Read Муқаддас Китоб Uzbek Ҳикматлар 23 Bible Online

Ҳикматлар 23 - Муқаддас Китоб Uzbek bible

Ҳикматлар 23

¹Ҳоким билан овқатланишга ўтирганда, олдингга қўйилган нарсаларга назар сол.

²Агар иштаҳанг катта бўлса, бўғзингга пичоқ тиралгандай, ўзингни назорат қил.

³Унинг неъматларини кўнглинг тусамасин, чунки бу алдамчи таомдир.

⁴Бой бўлай деб кўп ҳаракат қилма, фаҳму фаросат билан бу фикрингдан воз кеч.

⁵Бойлик кўз очиб юмгунча йўқ бўлади, қанот қоқиб бургутдай осмонга учиб кетади.

⁶Хасиснинг овқатидан ема, унинг неъматларини кўнглинг тусамасин.

⁷Чунки у кўнглида ўзининг фойдасини ҳисоблайди[78], “Егин, ичгин”, — дейди — ю, кўнгли сен билан эмас.

⁸Еган луқмангни қайт қиласан, ширин сўзларинг ҳавога учиб кетади.

⁹Аҳмоққа гап гапирма, у ҳикматли сўзларингни рад этади.

¹⁰Қадимий чегараларни бузма[79], етимларнинг даласини тортиб олма.

¹¹Чунки уларнинг Ҳимоячиси қудратли, У етимларнинг тарафини олади.

¹²Юрагингни насиҳатга, қулоқларингни эса идрокка оч.

¹³Боладан танбеҳни аяма, чунки таёқ билан урсанг ўлмайди.

¹⁴Таёқ билан уриб жазоласанг, жонини дўзахдан[80] сақлайсан.

¹⁵Ўғлим[81], қалбингда донолик бўлса, юрагим қувонади.

¹⁶Тилингдан тўғри сўз чиқса, кўнглим ҳам шодланади.

¹⁷Гуноҳкорларга ҳавас қилма, доимо Эгамиздан қўрқиб[82] юр.

¹⁸Чунки албатта келажак бор, умидинг рўёбга чиқади.

¹⁹Ўғлим, тинглаб доно бўл, юрагингни тўғри йўлга сол.

²⁰Майхўр ва очкўзлик билан гўшт ейдиганлар орасида бўлма.

²¹Чунки майхўр ва очкўз қашшоқ бўлади, уйқучилик жулдур кийим кийдиради.

²²Сени дунёга келтирган отангга қулоқ сол, онанг қариганда уни хор қилма.

²³Ҳақиқатни сотиб ол, донолик, йўл — йўриқ, идрок ҳам ол, уларни сотма.

²⁴Солиҳ отасининг бошини кўкка етказади, доно фарзанд[83] уни хурсанд қилади.

²⁵Ота — онанг сендан хурсанд бўлсин, сенга ҳаёт берган онанг шод бўлсин.

²⁶Ўғлим, менга қалбингни оч, кўзларинг ишларимни кузатсин.

²⁷Чунки бузуқ хотин — тубсиз чоҳ, зинокор хотин тор қудуқдир.

²⁸У қароқчи каби пойлаб туради, одамлар орасида вафосизликни орттиради.

²⁹Қайғу кимда, ким ғам — ташвиш тортади? Ким жанжал қилади, шикоят қилган ким? Ким сабабсиз яраланади? Кимнинг кўзлари қип — қизил?

³⁰Шароб ичишга берилганлар, хушбўй майни тотиб кўришга кўп борганлар.

³¹Шаробнинг қизиллигига, қадаҳда чўғдай товланишига, текис қуйилишига қарама.

³²Охирида у илон каби чақади, қора илондай заҳар сочади.

³³Кўзларинг ғалати нарсаларни кўради, юрагингда эгри фикрлар бўлади.

³⁴Кўпирган денгиз ўртасида ётгандай, тўлқинларда чайқалган кемада ухлагандай бўласан.

³⁵“Мени урдилар, оғримади, калтакладилар, лекин билмадим. Қачон уйғонаман? Яна бир ичай”, — дейсан.