Read Муқаддас Китоб Uzbek Забур 80 Bible Online

Забур 80 - Муқаддас Китоб Uzbek bible

Забур 80

¹Ижрочилар раҳбарига. Соз жўрлигида айтиладиган Осиф[213] саноси.

²Худога, қудратимиз манбаига Севинч билан куйланг! Ёқубнинг Худосига шодлик ила ҳайқиринг!

³Қўшиқ куйланг, доира чертинг, Хушовоз лира, арфа чалинг.

⁴Бурғу чалинг янги ой шодиёнасида, Ой тўлганда, байрам кунимизда[214].

⁵Исроил учун бу қонундир, Ёқуб Худосининг фармонидир.

⁶Миср юрти устига бостириб борганда, Худо буни Исроилга[215] қонун қилиб берди. Мен нотаниш бир овозни эшитдим:

⁷“Юкни олдим елкангиздан, — дейди У. — Қўлларингиз саватдан озод бўлди[216].

⁸Кулфатда Менга фарёд қилдингиз, сизни қутқардим, Булутлар орасидан сизларга жавоб бердим, Марива сувлари бўйида[217] сизларни синадим.

⁹Эшитинг, эй халқим, танбеҳ бераман сизга, Эй Исроил, кошкийди қулоқ солсангиз Менга!

¹⁰Орангизда бегона худолар бўлмасин, Бошқа худоларга сажда қилманглар.

¹¹Мен сизларнинг Эгангиз Худоман, Сизларни Миср юртидан Мен олиб чиққанман, Оғзингизни катта очинг, Мен уни тўлдираман.

¹²Эй халқим, сиз эса овозимга қулоқ солмадингиз, Эй Исроил, Менга итоат этишни рад этдингиз.

¹³Ўз билганингизча яшанг, дея Юракларингизни ўжарлигича қолдирдим.

¹⁴Эҳ, қанийди сиз Менга қулоқ солсангиз, Эй Исроил, Менинг йўлларимдан юрсангиз!

¹⁵Тезда душманларингизни бўйсундирардим, Сизнинг ғанимларингизга зарба берардим.

¹⁶Мен, Эгангиздан нафратланганлар Қўрқувдан титраб, тиз чўккан бўларди, Уларнинг ҳалокати то абад давом этарди.

¹⁷Сизларни буғдойнинг энг яхшиси билан боқардим, Қоядан асал чиқариб, сизларни тўйдирардим.”