя этаман.

⁵⁶Бу менга одат бўлган эди, Буйруқларингга риоя қилдим.

⁵⁷Эй Эгам, Сен менинг хавфсизлигим манбаисан, Каломингга итоат этаман, деб ваъда бераман.

⁵⁸Жамолингни изладим чин қалбимдан, Меҳрибон бўл менга ваъдангга биноан.

⁵⁹Йўлларимга диққат қилдим, Шартларинг бўйича қадам босаман.

⁶⁰Мен шошиламан, кечикмасман Амрларингга итоат этмоқ учун.

⁶¹Фосиқлар мени арқонлар билан боғлайди, Шунда ҳам Сенинг қонунингни унутмайман.

⁶²Ярим тунда уйғониб, одил қоидаларинг учун Сенга ҳамду сано айтаман.

⁶³Сендан қўрққанларга мен дўстман, Буйруқларингга риоя қилганларга шерикман.

⁶⁴Эй Эгам, содиқ севгингдан замин тўлгандир, Фармонларингни менга ўргат.

⁶⁵Эй Эгам, Ўзинг берган ваъдангга мувофиқ Мен, Ўз қулингга яхшилик қилдинг.

⁶⁶Менга донолик, зукколик бергин, Сенинг амрларингга ишондим.

⁶⁷Жазо олмасимдан олдин адашар эдим, Энди Сенинг сўзингга итоат этаман.

⁶⁸Нақадар яхшисан, эзгулик қиласан, Фармонларингни менга ўргатгин.

⁶⁹Такаббур ёлғон сўйлаб, мени қорага чаплар, Мен эса чин қалбдан буйруқларингга итоат этаман.

⁷⁰Уларнинг қалбини ёғ боғлаган, Мен эса қонунингдан лаззат оламан.

⁷¹Тортган жазоим менга сабоқ бўлди, Шу орқали фармонларингни ўргандим.

⁷²Минглаб олтину кумушдан кўра, Яхшидир мен учун оғзингдан чиққан қонун.

⁷³Қўлларинг мени яратган, барпо қилган, Амрларингни ўрганишга менга идрок бергин.

⁷⁴Сендан қўрққанлар мени кўриб, севинсинлар, Зотан, Сенинг каломингга умид қилганман.

⁷⁵Эй Эгам, ҳукмларинг адолатлилигини биламан, Менга жазо берганингда, Сен ҳақ эдинг.

⁷⁶Мен, Ўз қулингга берган ваъдангга кўра, Содиқ севгинг менга тасалли бўлсин.

⁷⁷Менга шафқат қилгин, токи яшайин, Ахир, Сенинг қонунинг мен учун лаззат.

⁷⁸Ёлғон гапириб, менга зарар қилгани учун Такаббурлар шарманда бўлсин. Мен эса буйруқларинг ҳақида фикр юритаман.

⁷⁹Мен томон келсин Сендан қўрққанлар, Сенинг шартларингни биладиганлар.

⁸⁰Фармонларингни битта қолмай бажарай, Токи мен шарманда бўлиб қолмай.

⁸¹Нажотингни кутиб, жоним адо бўлмоқда, Сенинг каломингдан умид қилмоқдаман.

⁸²Ваъдаларингни кутиб, кўзимнинг нури сўнади, “Қачон менга тасалли берасан?” дея сўрайман.

⁸³Тутунда қорайиб, бужмайган мешдай[337] бўлсам ҳам, Сенинг фармонларингни мен унутмаганман.

⁸⁴Қачонгача мен, қулинг, кутишим керак? Мени таъқиб қилувчиларни қачон ҳукм қиласан?

⁸⁵Такаббурлар менга чуқур қазирлар, Сенинг қонунингга улар қарши чиқарлар.

⁸⁶Ҳамма амрларинг умидбахшдир. Мени сабабсиз таъқиб этарлар, ёрдам бер!

⁸⁷Улар мени ер юзидан йўқ қилай, деди, Аммо буйруқларингни мен тарк этмадим.

⁸⁸Содиқ севгинг ҳақи сақла ҳаётимни, Токи оғзингдан чиққан шартларга риоя қилай.

⁸⁹Каломинг, эй Эгам, то абаддир, У самоларда мустаҳкам туради.

⁹⁰Сенинг садоқатинг насллар оша давом этади, Ерни барқарор қилгансан, у то абад тураверади.

⁹¹Қоидаларинг туфайли Еру осмон бугун ҳам мустаҳкамдир, Бутун олам қўлинг остидадир.

⁹²Агар қонунинг мен учун лаззат бўлмасайди, Тортган ғаму кулфатларимдан тамом бўлардим.

⁹³Мен буйруқларингни ҳеч қачон унутмайман, Булар орқали Сен ҳаётимни сақлагансан.

⁹⁴Мен Сеникидирман, мени қутқаргин, Зотан, мен буйруқларингни бажаришга интилганман.

⁹⁵Фосиқлар мени ўлдиришга пайт пойлайди, Мен эса шартларинг ҳақида чуқур фикр юритаман.

⁹⁶Жамики комилликнинг чекланганини кўрдим, Сенинг амрларинг эса чегарасиздир.

⁹⁷О, нақадар севаман қонунингни! Кун бўйи хаёлимда тутаман уни.

⁹⁸Амрларинг мени ғанимларимдан кўпроқ доно қилди, Амрларинг доимо мен билан бирга.

⁹⁹Барча устозларимдан ҳам зийракроқ бўлдим, Сенинг шартларинг устида фикр юритаман.

¹⁰⁰Ёши улуғлардан ҳам донороқ бўлдим, Чунки Сенинг буйруқларингга итоат этаман.

¹⁰¹Ҳар қандай ёмон йўлдан қадамимни тийдим, Токи Сенинг каломингга итоат этай дедим.

¹⁰²Қоидаларингдан мен қайтмадим, Менга Ўзинг таълим бергансан.

¹⁰³Сўзларинг мен учун нақадар мазалидир, Асалдан ҳам ширин туюлар оғзимга.

¹⁰⁴Буйруқларинг туфайли мен доно бўламан, Ҳар қандай ёлғон йўлдан нафратланаман.

¹⁰⁵Сенинг каломинг қадамларим учун чироқдир, Йўлимга нур сочадиган ёруғликдир.

¹⁰⁶Адолатли қоидаларингни бажараман, деб Онт ичдим ва бу онтимга вафо қиламан.

¹⁰⁷Эй Эгам, мен кўп жафо чекдим, Ваъдангга кўра, ҳаётимни сақла.

¹⁰⁸Эй Эгам, мақтов назрларимни қабул этгин, Менга қоидаларингни ўргатгин.

¹⁰⁹Ҳаётим ҳар он хавфда бўлса ҳам, Сенинг қонунингни мен унутмайман.

¹¹⁰Фосиқлар менга тузоқ қўйдилар, Шунда ҳам буйруқларингдан оғиб кетмадим.

¹¹¹Сенинг шартларинг то абад менинг мулкимдир, Шартларинг қалбимнинг қувончидир.

¹¹²Фармонларингни то абад ижро этмоққа Юрагимни мойил қилдим.

¹¹³Иккиюзламачилардан мен нафратланаман, Сенинг қонунингни севаман.

¹¹⁴Сен менинг паноҳимсан, қалқонимсан, Сенинг каломингга умид боғлайман.

¹¹⁵“Эй бадкирдорлар, йўқолинг кўз олдимдан, Мен Худойимнинг амрларини бажарай”, деб айтаман.

¹¹⁶Ваъдангга кўра, менга таянч бўл, токи яшайин, Умидим пучга чиқмасин, шарманда бўлмайин.

¹¹⁷Суянчиқ бўл менга, токи нажот топайин, Фармонларингга доим диққат билан боқайин.

¹¹⁸Фармонларингдан тойганларни рад этдинг, Уларнинг ҳийлаю найранглари беҳудадир.

¹¹⁹Ер юзидаги жамики фосиқларни Ахлатдай улоқтириб ташлайсан, Шу боис мен шартларингни севаман.

¹²⁰Сендан қўрққанимдан вужудим титрайди, Ҳукмларингдан мени ваҳима босади.

¹²¹Адолатли, тўғри ишлар қилганман, Мени золимлар қўлида қолдирма.

¹²²Мен, қулингнинг бахтига кафолат бергин, Такаббурлар мени эзишларига йўл қўймагин.

¹²³Нажотингни кутавериб, кўзим тўрт бўлди, Ваъда қилган нажотинг армонида кўзим нури тўкилди.

¹²⁴Мен, Ўз қулингга содиқ севгингни кўрсатгин, Фармонларингни менга ўргатгин.

¹²⁵Сенинг қулингман, менга идрок бергин, Токи мен шартларингни билиб олайин.

¹²⁶Эй Эгам, вақти келди, Ўз ишингни қил, Сенинг қонунинг бузилди.

¹²⁷Чиндан ҳам Сенинг амрларингни Олтиндан, энг соф олтиндан ҳам кўпроқ севаман.

¹²⁸Сенинг буйруқларингга кўра, қадам босаман, Ҳар қандай ёлғон йўлдан нафратланаман.

¹²⁹Сенинг шартларинг ажойибдир, Шу боис уларга итоат этаман.

¹³⁰Каломингнинг таълимоти зиё сочади, Соддаларга ақл — идрок беради.

¹³¹Оғзим очилиб, оғир нафас оламан, Чунки Сенинг амрларингга жуда интиламан.

¹³²Мен томон юз бур, менга шафқат қилгин, Ахир, Сени севганларга доим шафқат кўрсатасан.

¹³³Сўзингга кўра, қадамимни Ўзинг бошқаргин, Ҳеч қачон устимдан гуноҳ ҳукмрон бўлмасин.

¹³⁴Инсон зулмидан мени қутқаргин, Токи Сенинг буйруқларингга итоат этайин.

¹³⁵Жамолинг менга нурларини сочсин, Фармонларингни менга ўргатгин.

¹³⁶Кўзларимдан ёшлар дарё бўлиб қуйилар, Ахир, одамлар қонунингга риоя қилмаяпти.

¹³⁷Сен одилсан, эй Эгам, Ҳукмларинг адолатлидир.

¹³⁸Адолат ила шартларингни буюргансан, Тамомила ишончлидир шартларинг.

¹³⁹Ғазабим мени адо қилмоқда, Душманларим каломингни рад этмоқда.

¹⁴⁰Ваъдаларинг нақадар софдир! Мен ваъдаларингни нақадар севаман!

¹⁴¹Мен кераксизман, хўрланганман, Буйруқларингни унутмайман.

¹⁴²Сенинг адолатинг мангудир, Сенинг қонунинг ҳақиқатдир.

¹⁴³Бошимга кулфату азоб келди, Амрларинг менга завқ берар.

¹⁴⁴Шартларинг то абад адолатлидир, Идрок бергин менга, токи яшайин.

¹⁴⁵Эй Эгам, чин кўнгилдан ёлвораман, жавоб бер, Фармонларингга риоя қиламан.

¹⁴⁶Сенга фарёд қиламан, мени қутқаргин, Токи шартларингга мен риоя қилай.

¹⁴⁷Кун чиқмасдан Сендан мадад сўраб фарёд қиламан, Сенинг каломингга мен умид боғлайман.

¹⁴⁸Сенинг ваъдангни чуқур англай деб, Кўзларимга тун бўйи уйқу келмайди.

¹⁴⁹Содиқ севгингга кўра, овозимни эшитгин, Эй Эгам, адолатинг билан ҳаётимни сақлагин.

¹⁵⁰Қабиҳ режа тузадиганлар яқин келмоқда, Улар қонунингдан узоқда юради.

¹⁵¹Сен эса, эй Эгам, ёнимдасан, Ҳамма амрларинг ҳақиқатдир.

¹⁵²Қонунингни Сен мангу барқарор қилгансан, Ёшлигимдан буни мен биламан.

¹⁵³Азобларимга қарагин, мени қутқаргин, Ахир, мен Сенинг қонунингни унутмадим.

¹⁵⁴Менинг даъвоимни исбот қил, мени қутқар, Ваъдангга кўра, ҳаётимни сақла.

¹⁵⁵Фосиқдан нажот узоқдадир, Сенинг фармонларингни улар изламаслар.

¹⁵⁶Эй Эгам, шафқатинг буюкдир, Адолатинг билан ҳаётимни сақла.

¹⁵⁷Мени таъқиб қилувчи душманларим кўп, Мен шартларингдан юз ўгирмайман.

¹⁵⁸Маккорларга нафрат ила қарайман, Улар Сенинг амрларингга риоя қилмайди.

¹⁵⁹Қарагин, нақадар севаман буйруқларингни, Содиқ севгингга кўра, сақлагин ҳаётимни.

¹⁶⁰Каломинг моҳияти ҳақиқатдир, Адолатли қоидаларинг то абад давом этади.

¹⁶¹Ҳукмдорлар мени сабабсиз таъқиб қилар, Юрагим каломингдан қўрқиб титраб турар.

¹⁶²Худди улкан хазина топган одамдай, Сенинг сўзингдан шод бўламан.

¹⁶³Ёлғондан нафратланиб, жирканаман, Сенинг қонунингни эса севаман.

¹⁶⁴Сенинг адолатли қоидаларинг туфайли Етти марта кунига Сени мадҳ қиламан.

¹⁶⁵Қонунингни севганлар буюк тинчликка эга бўлар, Ҳеч нарса уларга тўсиқ бўла олмайди.

¹⁶⁶Эй Эгам, мен нажотингга умид қиламан, Мен Сенинг амрларингни бажараман.

¹⁶⁷Шартларингга итоат этаман, Мен уларни ғоятда севаман.

¹⁶⁸Буйруқ, шартларингга риоя қиламан, Ҳамма йўлларим Сенга маълумдир.

¹⁶⁹Эй Эгам, оҳу нолам етсин Сенга, Каломингга кўра, менга идрок бергин.

¹⁷⁰Илтижоим етиб борсин Сенга, Берган ваъдангга кўра, мени қутқаргин.

¹⁷¹Лабларимдан ҳамду сано тўлиб — тошсин, Менга ўргатасан фармонларингни.

¹⁷²Тилим куйлайди Сенинг ваъдангни, Зотан, адолатлидир барча амрларинг.

¹⁷³Менга ёрдамга тайёр тургин, Зотан, танлаганман мен буйруқларингни.

¹⁷⁴Эй Эгам, нажотингга талпинаман, Сенинг қонунингдан лаззат топаман.

¹⁷⁵Умр бер менга, ҳамду сано айтайин Сенга, Қоидаларинг ёрдам берсин менга.

¹⁷⁶Адашган қўйдай йўлдан озганман, Излаб топ мени, Ўз қулингни. Зотан, мен амрларингни унутмаганман.