Read Муқаддас Китоб Uzbek Забур 138 Bible Online

Забур 138 - Муқаддас Китоб Uzbek bible

Забур 138

¹Ижрочилар раҳбарига. Довуд саноси. Эй Эгам, мени Ўзинг синаб кўриб, билгансан,

²Қачон ўтириб, қачон туришимни Ўзинг биласан, Ўй — хаёлларимни узоқдан туриб англаб оласан,

³Юришимни, ётишимни Сен текширасан, Барча йўлларим Сенга ойдай равшандир.

⁴Бирон сўз тилимга келмасдан олдин, Эй Эгам, Сен ҳаммасини биласан.

⁵Мени ҳамма томондан ўраб олгансан, Қўлларингни устимга қўйгансан.

⁶Донолигинг мен учун жуда ажойибдир, Шу қадар юксакки, мен англай олмасман.

⁷Сенинг Руҳингдан қочиб, қаерга ҳам бора оламан?! Сенинг ҳузурингдан қаерга ҳам кета оламан?!

⁸Агар осмонга чиқсам, Сен ўша ердасан! Ўликлар диёрига[371] тушсам ҳам, Сен ўша ердасан!

⁹Саҳарнинг қанотларини олиб парвоз қилсам, Денгизнинг энг узоқ четларига ўрнашсам,

¹⁰Ҳатто у ерда ҳам қўлларинг мени етаклар, Ўнг қўлинг мени қувватлар.

¹¹Агарда: “Шубҳасиз, мени зулмат қамраб олади, Атрофимда кундуз тунга айланади”, деб айтсам,

¹²Ҳатто зулмат ҳам Сен учун қоронғи эмас, Тун кундуз каби нур сочар, Туну кундуз Сен учун бирдир.

¹³Ички аъзоларимни Сен яратгансан, Онамнинг қорнида менга шакл бергансан.

¹⁴Сенга шукрона айтаман. Ахир, қандай ажойиб қилиб яратилганман! Сенинг барча ишларинг нақадар ажойиб, Буни мен жуда яхши биламан.

¹⁵Мен пинҳон яратилганимда, Ернинг тубида[372] маҳорат ила тўқилганимда, Суякларим Сендан яширин эмас эди.

¹⁶Кўзларинг кўрганди ҳомила эканимни. Менга ажратилган кунлар келмасдан, Ҳаммаси китобингга ёзилганди.

¹⁷Сенинг ниятларинг, эй Худо, менга қадрлидир, Ниятларингнинг сон — саноғи нақадар кўпдир.

¹⁸Қумдан ҳам кўп бўларди агар уларни санаганимда, Уйғонганимда қарасам, ҳамон мен билан экансан бирга.

¹⁹Эй Худо, кошки фосиқни ўлдирсанг эди, Қонхўр мендан узоқлашса эди,

²⁰Сен ҳақингда улар фитна қиладилар, Душманларинг Сенинг номинг билан ёлғон қасам ичадилар.

²¹Эй Эгам! Сендан нафратланганлардан мен нафратланмайманми?! Сенга қарши исён қилганлардан мен жирканмайманми?!

²²Улардан бутунлай нафратланаман, Уларни ўзимнинг душманим деб биламан.

²³Текшириб кўр мени, эй Худо, юрагимни бил, Синаб кўр мени, ташвишларимни бил.

²⁴Билгин — чи, менинг бирон қабиҳлигим бормикан? Мени абадий йўлдан[373] етаклаб боргин.