Read Муқаддас Китоб Uzbek Забур 37 Bible Online

Забур 37 - Муқаддас Китоб Uzbek bible

Забур 37

¹Довуд саноси. Эгамиздан мадад сўраб айтган илтижоси.

²Эй Эгам! Ғазаб билан менга танбеҳ бермагин, Қаҳринг сочиб, менга жазо бермагин.

³Ўқларинг менга санчилди, Қўлларинг устимга босиб тушди.

⁴Бутун танам хастадир ғазабингдан, Соғлигим йўқолган гуноҳларим дастидан.

⁵Айбларим мени жуда ҳам эзади, Улар жуда оғир юкка ўхшайди.

⁶Ақлсизлигим[66] дастидан Яраларим сасиб, йиринглаб оқяпти.

⁷Жуда эгилиб, букчайиб қолдим, Кун бўйи ғамгин юраман.

⁸Ичим иситмадан оташ бўлиб ёнмоқда, Танамда биронта соғ жой йўқ.

⁹Силлам қуриб, тамом эзилдим, Юракдаги аламдан нола қиламан.

¹⁰Юрагим тубидаги истакларим Эй Раббий, Ўзингга равшан, Оҳу нолам Сендан яширин эмас.

¹¹Юрагим титрайди, қувватим кетди, Кўзларимнинг нури адойи тамом бўлди.

¹²Дўст — ёронларим дардим туфайли олдимдан қочади, Туғишганларим асло ёнимга келмайди.

¹³Жонимга қасд қилганлар менга тузоқ қўяди, Менга ёмонлик истаганлар кулфатдан сўз очади, Кун бўйи ёлғон сўйлаб, фитна қилади.

¹⁴Мен эса карга ўхшайман, эшитмайман, Соқовга ўхшайман, гапира олмайман.

¹⁵Чиндан ҳам мен соқовга ўхшайман, Тили қотиб қолган одамдайман.

¹⁶Эй Эгам, умидим ёлғиз Сенсан, Эй Раббим Худо, жавоб берадиган Сенсан.

¹⁷Эй Эгам: “Ҳолимни кўриб, душманларим шодланмасин, Оёқларим қоқилганда, ўзларини катта тутмасин”, дея Сенга ибодат қилдим.

¹⁸Ўзим ҳам йиқилай деб турибман, Тинмай азоб чекаётирман.

¹⁹Қилган эгриликларим учун тавба қиламан, Гуноҳга қўл урганимдан пушаймонман.

²⁰Ашаддий душманларим кўпдир, Сабабсиз мендан нафрат этувчилар сон — саноқсиз.

²¹Улар яхшилигимга ёмонлик ила жавоб беради, Эзгу ишларим учун мени иғво қилади.

²²Эй Эгам, мени асло тарк этмагин, Эй Худойим, мендан узоқ кетмагин.

²³Менга ёрдам бергани шошилгин, Эй менинг нажоткорим — Раббий!