Read Муқаддас Китоб Uzbek Забур 33 Bible Online

Забур 33 - Муқаддас Китоб Uzbek bible

Забур 33

¹Довуд Абумалек олдида ўзини телбаликка солиб, унинг ҳузуридан қувилгандан кейин[61] айтган саноси.

²[62] Ҳар доим Эгамни олқишлайман, Унинг мадҳи тилимдан асло тушмайди.

³Эгам боис жоним фахрланади, Мазлум эшитиб, шод бўлсин.

⁴Мен билан бирга олқишланг Эгамни, Биргаликда улуғлайлик Унинг номини.

⁵Эгамга юз бурдим, У жавоб берди, Ҳамма қўрқувлардан У халос қилди.

⁶Эгамиздан умид қилганларнинг юзларида нур, Уларнинг юзлари асло шувут бўлмайди.

⁷Бу бечора илтижосин Эгамиз эшитди, Барча уқубатлардан уни қутқарди.

⁸Эгамиздан қўрққанларнинг атрофида Эгамизнинг фариштаси қароргоҳ қуриб, Уларга нажот бахш этади.

⁹Эгамизнинг мурувватини татиб кўр, Эгамиз яхши эканлигини билиб ол. Нақадар бахтлидир Унда паноҳ топганлар.

¹⁰Эй тақводорлар, Эгамиздан қўрқинг. Ундан қўрққанлар асло муҳтожлик кўрмас.

¹¹Ҳатто йиртқич шерлар овқатсиз, Улар очликдан азоб чекади. Эгамизга юз бурганлардан эса Фаровонлик айрилмайди.

¹²Келинг, эй болалар, тинглангиз мени, Ўргатайин мен Эгамиздан қўрқишни.

¹³Ҳаётдан завқланишни, Бахтли узоқ умр кўришни истайсизми?

¹⁴Демак, тилингизни ёмон сўзлардан тийинг, Оғзингизни ёлғон гаплардан асранг.

¹⁵Ёмонликдан қайтинг, яхшилик қилинг, Тинчлик истанг, ҳа, тинчлик пайида бўлинг.

¹⁶Эгамиз солиҳларни кузатиб туради, Уларнинг ноласини Эгамиз эшитади.

¹⁷Бадкирдорлардан эса юз ўгиради, Уларнинг хотирасини ер юзидан ўчиради.

¹⁸Тақводорлар ёлворади, Эгамиз эшитади, Барча балолардан уларни Эгамиз қутқаради.

¹⁹Кўнгли чўкканларга Эгамиз яқиндир, Руҳан эзилганларни У қутқаради.

²⁰Солиҳларнинг қайғулари кўп бўлса, Ҳамма қайғулардан Эгамиз халос қилар.

²¹Уларнинг ўзини Эгамиз сақлайди, Биронта ҳам суяги синдирилмайди.

²²Фосиққа ўз ёвузлиги ўлим келтиради, Солиҳдан нафратланган маҳкум бўлади.

²³Эгамиз Ўз қулларининг ҳаётини қутқаради, Эгамизда паноҳ топувчилар маҳкум бўлмайди.