Read Муқаддас Китоб Uzbek Ишаё 10 Bible Online

Ишаё 10 - Муқаддас Китоб Uzbek bible

Ишаё 10

¹Эй сиз, ёвуз фармонлар чиқарадиганлар, Қонунлар ёзиб, жабр келтирадиганлар.

²Камбағални адолатдан маҳрум қиляпсиз, Мазлум халқимни талаяпсиз, Овингиз бўлаётир бевалар, Ўлжангиз бўлаётир етимлар.

³Қиёмат куни келганда, сиз нима қиласиз? Узоқдан бало келганда, нима қиласиз? Ёрдам сўраб кимга қочиб борасиз?! Бойлигингизни қаерга олиб кетасиз?!

⁴Йўқ, асир бўлиб йиқилиб қоласиз, Ё жасадлар тагида қолиб кетасиз. Аммо шундай бўлса ҳам, Эгам тушмас ғазабидан, Унинг қўли ҳамон Исроилга қарши кўтарилган.

⁵Эгам айтар: “Мана Оссурия![59] Ғазабимнинг ҳассаси! Унинг қўлидадир қаҳримнинг таёғи!

⁶Мен уни шаккок элга қарши юбораман, Ғазабимни ўша халққа қарши сочаман, Овлаб, ўлжа қил, деб унга амр қиламан. Халқларни лойдай оёқ ости қилади у.

⁷Аммо Оссурия Менинг қуролим эканини Хаёлига ҳам келтирмас, Булар ҳақида у ўйламас ҳам. Унинг фикри — ёди: Халқларни қириб ташлашдир, Битта қўймай уларни йўқ қилишдир.

⁸Оссурия шоҳи шундай ўйлайди: «Лашкарбошиларим шоҳлар эмасми?!

⁹Хално шаҳрини Кархамиш шаҳридай вайрон қилмадикми?! Хомат ҳам Арпаддай[60] қулади — ку! Самария Дамашқ[61] каби эмасми?!

¹⁰Олганимдай беҳуда бутлар шоҳликларини, Оламан Қуддусу Самариянинг санамларини.

¹¹Не қилган бўлсам Самария ва унинг санамларини, Шундай қиламан Қуддусу унинг бутларини.»”

¹²Аммо Раббий тузган режаларини Сион тоғида ва Қуддусда амалга оширгандан кейин, шундай дейди: “Энди такаббур, кибор Оссурия шоҳи билан ҳисоб — китоб қиламан.

¹³Ахир, Оссурия шоҳи шундай деган эди: «Ўз кучим билан буларни амалга оширдим, Донолигим билан қилдим, ахир, идроклиман. Халқларнинг чегарасини йўқ қилдим, Уларнинг хазиналарини ўлжа қилиб олдим. Қудратли шоҳларини тахтдан улоқтирдим.

¹⁴Қуш инига қўл суқиб тухум йиққани каби, Халқларнинг бойликларини тўпладим. Ташлаб кетилган тухумларни қандай тўпласалар, Жамики юртларни мен шундай йиғиб олдим. Ё қанот қоққан, оғзин очган, Ё овозин чиқарган биров бўлмади.»”

¹⁵Болта мақтанарми уни ишлатганга?! Арра ўзини мақтайдими уни қўлга олганга?! Калтак ушлаганни калтакнинг ўзи кўтарадими?! Ҳасса ўзини ушлаганни кўтарадими?!

¹⁶Эй Оссурия, Шу боис Сарвари Олам — Раббий Оғир хасталикни юборар паҳлавонларингиз орасига. Касалликларининг қизғин палласида Уларнинг баданларидан ўт чиқади, Улар гўё лов — лов этиб ёнади.

¹⁷Исроилнинг Нури ёлқин бўлади, Исроил халқининг Муқаддас Худоси олов бўлади. Олов ёндириб, тиканзору чангалзорларини Бир кунда ямлаб ютади.

¹⁸Оссуриянинг муҳташам ўрмонлари Ва унумдор далалари Оғир хасталикка йўлиққан инсондай, Тамомила хароб бўлади.

¹⁹Ўрмондаги дарахтлар шунчалик оз қоларки, Ҳаттоки ёш бола ҳам уларни санай олади.

²⁰Ўша куни Исроилнинг қолган — қутгани, Ёқуб наслининг қутулганлари Бошқа суянмайди ўз зулмкорларига[62], Улар садоқат билан таянади Исроил халқининг Муқаддас Худоси — Эгамга.

²¹Ёқуб наслининг қутулганлари, омон қолганлари Қайтади[63] қудратли Худога.

²²Эй Исроил, сенинг халқинг Денгиз қумидай кўп бўлса ҳам, Энди улардан фақатгина саноқли одамлар қайтади. Зеро, “Қирғин бўлсин”, дея қарор қилинган, Худо одил ҳукмини Ўз халқининг бошига солади.

²³Шубҳасиз, бутун ер юзида қиёмат бўлади, зотан, Сарвари Олам — Раббий шундай қарор қилган.

²⁴Шу боис Сарвари Олам — Раббий шундай айтмоқда: “Эй халқим, Қуддус[64] аҳли! Мисрликлар каби, Оссурияликлар сизларга таёқ кўтарадилар, сизларни қамчи билан урадилар. Аммо ҳадемай ғазабимни босаман, улардан қўрқманглар. Энди Оссурияликларга қаҳримни сочиб, уларни қираман.

²⁶Ҳа, Мидиёнларни Орив қоясида шундай қирган эдим[65]. Ҳассамни кўтариб, Миср лашкарини денгизда ғарқ қилдим[66]. Энди худди шундай қилиб, Мен, Сарвари Олам, уларга қарши қамчимни кўтараман.

²⁷Ўша куни Оссуриянинг юкини елкангиздан улоқтираман. Унинг бўйинтуруғи бўйнингиздан олиб ташланади. Ҳа, бўйинтуруқ йўқ қилинади, чунки сизлар кучга тўлдингиз[67].”

²⁸Оссурия лашкари Ояз шаҳрига[68] келди, Мигрон бўйлаб ўтди, Қурол — аслаҳасини Михмашда шай қилди.

²⁹Улар Гебо сўқмоғини кесиб ўтдилар — у, Рама халқи ваҳимага тушиб қолди, Улар Шоулнинг шаҳри Гивода омонат тўхтади — ю, Шаҳар аҳли қочиб кетди.

³⁰Фарёд қилинг, эй Галим аҳли! Эшит, эй Лайшо! Эй шўрлик Онотўт!

³¹Мадменах аҳли қочиб кетди, Гебим аҳли, паноҳ топай деб, учиб кетди.

³²Ўша куни Оссурия лашкари Нав шаҳрида туради. Қуддус шаҳри жойлашган тепаликка — Азиз Сион тоғига қараб муштини кўтаради.

³³Қара, Сарвари Олам — Раббий Қудратли кучи ила дарахт шохларини кесиб ташлайди, Баланд дарахтларни қирқиб ташлайди, Юксалганларини ерга уради.

³⁴У болта билан кесиб ташлайди ўрмондаги чангалзорни, Қудратли Худо қулатиб юборади Лубнон дарахтларини.