Read Муқаддас Китоб Uzbek Забур 54 Bible Online

Забур 54 - Муқаддас Китоб Uzbek bible

Забур 54

¹Ижрочилар раҳбарига. Торли асбоблар жўрлигида айтиладиган Довуд қасидаси[112].

²Ибодатимга қулоқ сол, эй Худо, Илтижоимни эътиборсиз қолдирма.

³Эшит мени, жавоб бер, Душманларим дағдағаси, фосиқларнинг сиқуви Бошимга ғам — кулфат келтиради. Улар ғазабланиб, мендан нафратланади. Эҳ, ўйларим қийнайди мени, Ғам — ташвишлар қаттиқ эзади.

⁵Юрагим ҳасратга тўладир, Ўлим ваҳимаси мени босиб келадир.

⁶Қўрқув, титроқ менга келмоқда, Даҳшат мени эзиб бормоқда.

⁷“Қанийди каптар каби, қанотим бўлса”, дедим, “Учиб кетиб, ором олган бўлардим.

⁸Ҳақиқатан, узоқларга учиб қутулардим, Саҳрода макон қилган бўлардим.

⁹Қутурган шамолу бўрондан қочиб, Ўзимга бошпана топгани шошилган бўлардим.”

¹⁰Эй Раббий, душманларимни чалғит, Уларнинг гапларини чалкаштир. Шаҳарда зўравонлик, жанжални кўриб турибман.

¹¹Фосиқлар кеча — кундуз шаҳар девори устида изғийди, Ёвузлик, ваҳима шаҳар ичида юз бермоқда.

¹²Шаҳарнинг ўртасида бузғунчилик, Кўчаларидан зулм ва ҳийла аримайди.

¹³Ғанимларим мени ҳақорат қилганда эди, Бунга бардошим етган бўларди. Душманим ўзини мендан юқори қўйганда эди, Ундан яширинган бўлардим.

¹⁴Аммо у менинг тенгим — ку, Яқин дўстим ҳамда ҳамроҳим — ку.

¹⁵У билан дилкаш дўст эдик, Эй Худо, Сенинг уйингдаги йиғинда бирга юрардик.

¹⁶Уйлари, юраклари фосиқликка тўла бўлгани учун Ғанимларим ўлимга рўбарў бўлсин, Тириклайин ўликлар диёрига[113] тушсин.

¹⁷Мен илтижо қиламан Худога, Нажот беради Эгам менга.

¹⁸Оқшом, саҳар ҳамда кундуз Дарду фиғонларимни айтаман. Эгам менинг овозимни эшитади.

¹⁹Гарчи менга қаршилар кўп бўлса ҳам, Бирорта ҳам зарар етказмай Мени жанглардан қутқаради.

²⁰Азалдан тахтда ўтирган Худо Менга қулоқ тутиб, Душманларимни мағлуб қилади. Ахир, улар ўз йўлидан қайтмадилар, Худодан улар қўрқмадилар.

²¹Ҳамроҳим ўз дўстига қарши қўлини кўтарди, Мен билан қилган аҳдига у хиёнат қилди.

²²Унинг оғзидан бол томади, Юраги эса адоватга тўла. Сўзлари мойдан ҳам ёқимли, Аслида қиндан чиққан қиличдайдир.

²³Ташвишларингни Эгамизга топширгин, У сенга таянч бўлади. Эгамиз ҳеч қачон солиҳнинг йиқилишига йўл қўймайди.

²⁴Эй Худо, фосиқларни Сен Ўликлар диёрига улоқтирасан. Қонхўр, хоин кимсалар асло Умрининг ярмисини ҳам яшамайди. Мен эса Сенга умид боғлайман.