Read Муқаддас Китоб Uzbek Ҳикматлар 30 Bible Online

Ҳикматлар 30 - Муқаддас Китоб Uzbek bible

Ҳикматлар 30

¹Ёхининг ўғли Ағурнинг Ихтиёлга берган, Ител ва Ухалга айтган сўзлари[100]:

²“Ростдан ҳам одамлар орасида энг ақлсизи эканман, инсоннинг ақл — идроки менда йўқ.

³На доноликни ўрганибман, на Муқаддас Худони билибман.

⁴Ким осмонга кўтарилган, осмондан тушган? Шамолни ҳовучларига йиққан ким? Ким сувни ўз кийимига ўраган? Ернинг барча чегараларини ўрнатган ким? Унинг исми нима? Ўғлининг исми — чи? Биласан — ку!

⁵Худонинг ҳар бир сўзи ҳақиқатдир, Ўзи эса Унга умид боғлаганнинг қалқони.

⁶Унинг сўзларига қўшма, У жазоласа, ёлғонинг фош этилса нима қиласан?

⁷Сендан икки нарсани сўрайман, ўлмасимдан олдин қилгин.

⁸Сохталик ва ёлғонни мендан узоқлаштир, менга қашшоқлик ҳам, бойлик ҳам эмас, фақат насибамни бергин.

⁹Қорним тўйганда: «Эгам ким ўзи?» деб айтмайин, камбағалликдан ўғрилик қилиб, Уни бадном қилмайин.

¹⁰Қул сени лаънатламаслиги учун уни эгасига ёмонлама, бўлмаса жазоланасан.

¹¹Шундай насл борки, отасига лаънат ўқийди, онасини дуо қилмайди.

¹²Шундай насл борки, ўзининг назарида пок, лекин ифлослигидан тозаланмаган.

¹³Шундай насл бор, кўзлари қанчалик такаббур, қарашлари ҳам мағрур.

¹⁴Шундай насл борки, тишлари — қилич, қозиқ тишлари эса пичоқ, ер юзидан камбағални, одамлар орасидан муҳтожни йўқотади.

¹⁵Зулукнинг икки қизи бор: «Бер, бер!» — деб айтади. Ҳеч қачон қониқмайдиган уч нарса, етарли, демайдиган тўрт нарса бор.

¹⁶Дўзах[101], бепушт бачадон, сувсираган тупроқ ҳамда олов, етарли, демайди.

¹⁷Отани мазахлайдиганнинг, онага бўйсунишни рад этадиганнинг кўзларини қузғунлар чўқийди, калхат болалари ейди.

¹⁸Мени ҳайрон қолдирадиган уч нарса бор, тўрт нарса борки, ақлимга сиғмайди:

¹⁹ҳаводаги бургутнинг йўли, тош устидаги илоннинг йўли, денгиз ўртасидаги кеманинг йўли ҳамда қизга юрадиган эркакларнинг йўли.

²⁰Зинокор аёлнинг йўли ҳам шундайдир: у еб бўлгач, оғзини артиб: «Ҳеч бир эгрилик қилмадим — ку!» дейди.

²¹Ер уч нарсадан ларзага келади, тўрт нарсани кўтара олмайди:

²²қул шоҳлик қилганда, аҳмоқ тўйганда,

²³шаллақи аёл эрга текканда, чўри бекасининг ўрнини олганда.

²⁴Ер юзида тўртта кичкина нарса бор, лекин ўта доно:

²⁵чумолилар заиф, лекин егулигини ёзда тайёрлайди.

²⁶Бўрсиқ камқувват, лекин инини қояга қуради.

²⁷Чигирткаларнинг[102] сардори йўқ, лекин барчаси ҳамжиҳат юриш қилади.

²⁸Ўргимчакни[103] қўл билан ушласа бўлади, лекин саройда ҳам юради.

²⁹Юриши салобатли уч нарса, қадами улуғвор тўрт нарса бор:

³⁰шер ҳайвонлар ичида энг кучлиси, ҳеч нимадан қочмайди.

³¹Мақтаниб юрадиган хўроз[104], серка ва ғолиб шоҳ[105].

³²Агар аҳмоқлик қилиб ўзингни мақтаган бўлсанг, бировга ёмонлик қиламан, деб айтган бўлсанг, овозингни ўчир, оғзингни ёп!

³³Чунки кув[106] пишса ёғ чиқади, бурунга урса қонайди, жаҳлни қўзғатса жанжал чиқади.”