Read Муқаддас Китоб Uzbek Забур 134 Bible Online

Забур 134 - Муқаддас Китоб Uzbek bible

Забур 134

¹Эгамизга ҳамду санолар бўлсин! Эгамизнинг номига мадҳиялар бўлсин! Ҳамду сано айтинг, эй Эгамизнинг қуллари,

²Эй Эгамизнинг уйида хизмат қиладиганлар, Эй Эгамиз уйининг ҳовлисида хизмат қиладиганлар!

³Эгамизга ҳамду санолар бўлсин, У яхшидир! Тараннум этинг Уни, бу[352] ёқимлидир.

⁴Эгамиз Ўзи учун Ёқуб наслини танлади. Ҳа, Ўзимнинг хазинам деб, Исроил халқини танлади.

⁵Ҳа, биламан, Эгамиз улуғдир, Раббимиз барча худолардан юксакдир.

⁶Осмонда ҳам, заминда ҳам, Денгизларда, жамики тубсиз сувларда Эгамиз истаганини қилади.

⁷У ернинг тўрт томонидан булутларни олиб келади, Ёмғир билан бирга чақмоқ юборади, Омборларидан шамол олиб келади.

⁸Эгамиз Мисрнинг тўнғичларини, Инсон ҳамда ҳайвонларнинг биринчи туғилганларини нобуд қилди[353].

⁹Фиръавн ва унинг ҳамма аъёнларига қарши Мисрнинг орасига Эгамиз аломату мўъжизаларни юборди[354].

¹⁰У кўп эллар, халқларни қирган, Қудратли шоҳларни бўғизлаган.

¹¹Амор халқининг шоҳи Сихўнни, Башан шоҳи Ўгни Ҳамда Канъоннинг барча шоҳларини қирган[355].

¹²Уларнинг ерини Исроил халқига мулк қилиб берди.

¹³Эгамизнинг номи то абад давом этар, Эгамизнинг шуҳрати насллар оша давом этар.

¹⁴Эгамиз Ўз халқига адолат қилади, Ўз қулларига раҳм — шафқат қилади.

¹⁵Халқларнинг худолари эса кумуш, олтиндан, Инсон қўлларининг маҳсулидир.

¹⁶Бутларнинг оғизлари бор, сўзлай олмаслар, Кўзлари бор, кўра олмаслар.

¹⁷Қулоқлари бор уларнинг, эшита олмас, Улар асло нафас ололмас.

¹⁸Бутларни барпо қилганлар, бутларга ишонганлар Худди уларга ўхшаган бўлиб қолар.

¹⁹Эй Исроил халқи, олқишлар айтинг Эгамизга! Эй Ҳорун хонадони[356], мадҳиялар айтинг Эгамизга!

²⁰Эй Леви хонадони[357], олқишлар айтинг Эгамизга! Эй Эгамиздан қўрққанлар, мадҳиялар айтинг Унга!

²¹Қуддусда истиқомат қиладиган Эгамизга Сионда олқишлар айтинг! Эгамизга ҳамду санолар бўлсин!