Read Муқаддас Китоб Uzbek Ҳикматлар 18 Bible Online

Ҳикматлар 18 - Муқаддас Китоб Uzbek bible

Ҳикматлар 18

¹Бошқалардан ажралган ўз истагини қондиришни хоҳлайди, у ҳамма доно насиҳатга қарши чиқади.

²Нодон ақл — идрокни ёқтирмайди, фақат ўзини кўрсатади.

³Фосиқлик дастидан шармандалик келади, ҳурматсизлик эса уят келтиради.

⁴Доно сўзлар чуқур сувлардай туганмасдир, донолик булоғи ошиб — тошган ирмоқдир.

⁵Фосиқнинг тарафини олиш, ҳукмда солиҳни айблаш яхши эмас.

⁶Аҳмоқнинг тили жанжал чиқаради, сўзлари эса калтак келтиради.

⁷Аҳмоқнинг тили ўзига ҳалокат, сўзлари жонига тузоқдир.

⁸Ғийбатчининг сўзи ширин овқат кабидир, одамнинг бутун аъзойи баданига сингиб кетади.

⁹Ишда дангаса бўлган одам бузғунчига оғайнидир.

¹⁰Эгамизнинг номи мустаҳкам қалъадир, солиҳ у ерга бориб эсон — омон бўлади.

¹¹Бойнинг бойлиги қалъасидир, унинг назарида шаҳарнинг баланд девори кабидир.

¹²Такаббурлик ҳалокатга олиб боради, камтарлик эса иззату икромга сазовор қилади.

¹³Охиригача тингламай жавоб берган аҳмоқдир, у шарманда бўлади.

¹⁴Одамнинг руҳи касалликка чидай олади, лекин тушкун руҳга ким тоқат қила олади?!

¹⁵Ақллининг қалби билим олади, доно илму маърифатга интилади.

¹⁶Совға эгасига ҳамма эшикларни очади, катта одам олдига олиб боради.

¹⁷Биринчи гапирган одам бошқаси келиб текширмагунча, ҳақ кўринади.

¹⁸Қуръа[66] жанжални тўхтатади, кучли рақибларни ҳам ажратади.

¹⁹Хафа бўлган биродарга яқинлашиш кучли шаҳарни олишдан ҳам қийин, ўртадаги жанжал қалъанинг қулфига ўхшайди.

²⁰Одамнинг қорни оғзининг маҳсули билан тўяди, тилининг самараси билан қониқади.

²¹Ўлим ҳам, ҳаёт ҳам тилнинг ҳукмидадир, бирисини севган мевасини ейди.

²²Хотин топган бахт топиб, Эгамизнинг марҳаматига сазовор бўлади.

²³Камбағал илтижо билан гапиради, бой эса қўпол жавоб беради.

²⁴Шундай дўст борки, у ҳалокат келтиради, дўст борки, у туғишгандан ҳам яқинроқдир.