Read Муқаддас Китоб Uzbek Ишаё 11 Bible Online

Ишаё 11 - Муқаддас Китоб Uzbek bible

Ишаё 11

¹Эссайнинг[69] томиридан новда ўсиб чиқади, Ҳа, унинг илдизидан кўчат ёйилади.

²Унинг устида бўлади Эгамизнинг Руҳи. Бу донолик ҳамда ақл — идрок, Насиҳат ва куч — қудрат Руҳидир, Эгамизни билиш ва Ундан қўрқиш Руҳидир.

³Ўша Эссай фарзанди Эгамиздан қўрқишдан завқ олар, Ҳукм қилмас кўзлари кўргани ила, Ажрим қилмас эшитганлари ила.

⁴У адолат ила бечорани ҳукм қилади, Тўғрилик ила ер юзи мазлумларини ажрим қилади. Бир оғиз сўзи билан золимни жазолайди, Нафаси ила фосиқни ўлдиради.

⁵Адолат унинг белидаги камар бўлади, Ҳаққоният унинг белидаги белбоғ бўлади.

⁶Шунда бўри қўзи билан яшар, Сиртлон билан улоқча бирга ётар, Бузоқ, шер, бўрдоқи биргадир, Ёш бола уларни етаклаб юрар.

⁷Сигир билан айиқ бирга ўтлайди, Болалари ҳам бирга ётади, Шер ҳўкизга ўхшаб сомон ейди.

⁸Гўдак қора илон уяси устида ўйнар, Ёш бола қўлини илон инига суқар.

⁹Муқаддас тоғимнинг[70] гир атрофида Улар зарар келтирмас ё чақмас. Ҳа, сувлар тўлдирганидай денгизни, Ер юзи тўлиқ билиб олади Эгамизни.

¹⁰Мана, Эссайнинг томиридан чиққан[71] шоҳ ўша куни халқлар учун баланд кўтарилган байроқ каби бўлади. Элатлар маслаҳат сўрагани унинг ҳузурига келади, Унинг маскани улуғворликка тўлади.

¹¹Ўша куни Раббий қўлини иккинчи марта узатади. У Ўз халқидан қолганларини қутқаради. Уларни Оссуриядан, Мисрнинг шимолий ва жанубий ҳудудларидан[72], Ҳабашистондан[73] йиғиб келади. Эламдан[74], Бобилдан[75], Хоматдан[76] ва денгиз соҳилларидан олиб келади.

¹²Элатларга У белгисини кўрсатиб, Исроилнинг қувилганларини тўплайди. Ер юзининг тўрт бурчагидан йиғади Яҳудонинг тарқалиб кетганларини.

¹³Эфрайимнинг[77] ҳасадгўйлигини қирқади, Яҳудонинг хусуматини тўхтатади, Эфрайим Яҳудога ҳасад қилмас, Яҳудо Эфрайимга хусумат қилмас.

¹⁴Ғарбда улар Филистларга чангал солади, Биргаликда Шарқ халқини талайди, Эдом, Мўаб[78] уларга бўйин эгади, Оммон халқи[79] тиз чўкади.

¹⁵Эгамиз тамомила қириб юборар Қизил денгизнинг қўлтиғини[80]. Фурот дарёсига қарши қўл кўтаради. Гармсел[81] келтириб, жизғанак қилиб, Дарёни етти саёз ирмоққа бўлиб ташлайди, Ирмоқлардан бир — бир ҳатлаб ўтса бўлади.

¹⁶Ҳа, Исроил Мисрдан чиққанда, Уларга йўл очилганидай Эгамизнинг халқидан қолганларга Оссуриядан катта йўл очилади.