Read Муқаддас Китоб Uzbek Ҳикматлар 1 Bible Online

Ҳикматлар 1 - Муқаддас Китоб Uzbek bible

Ҳикматлар 1

¹Исроил шоҳи Довуд ўғли Сулаймоннинг[1] ҳикматлари.

²Бу ҳикматлар донолик ва насиҳатни ўргатади, ҳикматли сўзларни тушунтиради,

³ақлли кўрсатмаларни, тўғрилик, адолат ва одилликни ато қилади,

⁴соддаларга[2] идрок, ёшларга билим, фаҳму фаросат беради.

⁵Донолар тинглаб билимини кўпайтирсин, идроклилар йўл — йўриқ олсин.

⁶Бу ҳикматлар — маталларни, жумбоқларни, дононинг сўзларини ва топишмоқларини тушуниш учундир.

⁷Эгамиздан қўрқиш[3] илму маърифатнинг бошидир[4]. Донолик ва насиҳатдан нафратланган эса нодондир[5].

⁸Ўғлим[6], отанг насиҳатларига қулоқ сол, онанг ўгитларини рад этма,

⁹чунки улар бошингга гўзал гулчамбар, бўйнингга маржондайдир.

¹⁰Ўғлим, агар гуноҳкорлар сени йўлдан урмоқчи бўлса, бўйин берма.

¹¹Агар улар: “Кел, бизга қўшил, пистирма қўйиб қон тўкайлик, айбсизнинг йўлини важсиз тўсайлик,

¹²дўзахга[7] ўхшаб уни тириклайин ўз қаъримизга тортайлик, чуқур каби бутунлайин ютиб юборайлик,

¹³ҳар хил бойликларни тортиб олиб, уйимизни ўлжа билан тўлдирайлик,

¹⁴ҳамма нарса ўртада бўлсин, ҳамёнимиз битта бўлсин”, деб айтсалар,

¹⁵ўғлим, уларга ҳамроҳ бўлма, йўлига бир қадам ҳам босма.

¹⁶Чунки улар қон тўкишга тайёрдирлар, оёқлари ёвузликка шошилади.

¹⁷Қушни тўр билан тутиб бўлмайди, тўрни кўрган қуш пир этиб учиб кетади.

¹⁸Ёвузлар эса ўз қисматини кўра олмайдилар, бошқаларнинг жонини пойлайман деб, ўз жонига зомин бўлганини билмайдилар.

¹⁹Очкўзлик билан тортиб оладиганларнинг аҳволи шу! Улар ўз ҳаётига зомин бўлади.

²⁰Донолик[8] кўчада чақиради. Майдонда баланд овоз билан ҳайқиради.

²¹Гавжум кўчанинг бошида, шаҳар дарвозаларида[9] жар солади.

²²“Эй нодонлар, қачонгача нодон бўлиб юраверасиз?! Сиз — чи, мазах қилувчилар, қачонгача мазах қилишдан завқланасиз?! Ақлсизлар, қачонгача илм — маърифатдан нафратланасиз?!

²³Панд — насиҳатларимга қулоқ солинглар. Мана, сизларга руҳимни бераман. Сўзларимни очаман.

²⁴Лекин сизларни чақирганимда рад этдингиз, қўлларимни узатганимда, эътибор бермадингиз.

²⁵Маслаҳат, панд — насиҳатларимнинг ҳеч бирини қабул қилмадингиз.

²⁶Шунинг учун бошингизга фалокат келганда, мен ҳам куламан. Ваҳимага тушганингизда, мазах қиламан.

²⁷Ваҳима бўрондай, фалокат эса тўфондай келганда, кулфату машаққатлар бошга тушганда,

²⁸улар мени чақирадилар, лекин жавоб бермайман. Улар мени қидирадилар, излайдилар, лекин тополмайдилар.

²⁹Чунки улар илм — маърифатдан нафратландилар, Эгамиздан қўрқишни рад этдилар.

³⁰Маслаҳатларимни, ўгитларимни қабул қилмадилар.

³¹Шунинг учун ўз қилмишларининг мевасини еб, пушаймон бўлиб қоладилар.

³²Нодонлар йўлдан адашиб ўз жонига ўзлари зомин бўлади, ақлсизларнинг беғамлиги ўзларини ҳалок қилади.

³³Лекин менга қулоқ солганлар осойишта ҳаёт кечиради, ёмонликнинг ваҳимасидан халос бўлади.”