Read Муқаддас Китоб Uzbek Забур 135 Bible Online

Забур 135 - Муқаддас Китоб Uzbek bible

Забур 135

¹Шукрона айтинг Эгамизга, У яхшидир! Унинг содиқ севгиси абадийдир.

²Шукрона айтинг худоларнинг Худосига, Унинг содиқ севгиси абадийдир.

³Шукрона айтинг эгаларнинг Эгасига[358], Унинг содиқ севгиси абадийдир.

⁴Шукрона айтинг Худога, Фақатгина У буюк ажойиботлар кўрсатади. Унинг содиқ севгиси абадийдир.

⁵Шукрона айтинг донолик билан самоларни яратганга[359], Унинг содиқ севгиси абадийдир.

⁶Шукрона айтинг сувлар узра ерни барпо қилганга[360], Унинг содиқ севгиси абадийдир.

⁷Шукрона айтинг улкан ёритқичларни яратганга, Унинг содиқ севгиси абадийдир.

⁸Кундузи нур сочиб турсин дея, Қуёшни яратганга шукрона айтинг. Унинг содиқ севгиси абадийдир.

⁹Тун узра нур сочиб турсин дея, Юлдузлару ойни яратганга шукрона айтинг. Унинг содиқ севгиси абадийдир.

¹⁰Шукрона айтинг Мисрнинг тўнғичларини урганга[361], Унинг содиқ севгиси абадийдир.

¹¹Шукрона айтинг Мисрдан Исроилни олиб чиққанга[362], Унинг содиқ севгиси абадийдир.

¹²Шукрона айтинг йўғон билакларию Кучли қўли ила Исроилни олиб чиққанга, Унинг содиқ севгиси абадийдир.

¹³Шукрона айтинг Қизил денгизни[363] иккига бўлганга[364], Унинг содиқ севгиси абадийдир.

¹⁴Шукрона айтинг Исроилни денгиз ўртасидан ўтказганга, Унинг содиқ севгиси абадийдир.

¹⁵Шукрона айтинг фиръавн ва унинг лашкарларини Қизил денгизга улоқтирганга, Унинг содиқ севгиси абадийдир.

¹⁶Шукрона айтинг Ўз халқини саҳро бўйлаб олиб ўтганга, Унинг содиқ севгиси абадийдир.

¹⁷Шукрона айтинг буюк шоҳларни ҳалок қилганга, Унинг содиқ севгиси абадийдир.

¹⁸Шукрона айтинг қудратли шоҳларни қирганга, Унинг содиқ севгиси абадийдир.

¹⁹Шукрона айтинг Амор халқининг шоҳи Сихўнни ўлдирганга, Унинг содиқ севгиси абадийдир.

²⁰Шукрона айтинг Башан шоҳи Ўгни ўлдирганга[365], Унинг содиқ севгиси абадийдир.

²¹Шукрона айтинг уларнинг ерини Ўз халқига мулк қилиб берганга, Унинг содиқ севгиси абадийдир.

²²Шукрона айтинг у ерларни Ўз қули Исроилга мулк қилиб берганга, Унинг содиқ севгиси абадийдир.

²³Шукрона айтинг хор бўлганимизда бизни эслаганга, Унинг содиқ севгиси абадийдир.

²⁴Шукрона айтинг бизни душманларимиздан қутқарганга, Унинг содиқ севгиси абадийдир.

²⁵Шукрона айтинг барча жонзотларни озиқлантирадиганга, Унинг содиқ севгиси абадийдир.

²⁶Шукрона айтинг Самовий Худога, Унинг содиқ севгиси абадийдир.