Read Муқаддас Китоб Uzbek Забур 21 Bible Online

Забур 21 - Муқаддас Китоб Uzbek bible

Забур 21

¹Ижрочилар раҳбарига. “Тонгда чиққан кийик” куйига айтиладиган Довуд саноси.

²Эй Худойим! Нега мени тарк этдинг?! Нега мендан узоқдасан шу қадар?! Эй Худойим! Нечун менга нажот бермайсан?! Оҳу нолаларимни эшитмайсан?!

³Эй Худойим, кун бўйи илтижо қиламан, Сен эса жавоб бермайсан. Тун бўйи ёлвораман, Аммо менга тинчлик йўқ.

⁴Барибир Сен Муқаддас Худосан, Исроилнинг ҳамду саноси қуршаб олган тахтингни.

⁵Ота — боболаримнинг умиди Сенда эди, Сен уларга нажот бердинг.

⁶Улар Сенга нола қилиб, нажот топдилар, Улар Сенга ишониб, уялиб қолмадилар.

⁷Ахир, мен инсон эмас, бир қуртдирман. Одамлар ҳазар қилган, халқлар нафратланган.

⁸Мени кўрган ҳар ким устимдан кулар, Мени ҳақоратлаб, бош чайқаб дерлар:

⁹“Эгангга ишон, Ўзи қутқариб олар, Эганг сендан мамнун бўлса, У нажот берар.”

¹⁰Онам қорнидан Сен мени чиқарган эдинг, Онам бағрида Ўзинг мени омон сақлаган эдинг.

¹¹Сенга таянаман туғилганимдан буён, Менинг Худойимсан онам дунёга келтиргандан буён.

¹²Мендан узоқ бўлмагин! Ахир, кулфат ёнгинамда — ку, Менга мадад бергувчи бирон кимса йўқ!

¹³Бир гала буқалар[34] Мени қуршаб олган, Ҳа, Башан ўлкасининг[35] кучли буқалари Мени ўраб олган.

¹⁴Ўкириб ўлжасини пора қиладиган шерга ўхшаб, Мен томон улар оғизларини катта очган.

¹⁵Ҳаётим сув каби тўкилди, Суякларим бўғинидан бўшашди, Юрагим мум каби ичимда эриб кетди.

¹⁶Мадорим қуриб, сопол парчасидай бўлиб қолдим[36], Тилим танглайимга ёпишиб қолди, Мени ўлим тўшагига ётқиздинг.

¹⁷Атрофимда кўппаклар изғийди, Бадкирдорлар тўдаси мени қуршаб олгандир, Қўлу оёқларимни улар илма — тешик қилади[37].

¹⁸Ҳамма суякларим кўриниб туради, Душманларим кўзларини чақчайтириб, Еб қўйгудек бўлади.

¹⁹Кийимларимни улар ўзаро бўлишган, Либосим учун қуръа ташлашган.

²⁰Мендан узоқ турма, эй Эгам! Кучим манбаи Сенсан! Тез кел, ёрдам бер!

²¹Жонимни қилич дамидан қутқар, Ҳаётимни кўппаклар чангалидан қутқар!

²²Шерлар оғзидан қутқаргин мени! Ёввойи буқалар шохидан асрагин мени! Сен илтижоимга жавоб бердинг.

²³Биродарларимга Сен ҳақингда айтаман, Жамоа орасида Сенга ҳамду сано ўқийман.

²⁴Уларга шундай дейман: “Эгамизга ҳамду сано айтинг, эй Ундан қўрққанлар! Эгамизни улуғланг, эй Ёқуб насли! Эгамизни иззатланг, эй Исроил насли!

²⁵Кулфатда қолган бечорадан Эгамиз юз ўгирмади. Унинг қайғуларидан ҳазар қилмади, нафратланмади. Бечоранинг нолаларини Эгамиз эшитди.”

²⁶Улуғ жамоа ичра Ҳамду сано айтишимнинг сабаби Сенсан. Сендан қўрққанлар олдида онтимни адо этаман.

²⁷Эй Эгам, қашшоқлар еб тўядилар[38], Сенга юз бурганлар Сени мадҳ қиладилар, Улар дунё тургунча турсинлар!

²⁸Эгамизни эслаб, Унга юз бурсинлар Ер юзидаги жамики инсонлар! Жамики уруғу элатлар Унга сажда қилсинлар!

²⁹Эгамиз ҳокимияти мутлақдир, Элатлар устидан У ҳукмрондир.

³⁰Жамики бойлар ҳам зиёфат еб, Унга таъзим қилади. Тупроқ остига кетаётганлар ҳам Унга сажда қилади, Ҳатто ўз ҳаётини сақлай олмайдиганлар таъзим қилади.

³¹Авлодлар Унга хизмат қилади, Келгуси насллар Раббий ҳақида эшитади.

³²Улар келиб Эгамизнинг нажоти ҳақида эълон қилади, Унинг қилганларини ҳали туғилмаган халқларга айтади.