Read Муқаддас Китоб Uzbek Забур 5 Bible Online

Забур 5 - Муқаддас Китоб Uzbek bible

Забур 5

¹Ижрочилар раҳбарига. Най жўрлигида айтиладиган Довуд саноси.

²Сўзларимга қулоқ тут, эй Эгам! Диққат қилгин нолаларимга.

³Эшитгин, мадад сўраб илтижо этаман, Сен ҳам Шоҳимсан, ҳам Худойимсан! Шу боис Сенга ибодат қиламан.

⁴Эй Эгам! Тонг чоғи овозимни эшитасан, Субҳидамда Сенга ёлвораман, Сендан жавоб кутаман.

⁵Қабиҳликдан мамнун бўлмайдиган Худосан Сен, Сенга меҳмон бўлолмас гуноҳкор инсон.

⁶Такаббурлар ҳузурингда тура олмайдилар, Ҳамма бадкирдорларни Сен ёмон кўрасан.

⁷Ёлғон гапирадиганларни Сен қириб ташлайсан, Эй Эгам, қонхўр, ёлғончилардан Сен жирканасан.

⁸Мен эса содиқ севгингнинг мўллиги сабаб Сенинг уйингга кираман. Муқаддас Маъбадингда таъзим қиламан, Қўрқув ила Сенга сажда қиламан.

⁹Нақадар душманларим кўп, эй Эгам, Одиллигинг билан мени сўқмоғингдан етакла, Ўз йўлларингни менга равшан қил.

¹⁰Душманларим оғзидан ҳақиқат чиқмайди, Уларнинг юраклари балою офатдир. Очиқ қабр кабидир оғизлари, Тиллари хушомад қилади.

¹¹Эй Худо, уларни жазолагин! Ёмон ниятлари ўзларининг бошига етсин. Улар Сенга қарши исён қилганлар. Гуноҳлари кўплиги учун уларни ҳайдаб юборгин.

¹²Сенда паноҳ топганларнинг ҳаммаси севинсин, То абад шодликдан улар куйласин. Уларни Сен ҳимоя қилганинг учун, Сени севганлар севинч ила жўшсин.

¹³Эй Эгам! Сен солиҳ кишиларга барака берасан, Сенинг ҳимматинг уларни қалқондай ҳимоя қилади.