Read Муқаддас Китоб Uzbek Забур 65 Bible Online

Забур 65 - Муқаддас Китоб Uzbek bible

Забур 65

¹Ижрочилар раҳбарига. Сано. Қўшиқ. Худога шодлик ила ҳайқиринг, Эй ер юзидаги инсонлар!

²Худонинг улуғворлигини куйланг! Унга ажойиб ҳамду санолар айтинг!

³Худога айтинглар: “Сенинг ишларинг нақадар ғаройиб! Қудратинг буюклигидан Душманларинг олдингда титраб тиз чўкади.

⁴Бутун замин Сенга сажда қилади, Улар Сенга ҳамду сано айтади, Ҳа, Ўзингга ҳамду сано куйлайди.”

⁵Кел! Худо нима қилганини кўргин! Инсон манфаати учун қилган Ғаройиб ишларини кўргин!

⁶Худо денгизни қуруқ ерга айлантирди, Ота — боболаримиз баҳрдан юриб ўтди[140], У ерда қилган ишларидан, Худо туфайли биз севинамиз.

⁷Қудрати ила то абад ҳукм суради, Кўзлари халқларни кузатиб туради, Унга қарши исёнчилар қўзғалмасин.

⁸Эй халқлар, Худойимизга олқишлар айтинг, Унинг ҳамду саноси янграсин.

⁹У бизнинг ҳаётимизни сақлаган, Оёқларимизни тойиб кетишдан асраган.

¹⁰Эй Худо, Сен бизни синадинг, Кумушни тозалагандай бизни тозаладинг.

¹¹Бизни тузоққа йўлиқтирдинг, Елкамизга оғир юк ортдинг.

¹²Араваларни бошимиз узра юргиздинг, Олов, сувлардан биз кечиб ўтдик, Фаровонликка[141] бизни олиб келдинг.

¹³Куйдириладиган қурбонликлар билан Сенга берган онтимни адо этгани Мен Сенинг уйингга келаман.

¹⁴Кулфатда қолганимда онт ичган эдим, Тилим ваъда берган, оғзим сўйлаган эди.

¹⁵Бўрдоқиларни куйдириб, Сенга қурбонлик қиламан. Қўчқор, така, буқаларни келтираман. Қурбонликларнинг ҳиди самога етиб боради.

¹⁶Эй Худодан қўрққанлар, келиб эшитинглар, Мен учун У нима қилганин сўзлаб берайин.

¹⁷Мадад сўраб Худога ёлвордим, Унинг ҳамду саноси ҳеч тилимдан тушмади.

¹⁸Юрагимда гуноҳим бўлса эди, Мени асло эшитмас эди Раббий.

¹⁹Худо мени тинглади, Ибодат қилганимда, овозимни эшитди.

²⁰Худога олқишлар бўлсин! Ибодатимни У рад қилмади, Содиқ севгисини мендан дариғ тутмади.